Psa 119 | TpiKJPB | STEP | ¶ Blesing i stap long ol man i no doti long pasin bilong ol . Em ol man i wokabaut long lo bilong BIKPELA.

‏ Psalms 119

ALEP

1 ¶ Blesing i stap long ol man i no doti long pasin bilong ol. Em ol man i wokabaut long lo bilong BIKPELA. 2 Blesing i stap long ol man i holimpas long ol testimoni bilong Em na wok long painim Em long olgeta hap bilong bel. 3 Ol tu i no save mekim sin nogut. Ol i wokabaut long ol pasin bilong Em. 4 ¶ Yu bin givim strongpela tok long mipela long stap strong long holimpas long ol strongpela lo bilong Yu. 5 O, long ol pasin bilong mi i bin kisim stiaim long holimpas long ol lo bilong Yu ol i raitim. 6 Orait, bai mi no sem taim mi tingting long olgeta strongpela tok bilong Yu. 7 ¶ Long stretpela pasin bilong bel, bai mi litimapim nem bilong Yu, taim mi bai kisim save long ol stretpela tok long pe bilong kot bilong Yu. 8 Bai mi holimpas long ol lo bilong Yu ol i bin raitim. O, Yu no ken lusim no ken givim baksait olgeta long mi.

BET

9 ¶ Olsem wanem yangpela man bai klinim pasin bilong en? I olsem, Em i mas lukaut long en bilong bihainim tok bilong Yu. 10 ¶ Mi bin painim Yu long bel olgeta bilong mi. O, Yu no ken larim mi i lusim ol strongpela tok bilong Yu. 11 ¶ Mi bin haitim tok bilong Yu long bel bilong mi, bai mi no ken mekim sin i birua long Yu. 12 ¶ O BIKPELA, blesing i stap long Yu. Yu mas skulim mi long ol lo bilong yu, ol i raitim. 13 ¶ Long maus bilong mi, mi bin telimautim olgeta tok long pe bilong kot bilong maus bilong Yu. 14 Mi bin amamas tru long pasin bilong ol testimoni bilong Yu, olsem mi bin amamas long olgeta mani samting. 15 Bai mi tingting strong long ol strongpela lo bilong Yu. Na bai mi lukluk bilong givim ona long ol pasin bilong Yu. 16 Bai mi kisim amamas bilong mi yet long ol lo bilong Yu ol i raitim. Bai mi no lusim tingting long tok bilong Yu.

GIMEL

17 ¶ Yu mas mekim pasin i gutpela tru long wokboi bilong Yu, bai mi ken i stap laip na holimpas long tok bilong Yu. 18 ¶ Yu mas opim tupela ai bilong mi, bai mi ken lukim ol samting i winim tingting i stap long lo bilong Yu. 19 ¶ Mi stap long dispela graun olsem man bilong longwe ples. Yu no ken haitim strongpela tok bilong Yu long mi. 20 ¶ Tewel bilong mi i bruk, long wanem olgeta taim em i krai long kisim ol tok long pe bilong kot bilong Yu. 21 ¶ Yu bin krosim ol hambak man ol i stap aninit long kot na ol i save lusim rot bilong ol strongpela tok bilong Yu. 22 ¶ Yu mas tekewe long mi pasin bilong ol i givim sem long mi na tingim mi i samting nating. Long wanem mi bin holimpas long ol testimoni bilong Yu. 23 ¶ Ol hetman tu i bin sindaun na mekim tok birua long mi. Tasol wokboi bilong Yu i bin tingting i stap long ol lo bilong Yu ol i raitim. 24 ¶ Ol testimoni bilong Yu i samting mi laikim na i samting bilong givim tok helpim long mi tu.

