Psalms 143
Wanpela Sam bilong Devit.
1¶ O BIKPELA, Yu mas harim prea bilong mi na Yu mas putim ia long ol autim bilong askim bilong mi. Long pasin bilong Yu i stap man mi inap bilip long Yu na long stretpela pasin bilong Yu, Yu mas bekim tok long mi. 2Na Yu no ken i kam na kotim wokboi bilong Yu. Long wanem long ai bilong Yu i no gat wanpela man i stap laip bai em i kamap stretpela. 3Long wanem, birua i bin mekim nogut long tewel bilong mi. Em i bin paitim laip bilong mi i go daun long graun. Em i bin mekim mi i sindaun i stap long tudak, olsem ol man i bin i dai pinis longpela taim bipo. 4Olsem na spirit bilong mi i laik i dai insait long mi. Bel bilong mi insait em i gat asua. 5Mi tingim gen ol de bilong bipo. Mi tingting strong sampela taim long ol wok bilong Yu. Mi tingting long wok bilong ol han bilong Yu. 6Mi stretim ol han bilong mi i go bihainim Yu. Tewel bilong mi i hangre long Yu, olsem hap graun i drai i hangre long wara. Sela. 7¶ O BIKPELA, Yu mas harim mi kwiktaim. Spirit bilong mi i laik i dai. Yu no ken haitim pes bilong Yu long mi. Nogut mi stap olsem ol man i go daun insait long bikpela hul. 8Long moningtaim Yu mas mekim mi i harim pasin bilong Yu long laikim tru na mekim gut. Long wanem mi putim bilip bilong mi long Yu. Yu mas mekim mi i save long rot mi mas wokabaut long en. Long wanem mi litimapim tewel bilong mi i go long Yu. 9O BIKPELA, Yu mas tekewe mi long han bilong ol birua bilong mi. Mi ranawe i kam long Yu, bai Yu ken haitim mi. 10Yu mas skulim mi long mekim laik bilong Yu. Long wanem Yu God bilong mi. Spirit bilong Yu i gutpela. Yu mas i go pas long mi long hap graun bilong pasin i stretpela. 11O BIKPELA, bilong tingim nem bilong Yu, Yu mas givim laip long mi. Bilong tingim stretpela pasin bilong Yu, Yu mas bringim tewel bilong mi i lusim hevi na i kam. 12Na long sori bilong Yu rausim ol birua bilong mi olgeta, na bagarapim ol olgeta husat i givim hevi long tewel bilong mi. Long wanem, mi wokboi bilong Yu.
Copyright information for
TpiKJPB