Psalms 115
1¶ I no long mipela, O BIKPELA, i no long mipela, tasol long nem bilong Yu givim glori, bilong tingim sori bilong Yu, na bilong tingim tok tru bilong Yu. 2Bilong wanem ol haiden i ken tok olsem, God bilong ol i stap we nau? 3Tasol God bilong mipela i stap long ol heven. Em i bin mekim olgeta samting Em i laik mekim. 4Ol god giaman bilong ol i silva na gol. Ol han bilong ol man i bin wokim ol. 5Ol i gat maus, tasol ol i no save toktok. Ol i gat ai, tasol ol i no save lukluk. 6Ol i gat ia, tasol ol i no save harim. Ol i gat nus, tasol ol i no save smelim. 7Ol i gat han, tasol ol i no save holim samting. Ol i gat lek, tasol ol i no save wokabaut. Na tu ol i no save toktok long nek bilong ol. 8Ol man i wokim ol, ol i wankain olsem ol. Olgeta wan wan man i putim bilip bilong ol long ol, em i wankain olsem ol. 9¶ O Israel, Yu mas putim bilip bilong yu long BIKPELA. Em i stap helpim bilong ol na hap plang bilong ol. 10O hauslain bilong Aron, yupela i mas putim bilip bilong yupela long BIKPELA. Em i stap helpim bilong ol na hap plang bilong ol. 11Yupela man i pret long BIKPELA, yupela i mas putim bilip long BIKPELA. Em i stap helpim bilong ol na hap plang bilong ol. 12BIKPELA i bin tingting long yumi. Em bai blesim yumi. Em bai blesim haus bilong Israel. Em bai blesim haus bilong Aron. 13Em bai i blesim ol manmeri i pret long BIKPELA, ol man nating wantaim ol bikman. 14BIKPELA bai mekim namba bilong yupela i kamap bikpela moa na moa yet, yupela wantaim ol pikinini bilong yupela. 15Yupela i bin kisim blesing long BIKPELA, Em i bin wokim heven na graun. 16Heven, yes ol heven, ol i bilong BIKPELA. Tasol Em i bin givim dispela graun long ol pikinini bilong ol man. 17Ol daiman i no save litimapim nem bilong BIKPELA. Na tu ol man i go daunbilo long ples i no gat toktok ol i no save litimapim nem bilong BIKPELA. 18Tasol yumi bai blesim BIKPELA, i stat long dispela taim na i go long oltaim oltaim. Litimapim nem bilong BIKPELA.
Copyright information for
TpiKJPB