DALET

25 ¶ Tewel bilong mi i pas long das. Yu mas givim laip long mi, bilong bihainim tok bilong Yu. 26 ¶ Mi bin tokaut long ol pasin bilong mi, na Yu bin harim mi. Yu mas skulim mi long ol lo bilong Yu ol i raitim. 27 Yu mas mekim mi i save gut long pasin bilong ol strongpela lo bilong Yu. Olsem na bai mi toktok long ol wok i winim tingting bilong Yu. 28 ¶ Tewel bilong mi i gat hevi na i kamap olsem wara. Yu mas strongim mi, bilong bihainim tok bilong Yu. 29 Yu mas tekewe long mi pasin bilong tok giaman. Na long pasin i soim marimari, givim mi lo bilong Yu. 30 ¶ Mi bin makim bilong mi pasin bilong tok tru. Mi bin putim ol tok long pe bilong kot bilong Yu long ai bilong mi. 31 Mi bin pas long ol testimoni bilong Yu. O BIKPELA, Yu no ken mekim mi sem. 32 Bai mi ran i go long rot bilong ol strongpela tok bilong Yu, taim Yu mekim bel bilong mi i kamap bikpela moa.

HE

33 ¶ O BIKPELA, Skulim mi long pasin bilong ol lo bilong Yu ol i bin raitim. Na bai mi holimpas long em inap long pinis. 34 Yu mas givim gutpela save long mi, na bai mi holimpas long lo bilong Yu. Yes, bai mi bihainim em long olgeta hap bilong bel bilong mi. 35 ¶ Mekim mi i go long liklik rot bilong ol strongpela tok bilong Yu. Long wanem mi laikim em. 36 Mekim bel bilong mi i putim ia long ol testimoni bilong Yu na i no ken putim long pasin mangal. 37 ¶ Tanim tupela ai bilong mi na ol i no ken lukim samting nating. Na givim laip long mi long pasin bilong Yu. 38 ¶ Strongim tok bilong Yu long wokboi bilong Yu, em i stap aninit long pasin bilong pret long Yu. 39 ¶ Pasin bilong givim sem i bin kam long mi na Yu mas tanim dispela long lusim mi. Mi pret long en. Long wanem, ol tok long pe bilong kot bilong Yu i gutpela. 40 ¶ Harim, mi bin krai long bihainim ol strongpela lo bilong Yu. Long stretpela pasin bilong Yu, Yu mas givim laip long mi.

VAU

41 ¶ Larim ol sori bilong Yu kam long mi tu, O BIKPELA, yes, kisim bek bilong Yu, bilong bihainim tok bilong Yu. 42 Olsem na bai mi gat samting bilong bekim tok long man i givim sem long mi. Long wanem, mi putim bilip long tok bilong Yu. 43 ¶ Na Yu no ken tekewe olgeta long maus bilong mi tok bilong tok tru. Long wanem, mi bin bilip na wetim ol tok bilong pe bilong kot bilong Yu. 44 Olgeta taim inap long oltaim oltaim bai mi holimpas long lo bilong Yu olsem. 45 ¶ Na bai mi wokabaut long pasin i stap fri. Long wanem mi wok long painim ol strongpela lo bilong Yu. 46 Bai mi toktok long testimoni bilong Yu long pes bilong ol king tu, na bai mi no sem. 47 Na bai mi amamasim mi yet long ol strongpela tok bilong Yu, em mi bin laikim tru ol. 48 Bai mi litimapim han bilong mi tu long ol strongpela tok bilong Yu, em mi bin laikim tru. Na bai mi tingting strong long ol lo bilong Yu ol i raitim.

