2Ch 21 | TpiKJPB | STEP | ¶ Nau Jehosafat i slip wantaim ol tumbuna papa bilong em, na ol i planim em wantaim ol tumbuna papa bilong em long biktaun bilong Devit. Na Jehoram, pikinini man bilong em, i kisim ples bilong em na bosim kingdom.

‏ 2 Chronicles 21

1 ¶ Nau Jehosafat i slip wantaim ol tumbuna papa bilong em, na ol i planim em wantaim ol tumbuna papa bilong em long biktaun bilong Devit. Na Jehoram, pikinini man bilong em, i kisim ples bilong em na bosim kingdom. 2 Na em i gat ol brata, ol pikinini man bilong Jehosafat, Asaraia, na Jehiel, na Sekaraia, na Asaraia, na Maikel, na Sefataia. Olgeta dispela em ol pikinini man bilong Jehosafat, king bilong Isrel. 3 Na papa bilong ol i givim ol ol bikpela presen bilong silva, na bilong gol, na bilong ol samting i dia tumas, wantaim ol biktaun i gat banis long Juda. Tasol kingdom em i givim long Jehoram. Bilong wanem, em i namba wan pikinini. 4 Nau taim Jehoram i kirap i go long kingdom bilong papa bilong em, em i strongim em yet, na kilim i dai olgeta brata bilong em wantaim bainat, na kain kain tu bilong ol hetman bilong Isrel. 5 Jehoram i gat 32 krismas taim em i stat long bosim kingdom, na em i bosim kingdom etpela yia long Jerusalem. 6 Na em i wokabaut long rot bilong ol king bilong Isrel, wankain olsem hauslain bilong Ehap i mekim. Long wanem, em i bin maritim pikinini meri bilong Ehap. Na em i wokim dispela samting i nogut long ol ai bilong BIKPELA. 7 Tasol BIKPELA i no gat laik long bagarapim hauslain bilong Devit olgeta, bilong wanem, bilong tingim dispela kontrak em i bin wokim wantaim Devit, na olsem Em i promis long givim wanpela lait long em na long ol pikinini man bilong em oltaim oltaim. 8 Long ol de bilong em ol lain Idom i bikhet long stap aninit long strong bilong bosim bilong Juda, na ol i mekim bilong ol yet wanpela king. 9 Nau Jehoram i go ausait wantaim ol hetman bilong em, na olgeta karis bilong em wantaim em. Na em i kirap long nait, na paitim ol lain Idom husat i raunim em nabaut insait, na ol kepten bilong ol karis. 10 Olsem na ol lain Idom i bikhet long stap aninit long han bilong Juda i go inap long tude. Long dispela taim stret tu Lipna i bin bikhet long stap aninit long han bilong em. Bilong wanem, em i bin givim baksait long God BIKPELA bilong ol tumbuna papa bilong em. 11 Na moa tu em i wokim ol ples antap, long ol maunten bilong Juda, na mekim ol husat i stap long Jerusalem long mekim pasin pamuk, na em i pulim strong Juda long en. 12 ¶ Na i gat wanpela rait i kam long em long profet Ilaija, i spik, God BIKPELA bilong tumbuna papa bilong yu Devit i tok olsem, Bikos yu no bin wokabaut long ol rot bilong Jehosafat, papa bilong yu, o long ol rot bilong Esa, king bilong Juda, 13 Tasol yu bin wokabaut long rot bilong ol king bilong Isrel, na bin mekim Juda na ol husat i stap long Jerusalem long go bihainim pamuk pasin, olsem pamuk pasin bilong hauslain bilong Ehap, na tu yu bin kilim i dai ol brata bilong yu bilong hauslain bilong papa bilong yu, husat i winim yu yet, 14 Lukim, wantaim wanpela bikpela sik bai BIKPELA i paitim ol lain manmeri bilong yu, na ol pikinini bilong yu, na ol meri bilong yu, na olgeta kago bilong yu. 15 Na yu bai gat bikpela sik long sik nogut bilong ol rop bilong bel bilong yu, i go inap long ol rop bilong bel bilong yu i kapsait i kam ausait bikos dispela sik i stap, olgeta wan wan de. 16 Na moa tu BIKPELA i kirapim bilong birua long Jehoram spirit bilong ol Filistin, na bilong ol lain Arap, husat i stap klostu long ol lain Itiopia. 17 Na ol i kam antap i go insait long Juda, na brukim i go insait long en, na karim i go olgeta dispela kago ol i lukim insait long haus bilong king, na ol pikinini man bilong em tu, na ol meri bilong em, inap long i no gat wanpela pikinini man bilong em i stap yet, Jehoahas tasol, las bilong ol pikinini man bilong em. 18 Na bihain long olgeta dispela BIKPELA i paitim em long ol rop bilong bel bilong em wantaim wanpela sik nogut i no gat rot long stretim. 19 Na em i kamap olsem, insait long taim taim i ran, bihain long pinis bilong tupela yia, ol rop bilong bel bilong em i kapsait i kam ausait bikos dispela sik i stap. Olsem na em i dai pinis long ol sik nogut tru. Na ol lain manmeri bilong em i no wokim wanpela kukim bilong em, olsem kukim bilong ol tumbuna papa bilong em. 20 Em i gat 32 krismas taim em i stat long bosim kingdom, na em i bosim kingdom long Jerusalem etpela yia, na lusim dispela graun taim i no gat man i gat laik long em. Tasol ol i planim em long biktaun bilong Devit, tasol i no insait ol matmat bilong ol king.