Pro 23 | TpiKJPB | STEP | ¶ Taim yu sindaun bilong kaikai wantaim hetman, tingim na skelim gut wanem samting i stap long ai bilong yu.

‏ Proverbs 23

1 ¶ Taim yu sindaun bilong kaikai wantaim hetman, tingim na skelim gut wanem samting i stap long ai bilong yu. 2 Na putim naip long nek bilong yu, sapos yu stap man i laik kaikai planti. 3 No ken gat laik long ol naispela kaikai bilong em. Long wanem, ol i kaikai i pulap long giaman. 4 ¶ No ken hatwok bilong kamap maniman. Lusim bilip long save tru bilong yu yet. 5 Ating yu laik putim tupela ai bilong yu long dispela samting i no stap, a? Long wanem, tru tumas, ol planti mani samting i wokim ol wing bilong ol yet. Ol i flai i go olsem igal i go long heven. 6 ¶ Yu no ken kaikai bret bilong em husat i gat ai bilong pasin nogut, na tu yu no ken gat laik long ol naispela kaikai bilong em. 7 Long wanem, olsem em i tingting long bel bilong em, em i stap olsem tasol. Kaikai na dring, em i tokim yu. Tasol bel bilong em i no stap wantaim yu. 8 Dispela hap kaikai yu bin kaikai bai yu trautim, na ol switpela toktok bilong yu bai lus. 9 ¶ No ken toktok long tupela ia bilong krankiman. Long wanem, em bai tingim save tru bilong ol toktok bilong yu i samting nating. 10 ¶ No ken rausim olpela mak bilong graun. Na no ken go long ol bikpela gaden bilong ol pikinini i no gat papa. 11 Long wanem, man bilong baim bek ol em i strongpela. Em bai toktok wantaim strongpela askim long sait bilong wari bilong ol wantaim yu. 12 ¶ Putim bel bilong yu i go long tok skul, na tupela ia bilong yu i go long ol toktok bilong save. 13 No ken holim bek stretim long pikinini. Long wanem, sapos yu paitim em long kanda, em bai i no inap dai. 14 Yu bai paitim em long kanda, na yu bai kisim bek tewel bilong em long hel. 15 Pikinini man bilong mi, sapos bel bilong yu i gat save tru, bel bilong mi bai wokim amamas tru, yes, bilong mi. 16 Yes, stia bilong bel bilong mi bai wokim amamas tru, taim maus bilong yu i autim ol stretpela samting. 17 ¶ No ken larim bel bilong yu mangalim ol sinman. Tasol yu mas stap long pret long BIKPELA long olgeta hap bilong de. 18 Long wanem, tru tumas, i gat wanpela pinis. Na strongpela hop bilong yu ol bai i no inap rausim olgeta. 19 ¶ Yu harim, pikinini man bilong mi, na stap saveman, na stiaim bel bilong yu long rot. 20 No ken stap namel long ol man i dringim planti wain, namel long ol wailman i kaikai planti mit. 21 Long wanem, man bilong spak na man bilong kaikai planti tumas bai kamap rabisman. Na ai i laik slip bai pasim man long ol klos i bruk. 22 Harim long papa bilong yu husat i kamapim yu, na no ken tingim mama bilong yu i samting nating taim em i lapun. 23 Baim tok tru, na no ken salim. Na tu baim save tru, na tok skul, na gutpela save. 24 Papa bilong stretpela man bai wokim bikpela amamas tru. Na em husat i kamapim pikinini i saveman bai gat amamas tru long em. 25 Papa bilong yu na mama bilong yu bai amamas, na meri husat i karim yu bai wokim amamas tru. 26 Pikinini man bilong mi, givim mi bel bilong yu, na larim tupela ai bilong yu lukluk gut long ol rot bilong mi. 27 Long wanem, pamuk meri em i baret i dip tru. Na narakain meri em i bikpela hul i no gat bikpela brait. 28 Na tu em i wet hait olsem em i painim prais bilong pait, na mekim ol man bilong kalapim lo i kamap planti moa namel long ol man. 29 ¶ Husat i gat bikpela hevi? Husat i gat bel hevi? Husat i gat ol pait? Husat i gat toktok nating? Husat i gat ol bagarap em i kisim nating? Husat i gat ol retpela ai? 30 Em ol husat i stap yet long wain, ol husat i go bilong painim wain ol i abusim. 31 Yu no ken lukluk long wain taim em i retpela, taim em i givim kala bilong en insait long kap, taim em i muvim em yet nabaut. 32 Long pinis bilong en em i kaikaim yu olsem snek, na em i givim pen olsem snek i gat marasin nogut. 33 Tupela ai bilong yu bai lukim narakain meri, na bel bilong yu bai autim ol tok paul. 34 Yes, yu bai stap olsem em husat i slipim bodi namel long solwara, o olsem em husat i slip antap long mas bilong sip. 35 Ol i bin paitim mi, yu bai tok, na mi no bin sik. Ol i bin paitim paitim mi, na mi no bin pilim. Wanem taim bai mi kirap? Bai mi painim dispela gen tasol.