SAIN

49 ¶ Yu mas tingim gen tok Yu bin mekim long wokboi bilong Yu, Yu bin mekim mi bilip na wet long dispela. 50 ¶ Dispela i save givim bel isi long mi long pen bilong mi. Long wanem, tok bilong Yu i bin givim laip long mi. 51 ¶ Ol hambak man i bin lap nogut tru long mi. Tasol mi no bin lusim lo bilong Yu. 52 ¶ O BIKPELA, mi bin tingim gen ol tok bilong pe bilong kot bilong Yu bilong bipo, na mi bin givim bel isi long mi yet. 53 ¶ Pasin bilong pret nogut tru i bin holimpas mi, long wanem, ol man i nogut tru i givim baksait long lo bilong Yu. 54 ¶ Ol lo bilong Yu ol i raitim ol i bin stap ol song bilong mi long haus bilong mi taim mi stap long longwe ples. 55 ¶ O BIKPELA, mi bin tingim gen nem bilong Yu long nait, na mi bin holimpas lo bilong Yu. 56 Mi bin kisim dispela, long wanem mi bin holimpas ol strongpela lo bilong Yu.

SIET

57 ¶ O BIKPELA, Yu stap hap skel bilong mi. Mi bin tok olsem, Bai mi holimpas ol tok bilong Yu. 58 ¶ Mi mekim strongpela askim long helpim bilong Yu wantaim bel olgeta bilong mi. Sori long mi bilong bihainim tok bilong Yu. 59 ¶ Mi bin tingting long ol pasin bilong mi. Na mi bin tanim ol lek bilong mi i go long ol testimoni bilong Yu. 60 Mi bin hariap, na mi no bin wet long holimpas ol strongpela tok bilong Yu. 61 ¶ Ol lain bilong ol man i nogut tru i bin stilim ol samting bilong mi. Tasol mi no bin lusim tingting long lo bilong Yu. 62 ¶ Long belo biknait bai mi kirap bilong givim tenkyu long Yu, long wanem ol tok bilong Yu long pe bilong kot em i stretpela. 63 ¶ Mi stap poroman bilong olgeta man i pret long Yu na ol man i holimpas ol strongpela lo bilong Yu. 64 ¶ Dispela graun, O BIKPELA, i pulap long sori bilong Yu. Skulim mi long ol lo bilong Yu Yu raitim.

TET

65 ¶ O BIKPELA, Yu bin mekim gut long wokboi bilong Yu, bilong bihainim tok bilong Yu. 66 Yu mas skulim mi long gutpela tingting na save. Long wanem, mi bin bilipim ol strongpela tok bilong Yu. 67 ¶ Taim mi no karim pen yet, mi bin lusim rot. Tasol nau mi bin holimpas long tok bilong Yu. 68 ¶ Yu gutpela, na Yu save mekim gutpela pasin. Yu mas skulim mi long ol lo bilong Yu ol i raitim. 69 ¶ Ol hambak man i bin makim tok giaman long birua long mi. Tasol bai mi holimpas olgeta hap bilong bel bilong mi ol strongpela lo bilong Yu. 70 Bel bilong ol i patpela olsem gris. Tasol mi amamas tru long lo bilong Yu. 71 ¶ Mi bin karim pen na dispela i gutpela bilong mi kisim, bai mi ken kisim save long ol lo bilong Yu ol i raitim. 72 ¶ Long mi, lo bilong maus bilong Yu i winim planti tausen kina bilong gol na silva.

JOD

73 ¶ Ol han bilong Yu i bin wokim mi na putim mi long dispela wok. Yu mas givim gutpela save long mi, bai mi ken kisim save long ol strongpela tok bilong Yu. 74 ¶ Ol man i pret long Yu bai ol i stap belgut taim ol i lukim mi, long wanem mi bin bilip na hop long tok bilong Yu. 75 ¶ O BIKPELA, mi save ol tok bilong Yu long pe bilong kot ol i stretpela. Na long pasin bilong Yu long i stap man mi inap bilip long Yu, Yu bin givim pen long mi. 76 ¶ Larim, mi askim Yu plis, gutpela pasin sori bilong Yu i ken stap bilong givim bel isi long mi, bilong bihainim tok bilong Yu i go long wokboi bilong Yu. 77 Larim ol sori bilong Yu i isi moa kam long mi, inap long mi ken stap laip. Long wanem, lo bilong Yu em i amamas tru bilong mi. 78 ¶ Larim ol hambak man i ken sem. Long wanem, ol i bin mekim nogut long mi, na ol i no gat as bilong en. Tasol mi bai tingting strong long ol strongpela lo bilong Yu. 79 Larim ol man i pret long Yu, wantaim ol man i bin save long ol testimoni bilong Yu i tanim ol yet i kam long mi. 80 ¶ Bel bilong mi i ken stap strong long ol lo bilong Yu ol i raitim, bai mi no ken sem.

