1 Corinthians 10

1Shyryvyre aipotãã pyndysarehe opaite ñanytynondevare opamba ẽẽ reta ãvãpỹtu’ipe, hareka opaitevamba hasa reta yyvasu pyntava. 2Opaite haire ñymyngarai ãvapyntupy hareka yyvasupy ñimi’ĩrũhe verãre Moisés. 3Opaiteva haire hou pentevãĩ ho’uava vate arape’õ, espiritu ryheva. 4Hareka opaite ñymbyupy reta yy espiritu ryheva. Shara haire opaiteva hou reta yy itaivi õhẽva espiritu ryheva mi’ĩrũrevare, hokava hai Cristo. 5Tẽvã, hetamba’ẽjy Tũpa mbyposhykavare; hãme rãnga hetekuere opamba jypysovasĩĩ oho yvy ikoambaipi. 6Opaite kova mbai pyta ñande jahesha verã, potãã jaipota mbai porãmbarã, haire potava rãĩmi. 7Hãrã avy pemombai ta’ãngape, haire japova rãĩmi, kuatiape mbyparahava heiva rãĩmi: “Hãrã tenta ijare vapy karu hareka mby’arete, haivi opa puã jyroky reta ñutũpa retape”. 8Taupe, maĩrã kuimbai avypo haimba ĩme hareka hyreko iko’ijy hãndi, ã’ãmo haire japova rãĩmi, hãrã 23.000 pente arapeĩ opa mano reta. 9Avy ñambyposhyka Ñandeja, heta haire mbyposhykava rãĩmi hareka opa mano mboi shuu retarã. 10Avy pijeta porããpi, ã’ãmo haire japova rãĩmi, hãrã heta opa juka reta Tũpa jokueva, veruva ñymano. 11Hãma kova mbai jehushuare ñanytynondevare pyta ñande jahesha verã, hareka mbyparaha ñanymboi verã jaikova ko ara opaserimavape. 12Hãma rojava hai pyrãta kavima’õva, tirykyje katu mahẽ oajykui. 13Pyarãã ou peãrẽva rãnga ou jyve opava kuaretare ĩãrẽ. Tẽvã Tũpa hai jyrojahahea, hai hejããpo iko pyndyrehe mbai pijepymbahe verã. Tẽvã pyndypya hã’ãmarã Tũpa pynymborypo marãrapo pẽhẽshi hareka pijepyhe. 14Hãme rãnga shyryvyre ahaihuva, pysyryshi ta’ãnga õmombai’iare. 15Aijetape heta mbai kuaavare rãĩmi, hãrã peiipo pypya pimbijetahe ko hai peeva haikavira, maĩrã, porããra. 16Ñaimbyupy kopa ohovasahavarã, hai rupii jahovasapy Ñandeja, ñañymypenteãra hãndi Cristo huvy rupii? Pãhã jaurã, ñañymypenteãra hãndi Cristo hetepe? 17Ñandyretatẽvã, opaiteva pentevaĩ jau pãhã, hãme rãnga ñande hai penteva tyreteĩ. 18Pymaĩhe Israelvare; houva mymba jukahavare hoo me’ẽãva Tũpa pevarã, ñymypenteĩ reta mbai me’ẽãva altar rupii. 19Ha’ẽã rãnga mbai vasuva ta’ãnga, maĩrã soo ta’ãngape me’ẽãva haikaviveva ynga soo retaivi. 20Haiva rãnga hai, Tũpa rojambavare mymba jukahava meẽ ñynoĩrã, meẽshu reta ãñare, ha’ẽã Tũpape, hãrã she aipotãã pente ñeepe pẽĩ hãndi ãñare. 21Katuã rãnga peu Jesucristo jykopaivi hareka mbaiposhyre jykopaivi hãndi; katuã rãnga pykaru Ñandeja ñymesape hareka jyve ãñare ñymesape. 22Maĩrã potara ñambyposhyka Ñandeja? Ñanypyrãtaverashivi?

Opa mba’e pijapova, pijapo Tũpa pemombairã

23Opa mba’eara katu jajapo, tẽvã opa mba’ẽã haikavi. Opa mba’e katu jajapo, tẽvã opa mba’ẽã haikavi japo ñandyrehe. 24Avy jaheka ñandepeĩ haikavi verã, jahekapo jyve ñandapisha haikavishu verã. 25Opaite soo ovendeha’õpe ẽvãre, pe’u, mbaimba pypyrãnduheape pyndypyape mbaikuaakue. 26Shara Ñandeja ña’ãpova hai ko yvy hareka opa mbai ẽẽpyare. 27Jesús jyrojambaterihea mbeupe pykaru hãndi verãrã, hareka pota pehorã, pekua, hareka opava mba’e ñonohandeare he’u, mbaimba perevape, ẽẽva pyndypyape. 28Tẽvã ĩme’ẽ hei pevarã: “Kova soo rãnga hai me’ẽãva ta’ãngape”, avy pe’u, mbeupeva rehe hareka pypya pimbijetava rehe. 29Yngavare pya mbijetaheva rãnga haishu, ha’ẽã pee hai peva. Marãrapo hekyshyhevi ẽẽsheva yngavare pya mbijetaheva rehe? 30She ameẽ ajetekue Tũpape hauva reherãra, marã’ĩrãra mbava ijeta porããpo shyrehe hauva rehe? 31Pykarurã, maĩrã pimbyurã, maĩrã mbai pijapovare, pijapo pemombaivasu verã Tũpa. 32Avy porãmba pyheshakashu Judio retape, Israelitamba retape, maĩrã Tũpa jytũpao ryheva. 33She jyve opa mbaipe ãñehãã opava retape ambyvya verã, hareka ahekãã she pevarãĩ haikavi verã, hetava retape haikavi verã rãnga jyve, ohojepe verã reta jyve.