Jeremiah 1
Buk Bilong
Jeremaia
1¶ Ol toktok bilong Jeremaia, pikinini man bilong Hilkaia, bilong ol pris husat i stap long Anatot long hap bilong Benjamin, 2Long husat tok bilong BIKPELA i kam long ol de bilong Josaia, pikinini man bilong Amon, king bilong Juda, long namba 13 yia bilong em i bosim kingdom. 3Em i kam tu long ol de bilong Jehoiakim, pikinini man bilong Josaia, king bilong Juda, i go inap long pinis bilong namba 11 yia bilong Sedekaia, pikinini man bilong Josaia, king bilong Juda, i go inap long ol i karim ol lain Jerusalem i go kalabus long namba faiv mun. 4¶ Nau tok bilong BIKPELA i kam long mi, i spik, 5Bipo Mi wokim yu long bel bilong mama Mi save long yu. Na bipo yu kam ausait long bel Mi mekim yu kamap holi, na Mi makim yu wanpela profet bilong ol kantri. 6Nau mi tok, Ah, GOD Bikpela! Lukim, mi no inap toktok gut. Long wanem, mi wanpela pikinini. 7Tasol BIKPELA i tokim mi, No ken tok, Mi wanpela pikinini. Long wanem, yu mas go long olgeta husat Mi bai salim yu, na wanem samting Mi tok strong long yu long en, yu mas toktok. 8No ken pret long ol pes bilong ol. Long wanem, Mi stap wantaim yu long kisim bek yu, BIKPELA i tok. 9Nau BIKPELA i putim han bilong Em ausait na tasim maus bilong mi. Na BIKPELA i tokim mi, Lukim, Mi bin putim toktok bilong Mi long maus bilong yu. 10Lukim, tude Mi bin putim yu antap long ol kantri na antap long ol kingdom, long kamautim ol rop daunbilo, na bilong pulim i go daun, na bilong bagarapim olgeta, na bilong tromoi i go daun, bilong wokim, na bilong planim. 11¶ Na moa tu tok bilong BIKPELA i kam long mi, i spik, Jeremaia, yu lukim wanem samting? Na mi tok, Mi lukim wanpela stik bilong diwai almon. 12Nau BIKPELA i tokim mi, Yu bin luksave gut. Long wanem, Mi bai hariapim tok bilong Mi bilong mekim dispela. 13Na tok bilong BIKPELA i kam long mi namba tu taim, i spik, Yu lukim wanem samting? Na mi tok, Mi lukim wanpela sospen i boil. Na pes bilong en i lukluk i go long hap not. 14Nau BIKPELA i tokim mi, Ausait long hap not wanpela samting nogut bai bruk i kam antap long olgeta manmeri i stap long dispela hap. 15Long wanem, harim, Mi bai singautim olgeta famili bilong ol kingdom bilong hap not, BIKPELA i tok. Na ol bai kam, na olgeta wan wan bai putim sia king bilong em long ai bilong ol dua bilong banis bilong Jerusalem, na i birua long olgeta banis bilong en raun nabaut, na i birua long olgeta biktaun bilong Juda. 16Na Mi bai kolim ol kot bilong Mi i birua long ol long sait bilong olgeta pasin nogut bilong ol, husat i bin givim baksait long Mi, na bin kukim insens long ol arapela god, na lotuim ol wok bilong ol han bilong ol yet. 17Olsem na yu pasim strong namel bilong bel bilong yu, na kirap, na toktok long ol long olgeta samting Mi tok strong long yu. No ken wari planti taim yu lukim ol pes bilong ol, nogut Mi mekim yu paul tru long ai bilong ol. 18Long wanem, lukim, tude mi bin mekim yu wanpela biktaun ol i strongim, na wanpela bikpela pos ain, na ol banis bras i birua long dispela hap olgeta, i birua long ol king bilong Juda, i birua long ol hetman bilong en, i birua long ol pris bilong en, na i birua long ol manmeri bilong dispela hap. 19Na ol bai pait birua long yu, tasol ol bai i no inap winim yu. Long wanem, Mi stap wantaim yu, BIKPELA i tok, bilong kisim bek yu.
Copyright information for
TpiKJPB