KAP

81 ¶ Tewel bilong mi i hap i dai long wetim kisim bek bilong Yu. Tasol mi bilip Yu bai inapim tok bilong Yu. 82 Ol ai bilong mi i laik i dai long wetim tok bilong Yu. Na mi tok, Wanem taim bai Yu givim bel isi long mi? 83 ¶ Long wanem mi bin i kamap olsem botol i stap long smok. Tasol mi no lusim tingting long ol lo bilong Yu ol i raitim. 84 ¶ Ol de bilong wokboi bilong Yu i hamas? Wanem taim bai Yu wokim kot long ol man i givim hevi long mi? 85 ¶ Ol hambak man i bin digim ol bikpela hul bilong kisim mi, dispela i no bihainim lo bilong Yu. 86 Olgeta strongpela tok bilong Yu i stap samting mi inap bilip long en. Ol man i mekim rong long givim hevi long mi. Yu mas helpim mi. 87 Klostu ol i bin pinisim mi long dispela graun. Tasol mi no bin givim baksait long ol strongpela lo bilong Yu. 88 ¶ Yu mas bihainim pasin bilong Yu long laikim tru na mekim gut, na givim laip long mi. Olsem na bai mi holimpas testimoni bilong maus bilong Yu.

LAMET

89 ¶ O BIKPELA, tok bilong Yu i no senis oltaim oltaim long heven. 90 Pasin bilong Yu i stap man ol inap bilip long Yu i stap inap long olgeta lain i kamap bihain. Yu bin sanapim dispela graun, na em i stap. 91 Ol i stap olsem inap long dispela de bilong bihainim ol lo bilong Yu bin makim, long wanem olgeta i ol wokboi bilong Yu. 92 ¶ Sapos lo bilong Yu i no bin stap ol samting mi laikim, orait mi bin dai pinis long ol hevi bilong mi. 93 ¶ I no gat wanpela taim bai mi lusim tingting long ol strongpela lo bilong Yu. Long wanem, Yu bin givim laip long mi long ol. 94 ¶ Mi bilong Yu. Yu mas kisim bek mi. Long wanem, mi bin wok long painim ol strongpela lo bilong Yu. 95 ¶ Ol man i nogut tru i bin wetim mi bilong bagarapim mi olgeta. Tasol bai mi tingim na skelim ol testimoni bilong Yu. 96 ¶ Mi bin lukim pinis bilong olgeta samting i stap inap tru. Tasol strongpela tok bilong Yu i gat bikpela brait tru.

MEM

97 ¶ O, mi laikim tru lo bilong Yu planti! Long olgeta hap bilong de em samting mi tingting i stap long en. 98 ¶ Long ol strongpela tok bilong Yu, Yu bin mekim mi kisim save tru, moa long ol birua bilong mi. Long wanem, ol i stap wantaim mi olgeta taim. 99 Gutpela save bilong mi i winim gutpela save bilong olgeta tisa bilong mi. Long wanem, ol tokaut bilong Yu i stap samting mi tingting i stap long en. 100 Gutpela save bilong mi i winim gutpela save bilong ol lapun, long wanem, mi holimpas ol strongpela lo bilong Yu. 101 ¶ Mi bin holim bek ol lek bilong mi long olgeta wan wan pasin nogut, inap long mi ken holimpas tok bilong Yu. 102 ¶ Mi no bin lusim ol tok bilong Yu long pe bilong kot. Long wanem, Yu bin skulim mi. 103 ¶ Ol tok bilong Yu i swit moa long maus bilong mi! Yes, ol i swit moa long hani long maus bilong mi! 104 Mi kisim gutpela save long ol strongpela lo bilong Yu. Olsem na mi no laikim tru olgeta wan wan pasin giaman.

