Joh 20 | TpiKJPB | STEP | ¶ Long namba wan de bilong wik, Maria Makdalin i kam long moning tru, taim em i tudak yet, i kam long matmat, na luksave olsem ol i bin rausim dispela ston long matmat.

‏ John 20

1 ¶ Long namba wan de bilong wik, Maria Makdalin i kam long moning tru, taim em i tudak yet, i kam long matmat, na luksave olsem ol i bin rausim dispela ston long matmat. 2 Nau em i ran, na kam long Saimon Pita, na long dispela arapela disaipel, husat Jisas i laikim tru, na tokim ol, Ol i bin kisim Bikpela i go ausait long matmat, na mipela i no save ol i bin slipim em we. 3 Olsem na Pita i go ausait, na dispela arapela disaipel, na kam long matmat. 4 Olsem tasol ol i ran tupela wantaim. Na dispela arapela disaipel i bin winim Pita long ran, na kamap pastaim long matmat. 5 Na taim em i lindaun, na taim em i lukluk insait, em i lukim ol klos bilong naispela laplap i slip. Tasol em i no go insait. 6 Nau Saimon Pita i kam bihainim em, na go insait long matmat, na lukim ol klos bilong naispela laplap i slip, 7 Na liklik laplap, dispela i bin stap nabaut long het bilong em, i no slip wantaim ol klos bilong naispela laplap, tasol i pas wantaim long wanpela ples em yet. 8 Nau dispela arapela disaipel i go insait tu, husat i kam long matmat pastaim, na em i lukim, na bilipim. 9 Long wanem, inap long nau ol i no save long dispela rait bilong God, long em i mas kirap bek gen long dai. 10 Nau ol disaipel i go gen long haus bilong ol yet. 11 ¶ Tasol Maria i sanap ausait long matmat na krai tru. Na taim em i krai tru, em i lindaun, na lukluk insait long matmat, 12 Na lukim tupela ensel long waitpela klos i sindaun, wanpela long het, na arapela long ol fut, we bodi bilong Jisas i bin slip. 13 Na ol i tokim em, Meri, bilong wanem yu krai tru? Em i tokim ol, Bilong wanem, ol i bin kisim Bikpela bilong mi i go, na mi no save ol i bin slipim em we. 14 Na taim em i bin tok olsem, em i tanim em yet bek, na lukim Jisas i sanap, na em i no save long dispela em i Jisas. 15 Jisas i tokim em, Meri, bilong wanem yu krai tru? Yu painim husat? Meri, taim em i ting olsem em i man bilong lukautim gaden, i tokim em, Bikman, sapos yu bin karim em long hia, tokim mi long yu bin slipim em we, na mi bai kisim em i go. 16 Jisas i tokim em, Maria. Em i tanim em yet, na tokim em, Rabonai. Dispela tok em, Tisa. 17 Jisas i tokim em, No ken tasim mi. Long wanem, mi no go antap yet long Papa bilong mi. Tasol go long ol brata bilong mi, na tokim ol, mi go antap i go long Papa bilong mi, na Papa bilong yupela, na long God bilong mi, na God bilong yupela. 18 Maria Makdalin i kam na tokim ol disaipel long em i bin lukim Bikpela, na long em i bin toktok long em long ol dispela samting. 19 ¶ Nau long dispela de stret long apinun tru, taim em i namba wan de bilong wik, taim ol dua i pas we ol disaipel i bung, long wanem, ol i pret long ol Ju, Jisas i kam na sanap namel long ol, na tokim ol, Bel isi i stap long yupela. 20 Na taim em i bin tok olsem, em i soim ol tupela han bilong em na sait bilong em. Nau ol disaipel i amamas, taim ol i lukim Bikpela. 21 Nau Jisas i tokim ol gen, Bel isi i stap long yupela. Olsem Papa bilong mi i bin salim mi, yes, olsem tasol mi salim yupela. 22 Na taim em i bin tokim dispela, em i winim win antap long ol, na tokim ol, Yupela kisim Holi Spirit. 23 Ol sin bilong husat man yupela i lusim, ol i lus pinis long ol. Na ol sin bilong husat man yupela i holim yet, ol i stap yet. 24 Tasol Tomas, wanpela bilong dispela twelpela, husat ol i kolim Didimas, i no stap wantaim ol taim Jisas i kam. 25 Olsem na ol arapela disaipel i tokim em, Mipela i bin lukim Bikpela. Tasol em i tokim ol, Sapos mi no lukim mak bilong ol nil long tupela han bilong em, na putim pinga bilong mi insait long mak bilong ol nil, na sutim han bilong mi insait long sait bilong em, mi no inap bilipim. 26 ¶ Na bihain long etpela de gen ol disaipel bilong em i stap insait, na Tomas wantaim ol. Nau Jisas i kam, taim ol dua i pas, na sanap namel long ol, na tok, Bel isi i stap long yupela. 27 Nau em i tokim Tomas, Putim pinga bilong yu i kam long hia, na lukim tupela han bilong mi. Na putim han bilong yu long hia, na sutim dispela insait long sait bilong mi. Na no ken stap man i no gat bilip, tasol man i bilip. 28 Na Tomas i bekim na tokim em, Bikpela bilong mi, na God bilong mi. 29 Jisas i tokim em, Tomas, bikos yu bin lukim mi, yu bin bilip. Blesing i stap long ol husat i no bin lukim, na yet ol i bin bilipim. 30 Na planti arapela mak, tru tumas, Jisas i wokim long pes bilong ol disaipel bilong em, dispela mi no raitim long dispela buk. 31 Tasol ol dispela samting mi raitim, inap long yupela i ken bilip long Jisas em i Kraist, Pikinini Man bilong God. Na long taim yupela i bilip yupela i ken gat laip long nem bilong em.