Psalms 116
1¶ Mi laikim tru BIKPELA. Long wanem Em i bin harim nek bilong mi na ol strongpela askim bilong mi. 2Long wanem Em i bin putim ia bilong En i kam daun long mi. Olsem na bai mi singaut long Em olgeta taim mi stap laip. 3Ol bel sori bilong i dai pinis i bin raunim mi. Na ol pen bilong hel i bin holimpas mi. Mi bin lukim hevi na bel sori. 4Long dispela taim mi bin singaut long nem bilong BIKPELA. O BIKPELA, mi askim Yu long daun pasin, Yu mas kisim bek tewel bilong mi. 5BIKPELA em Man bilong soim marimari, na Em i stretpela. Yes, God bilong yumi Em i pulap long sori. 6BIKPELA i save lukautim i stap ol man i no gat save. Ol i bin daunim mi, na Em i bin helpim mi. 7O tewel bilong mi, yu mas i go bek long malolo bilong yu. Long wanem BIKPELA i bin givim planti samting long yu. 8Long wanem Yu bin tekewe tewel bilong mi long i dai pinis, na ai bilong mi long aiwara, na ol lek bilong mi long i pundaun. 9Bai mi wokabaut long ai bilong BIKPELA long hap graun bilong ol man i stap laip. 10¶ Mi bin bilip, olsem na mi bin toktok. Ol i bin givim planti pen long mi. 11Mi bin hariap na tok olsem, Olgeta man i stap man bilong giaman. 12Bai mi bekim wanem samting long BIKPELA bilong bekim olgeta samting Em i bin givim mi? 13Bai mi kisim kap bilong kisim bek, na bai mi singaut long nem bilong BIKPELA. 14Nau, long ai bilong olgeta manmeri bilong Em, bai mi bekim ol strongpela promis bilong mi long BIKPELA. 15Long ai bilong BIKPELA, dai pinis bilong ol seint bilong Em i dia tumas. 16O BIKPELA, tru mi stap wokboi bilong Yu. Mi stap wokboi bilong Yu na pikinini man bilong wokmeri bilong Yu. Yu bin lusim ol sen bilong mi. 17Bai mi ofaim long Yu dispela sakrifais bilong givim tenkyu. Na bai mi singaut long nem bilong BIKPELA. 18Nau long ai bilong olgeta manmeri bilong Em bai mi bekim ol strongpela promis bilong mi long BIKPELA, 19Long ples op insait long banis bilong haus bilong BIKPELA, namel long yu, O Jerusalem. Yupela i mas litimapim nem bilong BIKPELA.
Copyright information for
TpiKJPB