NUN

105 ¶ Tok bilong Yu em i lam long ol lek bilong mi na lait long rot bilong mi. 106 ¶ Mi bin tok tru antap, na bai mi mekim dispela olsem, Bai mi holimpas long ol stretpela tok bilong Yu long pe bilong kot. 107 ¶ Mi karim planti pen tru. O BIKPELA, Yu mas givim laip long mi, bilong bihainim tok bilong Yu. 108 ¶ O BIKPELA, mi askim Yu long daun pasin, Yu mas orait long ol ofa bilong maus bilong mi i kam long laik bilong mi. Na Yu mas skulim mi long ol tok bilong Yu long pe bilong kot. 109 ¶ Tewel bilong mi i stap olgeta taim long han bilong mi. Tasol mi no lusim tingting long lo bilong Yu. 110 Ol man i nogut tru i bin putim wanpela umben bilong kisim mi. Tasol mi no bin lusim rot bilong ol strongpela lo bilong Yu. 111 ¶ Mi bin kisim ol testimoni bilong Yu olsem samting Papa i givim pikinini bilong holim oltaim oltaim. Long wanem ol i stap amamas tru long bel bilong mi. 112 Mi bin daunim bel bilong mi bilong bihainim ol lo bilong Yu ol i raitim oltaim, yes inap long pinis.

SAMEK

113 ¶ Mi no laikim tru ol tingting i samting nating. Tasol mi laikim tru lo bilong Yu. 114 ¶ Yu stap ples hait bilong mi na hap plang bilong mi. Mi bilip na wet long tok bilong Yu. 115 ¶ Yupela man i mekim pasin nogut, yupela lusim mi. Long wanem bai mi holimpas long ol strongpela tok bilong God bilong mi. 116 ¶ Yu mas strongim mi, bilong bihainim tok bilong Yu i tok, bai mi ken i stap laip. Na Yu no ken larim mi sem long samting mi bilip na wetim. 117 Yu mas holim mi long sanap i stap, na bai mi stap gut. Na olgeta taim bai mi lukluk long ol lo bilong Yu ol i raitim. 118 ¶ Yu bin krungutim olgeta man i lusim rot bilong ol lo bilong Yu ol i raitim. Long wanem pasin giaman bilong ol em i no tru. 119 Yu save daunim olgeta man i nogut tru bilong dispela graun olsem pipia. Olsem na mi laikim tru ol testimoni bilong Yu. 120 Bodi bilong mi i pret long Yu na i guria. Na mi pret long ol tok bilong Yu long pe bilong kot.

AIN

121 ¶ Mi bin mekim stretpela kot na stretpela pasin. Yu no ken lusim mi i stap long han bilong ol man i mekim nogut long mi. 122 Yu mas i stap helpim bilong wokboi bilong Yu bilong mekim gut. Yu no ken larim ol hambak man i givim hevi long mi. 123 ¶ Ol ai bilong mi i laik i dai bilong wetim kisim bek bilong Yu na bilong wetim tok bilong stretpela pasin bilong Yu. 124 ¶ Mekim kain pasin long wokboi bilong Yu bilong bihainim sori bilong Yu, na skulim mi long ol lo bilong Yu Yu raitim. 125 Mi stap wokboi bilong Yu. Yu mas givim gutpela save long mi, bai mi ken save long ol testimoni bilong Yu. 126 ¶ BIKPELA, Em i taim bilong Yu long mekim wok. Long wanem ol i bin mekim lo bilong Yu i kamap samting nating. 127 ¶ Olsem na mi laikim tru ol strongpela tok bilong Yu moa long mi laikim long gol, yes, moa long naispela gol. 128 Olsem na mi tingim olgeta strongpela lo bilong Yu i tokaut long olgeta samting long ol i stretpela. Na mi no laikim tru olgeta wan wan pasin giaman.

