Est 2 | TpiKJPB | STEP | ¶ Na bihain long ol dispela samting, taim belhat tru bilong king Ahasuerus i kol gen, em i tingim gen Vasti, na wanem samting meri i bin mekim, na wanem strongpela tokaut i kamap i birua long em.

‏ Esther 2

1 ¶ Na bihain long ol dispela samting, taim belhat tru bilong king Ahasuerus i kol gen, em i tingim gen Vasti, na wanem samting meri i bin mekim, na wanem strongpela tokaut i kamap i birua long em. 2 Nau ol wokboi bilong king husat i wokim wok long em i tokim em, Larim ol i painim bilong king ol naispela yangpela meri i no bin slip wantaim man. 3 Na larim king i makim ol ofisa bilong olgeta provins long kingdom bilong em, inap long ol i ken bungim wantaim olgeta naispela yangpela meri i no bin slip wantaim man i kam long haus king Susan, long haus bilong ol meri, i kam long han bilong Hege, man bilong king bilong bosim ol rum, wasman bilong ol meri. Na larim ol i givim long ol ol samting bilong ol bilong klinim. 4 Na larim dispela yangpela meri husat i amamasim bel bilong king kamap kwin bilong senisim Vasti. Na dispela samting i amamasim bel bilong king, na em i mekim olsem. 5 Nau long haus king Susan i gat wanpela Ju i stap, husat nem bilong en em Mordekai, pikinini man bilong Jair, pikinini man bilong Simei, pikinini man bilong Kis, wanpela man Benjamin, 6 Husat ol i bin karim i go lusim Jerusalem wantaim ol kalabus lain husat ol i bin karim i go wantaim Jekonaia, king bilong Juda, husat Nebukatnesar, king bilong Babilon, i bin karim i go. 7 Na em i lukautim Hadasa inap long em i bikpela, em i olsem, Esta, pikinini meri bilong liklik papa bilong em. Long wanem, em i no gat papa o mama tu, na dispela yangpela meri em i naispela na naispela tru, husat Mordekai, taim papa na mama bilong meri i dai pinis, i kisim olsem pikinini meri bilong em yet. 8 Olsem na em i kamap olsem, taim ol man i harim tok strong bilong king na strongpela tokaut bilong em, na taim planti yangpela meri i bung wantaim long haus king Susan, long han bilong Hegai, long ol i bringim Esta tu long haus bilong king, long han bilong Hegai, wasman bilong ol meri. 9 Na dispela yangpela meri i amamasim bel bilong em, na meri i kisim gutpela pasin long em. Na em i givim hariap long em ol samting bilong em bilong kamap klin, wantaim ol kain samting olsem em i bilong em, na sevenpela yangpela meri, husat i fit long em i ken givim long em, ausait long haus bilong king. Na em i putim em na ol yangpela meri bilong em i go pas long nambawan ples bilong haus bilong ol meri. 10 Na Esta i no bin soim lain bilong em o kandre bilong em. Long wanem, Mordekai i bin givim tok long em long em i no ken soim dispela. 11 Na Mordekai i wokabaut olgeta wan wan de long ai bilong ples op bilong haus bilong ol meri, long save long Esta i stap olsem wanem, na wanem samting bai kamap long em. 12 Nau taim taim bilong olgeta wan wan yangpela meri i kamap bilong go insait long king Ahasuerus, bihain long em i bin stap 12 mun, bilong bihainim pasin bilong ol meri, (long wanem, olsem tasol ol de bilong kamap klin bilong ol i kamap pinis, em i olsem, sikispela mun wantaim wel bilong mur, na sikispela mun wantaim ol switpela smel, na wantaim ol arapela samting bilong mekim ol meri i kamap klin,) 13 Nau olsem tasol olgeta wan wan yangpela meri i kam long king. Wanem samting meri i gat laik long kisim, ol i givim long em long go wantaim em ausait long haus bilong ol meri i go insait long haus bilong king. 14 Long apinun tru em i go, na long de bihain em i kam bek long namba tu haus bilong ol meri, long han bilong Sasgas, man bilong king bilong bosim ol rum, husat i lukautim ol nambatu lain meri. Meri i no kam insait i go long king moa, sapos king i no gat gutpela amamas long em, na long king i kolim em long nem bilong em. 15 Nau taim taim bilong Esta, pikinini meri bilong Abihail, liklik papa bilong Mordekai, husat i bin kisim em olsem pikinini meri bilong em, i kamap long go long king, em i no strong long askim long wanpela samting, em i kisim tasol wanem samting Hegai, man bilong king bilong bosim ol rum, wasman bilong ol meri, i makim. Na Esta i kisim gutpela amamas long ai bilong olgeta lain husat i lukluk long em. 16 Olsem na ol i kisim Esta i go long king Ahasuerus i go long haus king bilong em long namba ten mun, dispela em i mun Tebet, long namba seven yia em i bosim kingdom. 17 Na king i laikim tru Esta antap moa long olgeta meri, na em i kisim marimari na gutpela amamas long ai bilong em moa long olgeta meri i no bin slip wantaim man, inap long em i putim hat kwin antap long het bilong em, na makim em kwin bilong senisim Vasti. 18 Nau king i wokim wanpela bikpela kaikai tru i go long olgeta hetman bilong em na ol wokboi bilong em, yes, bikpela kaikai bilong Esta. Na em i wokim wanpela lusim long olgeta provins, na givim ol presen, bilong bihainim sindaun bilong king. 19 Na taim ol meri i no bin slip wantaim man i bung wantaim long namba tu taim, nau Mordekai i sindaun long dua bilong banis bilong king. 20 Esta i no bin soim yet ol kandre bilong em o ol lain bilong em, olsem Mordekai i bin givim tok long em. Long wanem, Esta i save wokim tok strong bilong Mordekai, wankain olsem taim Mordekai i lukautim em inap long em i bikpela. 21 ¶ Long ol dispela de, taim Mordekai i sindaun long dua bilong banis bilong king, tupela bilong ol man bilong king bilong bosim ol rum, Biktan na Teres, bilong ol husat i lukautim dua, i belhat tru, na painim rot bilong putim han long king Ahasuerus. 22 Na dispela samting Mordekai i save long en, husat i tokim kwin Esta long en. Na Esta i strongim tok i go long king long en long nem bilong Mordekai. 23 Na taim bikpela painimaut i kamap long dispela samting, ol i painimaut pinis dispela. Olsem na ol i hangamapim tupela wantaim long wanpela diwai. Na dispela ol i raitim long buk bilong ol stori long ai bilong king.