Psalms 114
1¶ Taim Israel i lusim Isip i go, taim hauslain bilong Jekop i lusim ol manmeri bilong narakain tok ples, 2Orait Juda i bin stap ples holi bilong em, na Israel i bin stap kingdom bilong em. 3Solwara i bin lukim dispela na i ranawe. Em i bin mekim Jordan i surik i go bek. 4Ol maunten i bin kalap kalap olsem ol sipsip man. Na ol liklik kil bilong maunten i bin kalap kalap olsem ol pikinini sipsip. 5O yu solwara, yu bin mekim wanem samting bilong yu mas ranawe? Yu Jordan, wanem samting i mekim yu i surik i go bek? 6Yupela maunten, wanem samting na yupela i bin kalap kalap olsem sipsip man? Na yupela liklik kil bilong maunten wanem samting na yupela i bin kalap kalap olsem ol pikinini sipsip? 7Yu graun, yu mas guria taim yu stap long pes bilong Bikpela, long pes bilong God bilong Jekop. 8Em i bin mekim dispela bikpela ston i kamap raunwara, dispela strongpela ston i kamap as wara bilong ol wara.
Copyright information for
TpiKJPB