‏ Proverbs 8

1¶ Ating save tru i no singaut, a? Na ating gutpela save i no putim nek bilong en go ausait, a? 2Em i sanap antap long ol ples antap, klostu long rot long ol ples bilong ol liklik rot. 3Em i singaut klostu long ol dua bilong banis, long ples bilong go insait long biktaun, long ples bilong kam insait long ol dua. 4Long yupela, O ol man, mi singaut. Na nek bilong mi i go long ol pikinini man bilong man. 5O yupela man i no gat save, kisim save long save tru. Na, yupela krankiman, bel bilong yupela mas gat gutpela save. 6Harim. Long wanem, mi bai toktok long ol samting i nambawan, na taim maus bilong mi i op, ol stretpela samting. 7Long wanem, maus bilong mi bai autim tok tru. Na pasin nogut em i sting samting long maus bilong mi. 8Olgeta toktok bilong maus bilong mi i stap long stretpela pasin. I no gat wanpela samting i bikhet o paul insait long ol. 9Ol olgeta i klia long em husat i gat save, na stretpela long ol husat i painim pinis save. 10Kisim tok skul bilong mi, na no ken kisim silva, na save, moa long nambawan gol. 11Long wanem, save tru i winim ol rubi. Na olgeta samting man i ken gat laik long kisim, ol i no inap long skelim wantaim dispela. 12¶ Mi save tru mi stap wantaim pasin bilong bihainim save tru, na mi wok long painim save bilong kamapim ol samting i kam long gutpela save. 13Pret long BIKPELA em pasin bilong birua tru long pasin nogut. Hambak pasin, na pasin bilong man i tingim em i winim ol arapela, na pasin bilong bihainim rot nogut, na maus i bikhet, mi no laikim tru. 14Tok helpim em i bilong mi, na strongpela save tru. Mi gutpela save. Mi gat strong. 15Long mi ol king i bosim kingdom, na ol hetman i tokaut strong long stretpela kot. 16Long mi ol hetman, na ol bikman, yes, olgeta jas bilong dispela graun, i bosim man. 17Mi laikim tru ol husat i laikim mi tru. Na ol husat i painim mi hariap bai painim mi pinis. 18Planti mani samting na ona i stap wantaim mi, yes, planti mani samting i stap gut longpela taim, na stretpela pasin. 19Kaikai bilong mi i gutpela moa long gol, yes, long nambawan gol, na mani samting bilong mi long nambawan silva. 20Mi go pas long rot bilong stretpela pasin, namel long ol liklik rot bilong kot, 21Inap long mi ken mekim ol husat i laikim mi tru long kisim ol samting olsem papa i givim pikinini. Na mi bai pulapim ol samting i dia tru bilong ol. 22¶ BIKPELA i bin holimpas mi long stat bilong rot bilong Em bipo long ol wok bilong En bilong bipo. 23Em i sanapim mi long oltaim oltaim bipo tru, long stat, o long taim dispela graun i no stap yet. 24Taim ol ples daunbilo i no stap, Em i bringim mi ausait, taim i no gat ol ai bilong wara i sut i pulap tru wantaim wara. 25Bipo ol maunten i sanap gut, bipo ol liklik maunten i stap, Em i bringim mi ausait, 26Taim Em i no bin wokim dispela graun yet, o ol ples kunai, o hap bilong das bilong dispela graun i antap tru, 27Taim Em i redim ol heven, mi stap. Taim Em i putim ol arere raun nabaut antap long pes bilong ples dip, 28Taim Em i wokim ol klaut antap, taim Em i strongim ol ai bilong ol wara i sut bilong ples dip, 29Taim Em i givim strongpela tokaut bilong Em long solwara, inap long ol wara i no ken brukim strongpela tok bilong Em, taim Em i makim ol as ston bilong dispela graun, 30Nau mi stap klostu long Em, olsem pikinini mama i lukautim wantaim Em. Na mi stap gutpela amamas bilong Em olgeta wan wan de, na mi wokim amamas tru oltaim long ai bilong Em. 31Mi bin wokim amamas tru long hap bilong dispela graun bilong Em ol man i stap long en. Na ol gutpela amamas bilong mi i stap wantaim ol pikinini man bilong ol man. 32¶ Olsem na nau harim long mi, O yupela pikinini. Long wanem, blesing i stap long ol husat i holimpas ol rot bilong mi. 33Harim tok skul, na stap saveman, na no ken tok nogat long en. 34Blesing i stap long man husat i harim mi, em man i was i stap olgeta wan wan de long ol dua bilong banis bilong mi, na wet i stap long ol pos bilong ol dua bilong mi. 35Long wanem, husat man i painim mi pinis i painim laip pinis, na em bai kisim gutpela amamas bilong BIKPELA. 36Tasol em husat i mekim sin i birua long mi i mekim rong long tewel bilong em yet. Olgeta man husat i no laikim tru mi i laikim tru dai.