1Cor 1 | TpjSC | STEP | She Pablo shyrenohãva arykai Jesucristo jy’apostolrã Tũpa kyrã potarã, pente tyryvy Cristo ryheva Sóstenes hãndi apyrỹmarãndu;

1 Corinthians 1

Ñymarãndu

1 She Pablo shyrenohãva arykai Jesucristo jy’apostolrã Tũpa kyrã potarã, pente tyryvy Cristo ryheva Sóstenes hãndi apyrỹmarãndu; 2 opaite Tũpa ryhevare Corintope’õre, pee Tũpa pyhyrõ vekuare henta’ĩrũrã kyamba, hareka opa rupi’õre Ñandeja Jesucristo hee hẽno’iare, haire Ija hareka ñande jyve. 3 Tũpa hareka Ñandeja Jesucristo tiñohẽ pyndyrehe mbai kavikue hareka pyavapy. 4 Shyrorykue ameẽñoĩ pyndyrehe Tũpape, shara Jesucristo rupii maĩkavi pyndyrehe. 5 Hai rupii rãnga Tũpa meẽpe pikatu pijeta verã hareka pikuaa verã heta mbai. 6 Jesucristo ryheva ñee rãnga ñymypyrãtama’ẽ pyndyrykovepe. 7 Hãme rãnga, pyhãrõteripẽĩ Ñandeja Jesucristo oujy verãrã, mba’etyãpope mbai kavikue Tũpa meẽpeva. 8 Kyrãpo hai pynymypyrãta ara opapeve, potãã Ñandeja Jesucristo oujymarã hesha pyndyrehe hekopemba’õrã. 9 Tũpa rãnga sareãhe hai ĩñee meẽva, hai pynyrẽno peii piko hãndi verã pente ñeepe Tay Jesucristo, Ñandeja.

Ñimbijao tũpao retaipi

10 Shyryvyre airurepe, Ñandeja Jesucristo heepe piko verã pente ñeepe hareka avy pijeshatãpi. Kyrãtẽverã, piko pente ñeepe hareka pente pyape. 11 Kyrã hai pee shyryvyre, shara Cloe henta’ĩrũre mbe’uashe, ĩme’ẽ pymbytepe ijakañoĩ’iare. 12 Kova rãnga hai, aipota hai peeva: Ĩme’ẽ heiva pymbytepe “She hai Pablo ryheva”; ĩrũre hei: “She hai Apolo ryheva”; ynga hei: “She hai Pedro ryheva”; yngare heijy: “She hai Cristo ryheva”. 13 Jesucristora opa ñimbija’o? Pablora kurusure mbysavavaha arykai pyndyraihuiterã? Maĩrã, Pablo heepera piñymyngarai? Mba’ety! 14 She avy’a hãndi Tũpa mbavẽã pynymbytepe amyngarairã, koñeĩ Crispo hareka Gayo amyngarai. 15 Hãrã mbavããpo hei, shyreepe ñymyngaraiva. 16 Ãñete amyngarai jyve Estefanas hareka henta ĩrũre, tẽvã shymandu’ãjyhe ĩmera’ẽjy ĩrũre amyngaraiva. 17 Shara Cristo shymondoã apyrỹmyngarai verã, koñeĩ Ñee kaviva ambeu verãĩ, ha’ẽã ñy’ãranduvare rãĩmi aikatu aijetarã, potãã Cristo kurusure manorã vekua pytareii mbaimbava rãĩmirã rãnga. 18 Shara ñee Cristo jukurusu ryheva mba’ẽãshu hai, õñehundi verã kyty oho’iare; tẽvã ohojepevare pevarã hokava ñee hai Tũpa ñymbaikatukue. 19 Kuatia mbyparahava heiva rãĩmi: “Mbaimba kuaava rãĩmipo aheja, opaite hei ijeheva ĩñaranduvare; aheshaka kaviposhu ãrãndukue opaite hei ijeheva mbai kuaavare”. ^{▼▼Isaias 29:14.} 20 Mapera’ẽ heta mbai kuaava? Mapera’ẽ ñee mbypara’ia? Mapera’ẽ katu ijetava? Tũpa rãnga mbaimbava rãĩmi japo ãrãndu ko yvy‘ĩãrẽ’õre. 21 Shara Tũpa ñonoãshu kuaretare yvy‘ĩãrẽ’õ ñy’ãrãndukue rupii kuaashu verã, hai ñy’ãrãndukue heshakavape. Tũpa pyryparekorã mondojepe ĩñee mbe’uava rupii opaite jyrojaheare, ajemaĩ ko ñee hãĩtẽ mbaimbava. 22 Judio reta rãnga pota hesha mbaikavi heshaha verã, tẽvã griegore heka mbaikuaakue; 23 tẽvã ore mbe’uha Cristo ryheva mbysavavaha vekua kurusure. Kova ñee rehe heta Judiore poshyjyre, hãrã haimba Judiovare pevarã mbaimba vekua rãĩmishu kova ñee. 24 Tẽvã Tũpa hẽnovare pevarã Judiore, maĩrã, Griegore, Cristo hai Tũpa ñymbaikatukue hareka ñymbaikuaakue. 25 Tũpa ryheva hãĩtẽ mbaimba vekuava, haikaviteveshi kuaretare ñymbaikuaakue. Tũpa ryheva pyrãtambava rãĩmitẽvã, pyrãtãĩteveshi kuaretare. 26 Shyryvyre pynymanduahe marãrape arykai Tũpa pynyrẽnorã, kuaretare heiva rãĩmi, hetamba’ẽ pymbytepe mbaimba’eite kuaava, hetamba’ẽjy peeva haimba huvishava, maĩrã, karai vasure ryhevare. 27 Tẽvã Tũpa pyhỹrõ kuaretare heishua rãĩmi mbaimba kuaa vekuamire, mymarãka verã heta mbai kuaavare, hareka pyhỹrõ pyrãtamba vekuamire, mymarãka verã pyrãtavare. 28 Tũpa pyhỹrõ kuareta heshahatamba vekua hareka mbaimba kuaavekuamire ẽvã ko yvy’ĩãrẽ, he’ise mba‘ẽrãmba’i vekuamire, kyrãvape mbijiche verã jyroja’ijehevare. 29 Hãme mbaveãpo Tũpa hỹnonde, ĩmere ñymbyvatehe verã. 30 Tũpa rãnga pynymypente hãndi Cristo Jesús, hãrã hai rupii heta mbai pikuaa, ñimbivache, ñandyrykove ky’ã, hareka mbyhepya ñandyrehe ñanynohẽajy verã. 31 Kyrã, heiva rãĩmi Mbyparahavape: Ĩme’ẽ pota jyroja ijehevarã, koñeĩ tiroja ijehe Ñandeja hãndi. ^{▼▼Jeremias 9:23.}