PE

129 ¶ Ol testimoni bilong Yu i winim tingting. Olsem na tewel bilong mi i save holimpas long ol. 130 ¶ Taim ol tok bilong Yu i go insait, ol i givim lait. Em i givim gutpela save long ol man i no gat save. 131 ¶ Mi bin opim maus bilong mi na pulim win. Long wanem mi bin krai bilong kisim ol strongpela tok bilong Yu. 132 ¶ Lukluk long mi na soim sori long mi, olsem Yu mekim bipo long ol man i laikim tru nem bilong Yu. 133 ¶ Yu mas stiaim wokabaut bilong mi insait long tok bilong Yu. Na Yu no ken larim wanpela sin nogut i bosim mi. 134 ¶ Yu mas tekewe mi long pasin bilong givim hevi bilong man. Olsem na bai mi holimpas long ol strongpela lo bilong Yu. 135 ¶ Pes bilong Yu i mas givim lait long wokboi bilong Yu. Na Yu mas skulim mi long ol lo bilong Yu ol i raitim. 136 ¶ Ol riva i gat wara i lusim ol ai bilong mi na ran i go daun, long wanem ol man i no holimpas long lo bilong Yu.

TISADI

137 ¶ O BIKPELA, Yu stap stretpela, na ol tok bilong Yu long pe bilong kot em i stret. 138 Ol testimoni bilong Yu, Yu bin mekim strongpela tok long ol, ol i stap stretpela na samting man inap bilip tru long en. 139 ¶ Hatwok bilong bihainim bilong mi em inap long bagarapim mi, long wanem ol birua bilong mi i bin lusim tingting long ol tok bilong Yu. 140 ¶ Tok bilong Yu i klin tru. Olsem na wokboi bilong Yu i laikim tru em. 141 ¶ Mi liklik na ol man i tingim mi i samting nating. Tasol mi no save lusim tingting long ol strongpela lo bilong Yu. 142 ¶ Stretpela pasin bilong Yu i stretpela pasin bilong oltaim oltaim. Na lo bilong Yu i stap tok tru. 143 ¶ Hevi na pen i bin holimpas mi. Tasol ol strongpela tok bilong Yu em ol samting mi laikim. 144 Stretpela pasin bilong ol testimoni bilong Yu i stap oltaim oltaim. Yu mas givim gutpela save long mi na bai mi stap laip.

KOP

145 ¶ Mi bin krai long bel olgeta bilong mi. O BIKPELA, Yu mas harim mi. Bai mi holimpas long ol strongpela lo bilong Yu ol i raitim. 146 Mi bin singaut long Yu. Yu mas kisim bek mi, na bai mi holimpas long ol testimoni bilong Yu. 147 ¶ Mi bin kirap pastaim long tulait i kamap na mi bin singaut. Mi bin bilip na wet long tok bilong Yu. 148 Tupela ai bilong mi i lukluk pastaim long was long nait, bai mi ken tingting i stap long tok bilong Yu. 149 ¶ Yu mas harim nek bilong mi, bilong bihainim pasin bilong Yu long laikim tru man na mekim gut. O BIKPELA, Yu mas givim laip long mi bilong bihainim tok bilong Yu long pe bilong kot. 150 ¶ Ol man i bihainim raskol pasin ol i kam klostu. Ol i stap longwe long lo bilong Yu. 151 O BIKPELA, Yu stap klostu. Na olgeta strongpela tok bilong Yu i tok tru. 152 ¶ Mi tok long ol testimoni bilong Yu olsem, Bipo tru, mi bin save, Yu bin sanapim ol inap oltaim oltaim.

