1 Chronicles 10
1¶ Nau ol Filistin i pait birua long Isrel. Na ol man bilong Isrel i ranawe long ai bilong ol Filistin, na pundaun i dai pinis long maunten Gilboa. 2Na ol Filistin i bihainim strong Sol, na i bihainim ol pikinini man bilong em. Na ol Filistin i kilim i dai Jonatan, na Abinadap, na Malkisua, ol pikinini man bilong Sol. 3Na pait i go strong tru i birua long Sol, na ol man bilong sutim banara i sutim em, na em i kisim bagarap long ol man bilong sutim banara. 4Nau Sol i tokim man bilong karim klos pait bilong em, Kamautim bainat bilong yu, na sutim mi namel wantaim dispela. Nogut ol dispela lain i no katim skin i kam na bagarapim mi nogut. Tasol man bilong karim klos pait bilong em i no laik. Long wanem, em i pret tru. Olsem na Sol i kisim wanpela bainat, na pundaun antap long en. 5Na taim man bilong karim klos pait bilong em i luksave long Sol i dai pinis, em i pundaun wankain olsem antap long bainat, na dai pinis. 6Olsem na Sol i dai pinis, na tripela pikinini man bilong em, na olgeta hauslain bilong em i dai pinis wantaim. 7Na taim olgeta man bilong Isrel husat i stap long ples daun i luksave long ol i ranawe, na long Sol na ol pikinini man bilong em i dai pinis, nau ol i givim baksait long ol biktaun bilong ol, na ranawe. Na ol Filistin i kam na stap insait long ol. 8¶ Na em i kamap olsem long moning bihain, taim ol Filistin i kam bilong rausim ol samting bilong ol man ol i kilim i dai, long ol i lukim Sol na ol pikinini man bilong em i pundaun long maunten Gilboa. 9Na taim ol i bin rausim ol samting bilong em, ol i kisim het bilong em, na klos pait bilong em, na salim tok i go long hap bilong ol Filistin raun nabaut, bilong karim stori i go long ol piksa bilong god giaman bilong ol, na long ol manmeri. 10Na ol i putim ol klos pait bilong em insait long haus bilong ol god bilong ol, na pasim het bilong em insait long tempel bilong Degon. 11Na taim olgeta Jebes-gileat i harim olgeta samting ol Filistin i bin mekim long Sol, 12Ol i kirap, olgeta strongpela man bilong pait, na ol i tekewe bodi bilong Sol, na ol bodi bilong ol pikinini man bilong em, na bringim ol long Jebes, na planim ol bun bilong ol aninit long ok i stap long Jebes, na tambuim kaikai sevenpela de. 13Olsem na Sol i dai pinis long ol dispela pasin bilong em bilong kalapim lo em i mekim i birua long BIKPELA, yes, i birua long tok bilong BIKPELA, dispela em i no holimpas, na tu bikos em i askim tok helpim long wanpela husat i gat wanpela spirit klostu, bilong askim long en, 14Na em i no askim long BIKPELA. Olsem na Em i kilim em i dai, na tanim kingdom i go long Devit, pikinini man bilong Jesi.
Copyright information for
TpiKJPB