Jos 17 | TpiKJPB | STEP | ¶ Na tu i gat wanpela hap satu bilong lain bilong Manasa. Long wanem, em i stap namba wan pikinini bilong Josep, em i olsem , bilong Makir, namba wan pikinini bilong Manasa, papa bilong Gileat. Bilong wanem, em i wanpela man bilong bikpela pait, olsem na em i gat Gileat na Basan.

‏ Joshua 17

1 ¶ Na tu i gat wanpela hap satu bilong lain bilong Manasa. Long wanem, em i stap namba wan pikinini bilong Josep, em i olsem, bilong Makir, namba wan pikinini bilong Manasa, papa bilong Gileat. Bilong wanem, em i wanpela man bilong bikpela pait, olsem na em i gat Gileat na Basan. 2 Na i gat tu wanpela hap satu bilong olgeta arapela pikinini bilong Manasa long ol famili bilong ol, bilong ol pikinini bilong Abieser, na bilong ol pikinini bilong Helek, na bilong ol pikinini bilong Asriel, na bilong ol pikinini bilong Sekem, na bilong ol pikinini bilong Hefer, na bilong ol pikinini bilong Semida, dispela em i ol man pikinini bilong Manasa, pikinini man bilong Josep, long ol famili bilong ol. 3 Tasol Selofehat, pikinini man bilong Hefer, pikinini man bilong Gileat, pikinini man bilong Makir, pikinini man bilong Manasa, i no gat ol pikinini man, ol pikinini meri tasol. Na ol dispela em i ol nem bilong ol pikinini meri bilong em, Mala, na Noa, Hokla, Milka, na Tirsa. 4 Na ol i kam klostu, long ai bilong pris Eleasar, na long ai bilong Josua, pikinini man bilong Nun, na long ai bilong ol hetman, i spik, BIKPELA i tok strong long Moses long givim long mipela wanpela samting papa i givim pikinini namel long ol brata bilong mipela. Olsem na bilong bihainim tok strong bilong BIKPELA, em i givim ol wanpela samting papa i givim pikinini namel long ol brata bilong papa bilong ol. 5 Na i gat tenpela hap skel i pundaun long Manasa, i no kaunim dispela hap bilong Gileat na Basan, dispela i stap long hapsait long Jordan. 6 Bilong wanem, ol pikinini meri bilong Manasa i gat wanpela samting papa i givim pikinini namel long ol pikinini man bilong em. Na olgeta arapela pikinini man bilong Manasa i gat dispela hap bilong Gileat 7 ¶ Na hap arere bilong Manasa i stat long Aser i go long Mikmeta, dispela i slip long ai bilong Sekem. Na hap arere i ran long han sut sait i go long ol husat i stap long En-tapua. 8 Nau Manasa i gat dispela hap bilong Tapua. Tasol Tapua long hap arere bilong Manasa i bilong ol pikinini bilong Ifraim. 9 Na hap arere i go daun i go long wara Kana, long hap saut bilong riva. Ol dispela biktaun bilong Ifraim i stap namel long ol biktaun bilong Manasa. Hap arere bilong Manasa tu i stap long hap not bilong riva, na ol hap i go ausait bilong en i stap long biksi. 10 Long hap saut em i bilong Ifraim, na long hap not em i bilong Manasa, na biksi em i hap arere bilong em. Na ol i bung wantaim long Aser long hap not, na long Isakar long hap is. 11 Na Manasa i gat insait long Isakar na insait long Aser Bet-sean na ol taun bilong en, na Ipleam na ol taun bilong en, na ol husat i stap long Dor na ol taun bilong en, na ol husat i stap long Endor na ol taun bilong en, na ol husat i stap long Teanak na ol taun bilong en, na ol husat i stap long Megiddo na ol taun bilong en, yes, tripela kantri. 12 Yet ol pikinini bilong Manasa i no inap long ranim i go ausait ol husati stap long ol dispela biktaun. Tasol ol lain Kenan i gat laik long stap long dispela hap. 13 Yet em i kamap olsem, taim ol pikinini bilong Isrel i wok long kamap strong, long ol i putim ol lain Kenan aninit long takis. Tasol ol i no bin ranim ol i go ausait olgeta. 14 ¶ Na ol pikinini bilong Josep i tokim Josua, i spik, Bilong wanem yu bin givim mi wanpela hap satu tasol na wanpela hap skel long kisim olsem samting papa i givim pikinini, taim yu luksave olsem mi stap wanpela bikpela lain manmeri, bikos BIKPELA i bin blesim mi i kam inap long nau? 15 Na Josua i bekim tok long ol, Sapos yu stap wanpela bikpela lain manmeri, orait kisim yu yet i go antap long hap i gat ol diwai, na katim i go daun bilong yu yet long dispela hap long hap graun bilong ol lain Peris na bilong ol traipela man, sapos maunten Ifraim i no patpela inap long yu. 16 Na ol pikinini bilong Josep i tok, Dispela liklik maunten i no inap long mipela. Na olgeta lain Kenan husat i stap long dispela hap bilong ples daun i gat ol karis ain, ol lain husat i stap bilong Bet-sean na ol taun bilong en, na ol lain husat i stap long ples daun bilong Jesril wantaim. 17 Na Josua i tokim hauslain bilong Josep, yes, i go long Ifraim na i go long Manasa, i spik, Yu stap wanpela bikpela lain manmeri, na yu gat bikpela strong. Yu no ken gat wanpela hap satu tasol. 18 Tasol dispela maunten bai stap bilong yu. Long wanem, em i stap wanpela hap bilong diwai. na yu bai katim em i go daun. Na ol hap i go ausait bilong en bai stap bilong yu. Long wanem, yu bai ranim i go ausait ol lain Kenan, maski ol i gat ol karis ain, na maski ol i stap strong.