Psa 8 | TpiKJPB | STEP | I go long namba wan man bilong wokim musik antap long Gitit, Wanpela Sam bilong Devit ¶ O BIKPELA, Bikpela bilong mipela, nem bilong Yu i nambawan tru long olgeta hap bilong dispela graun! Yu bin putim glori bilong Yu antap long ol heven.

‏ Psalms 8

I go long namba wan man bilong wokim musik antap long Gitit, Wanpela Sam bilong Devit

1 ¶ O BIKPELA, Bikpela bilong mipela, nem bilong Yu i nambawan tru long olgeta hap bilong dispela graun! Yu bin putim glori bilong Yu antap long ol heven. 2 Ol birua bilong Yu i stap, olsem na Yu bin makim strong i kamaut long maus bilong ol liklik pikinini na ol bebi, bai Yu ken pasim maus bilong birua na man bilong bekim rong. 3 ¶ Ol heven bilong Yu i wok bilong ol pinga bilong Yu. Yu bin makim mun na ol sta. Na taim mi tingting long ol dispela, 4 Mi ting, man em i wanem samting na Yu save tingting long em? Na pikinini man bilong man em i wanem samting na Yu save kam lukim em? 5 Long wanem Yu bin wokim em i stap aninit liklik long ol ensel. Na Yu bin putim glori na ona long em olsem wanpela hat king. 6 Yu givim wok long em bilong bosim ol wok bilong han bilong Yu. Yu putim olgeta samting aninit long lek bilong em. 7 Em olgeta sipsip na ol bulmakau man, yes, na ol animal bilong ples gras, 8 Ol pisin bilong skai, na ol pis bilong solwara, na olgeta samting i save raun long ol rot bilong ol solwara. 9 O BIKPELA, Bikpela bilong mipela, nem bilong Yu i namba wan tru long olgeta hap bilong dispela graun!