RES

153 ¶ Yu mas tingim na skelim pen bilong mi na helpim mi. Long wanem mi no save lusim tingting long lo bilong Yu. 154 Yu mas toktok long strongpela askim bilong helpim mi, na kisim bek mi. Yu mas givim laip long mi, bilong bihainim tok bilong Yu. 155 ¶ Kisim bek i stap longwe long ol man i nogut tru. Long wanem ol i no wok long painim ol lo bilong Yu ol i raitim. 156 ¶ Ol sori bilong Yu i isi moa i bikpela, O BIKPELA. Givim laip long mi bilong bihainim ol tok bilong pe bilong kot bilong Yu. 157 ¶ Ol man i mekim nogut long mi na ol birua bilong mi ol i planti. Tasol mi no lusim ol testimoni bilong Yu. 158 ¶ Mi bin lukim ol man i kalapim lo, na mi gat hevi. Long wanem ol i no bin holimpas long tok bilong Yu. 159 ¶ Yu mas tingim na skelim pasin bilong mi long laikim tru ol strongpela lo bilong Yu. O BIKPELA, bilong bihainim pasin bilong Yu long laikim tru man na mekim gut, Yu mas givim laip long mi. 160 ¶ Long stat bilong ol samting i kam inap nau, tok bilong Yu i tru. Na olgeta wan wan tok bilong Yu long stretpela pe bilong kot bai i stap oltaim oltaim.

SIEN

161 ¶ Ol hetman i bin givim hevi long mi na ol i no gat as long mekim olsem. Tasol bel bilong mi i pret long tok bilong Yu. 162 ¶ Mi amamas tru long tok bilong Yu, olsem man i painim pinis planti kago bilong pait. 163 ¶ Mi no laikim tru tok giaman na mi les nogut tru long en. Tasol mi laikim tru lo bilong Yu. 164 ¶ Mi save litimapim nem bilong Yu sevenpela taim long wanpela de, long wanem mi tingim ol tok bilong Yu long pe bilong kot. 165 ¶ Ol man i laikim tru lo bilong Yu ol i gat bel isi tru, na i no gat wanpela samting bai bagarapim bel bilong ol. 166 ¶ BIKPELA, mi bin bilip na wetim kisim bek bilong Yu. Na mi bin bihainim ol strongpela tok bilong Yu. 167 ¶ Tewel bilong Mi i bin holimpas long ol testimoni bilong Yu. Na mi laikim tru ol moa yet. 168 Mi bin holimpas long ol strongpela lo bilong Yu na ol testimoni bilong Yu. Long wanem olgeta pasin bilong mi i stap long ai bilong Yu.

TAU

169 ¶ O BIKPELA, Yu mas larim krai bilong mi i kam klostu na i kam long ai bilong Yu. Yu mas givim gutpela save long mi, bilong bihainim tok bilong Yu. 170 Yu mas larim autim bilong askim bilong mi i kam long pes bilong Yu. Na Yu mas helpim mi, bilong bihainim tok bilong Yu. 171 ¶ Maus bilong mi bai i autim tok i litimapim nem bilong Yu taim Yu skulim mi pinis long ol lo bilong Yu ol i raitim. 172 ¶ Tang bilong mi bai i toktok long tok bilong Yu. Long wanem olgeta strongpela tok bilong Yu i stretpela pasin. 173 ¶ Larim han bilong Yu i helpim mi. Long wanem mi bin makim ol strongpela lo bilong Yu. 174 O BIKPELA, mi bin hangre long lukim kisim bek bilong Yu. Na lo bilong Yu em i samting mi amamas tru long em. 175 ¶ Yu mas larim tewel bilong mi i stap laip, na bai em i litimapim nem bilong Yu. Na Yu mas larim ol tok bilong Yu long pe bilong kot i helpim mi. 176 ¶ Mi bin lusim rot olsem sipsip i lus. Yu mas wok long painim wokboi bilong Yu. Long wanem mi no save lusim tingting long ol strongpela tok bilong Yu.