1 Corinthians 11

1She aikova rãĩmi piko, aikova Cristo rãĩmi.

Marãrapo’i taupere tũpaope

2Shyryvyre shymbyvy’a shara pee pynymandua shyrehe hareka pijapo ñee apyrỹmboiheva. 3Tẽvã aipota pikuaa Cristo hai opaite kuimbaire ñaka, hareka kuimbai hai taupere ñakarã’õ hareka Tũpa hai Cristo ñakarã’õva. 4Pente kuimbai ñaka jasoi ryheve ñymboi’ẽrã maĩrã Tũpa pory’ẽrã, mymarãka ñakarã’õ. 5Tẽvã opaite taupere ñymboirã maĩrã Tũpa pory’ẽrã, jaso’ĩã ñakarã, mymarãka ñakarã’õ; shara ñaka mysãkava rãĩmi. 6Shara pente taupe ñaka mbasoimbaa, haikaviveposhu mysakarã. Tẽvã taupe hesha noti ñakahaa jasyjarã, maĩrã mysakarã, jasoiñoĩpo. 7Kuimbai ñaka jaso’iãpo, shara hai Tũpa hã’ãnga hareka ẽẽhe Tũpa hĩmbipekue, tẽvã taupe ẽẽhe kuimbai hĩmbipekue. 8Shara kuimbai ouãã taupeivi, taupe rãngamba nohẽã kuimbaivi. 9Kuimbai japohããmba arykai taupe rehe, taupe rãngamba japoha kuimbai rehe. 10Hokava rehe rãnga, taupe katu raha jyve ñakare’õ heshaka verã hai huvisharã, Tũpa jokuevare rehe. 11Tẽvã Ñandeja rehe, kuimbai ikoã taupembape, kyrãĩjy taupe ikoã kuimbaimbape. 12Ãñeteara taupe japohamba kuimbaivi, ãñeteĩjy kuimbai oa jyve taupeivi; tẽvã opa mbai ou Tũpaivi. 13Peiipo pimbivache: Haikavira taupe ñymboishu Tũpa ñaka mbasoimbape? 14Ñande rãnga ñandijuhuvii jaikuaa, ñanotipo jyve pente kuimbai ma’ẽĩhe ñakahaa pupukurã. 15Tẽvã taupe pevarã haikavive hejaĩ ñakahaa pupukushurã, shara hova mbikasoipya hendakuepe me’ẽãshu ñakahaa. 16Hãma ĩme’ẽ kova mbai pya’ohombahearã, pikuaapo jyve ore Tũpa jyrojahevare mba’ety rekoha ynga ñymbatysea retaipi jypykuaahava rãĩmi. 17Kova mbai ã’ẽ ambyparape verã, avy’ãã penendie, shara pimbatyva veruãpe haikaviva, koñeĩ porãmbaveĩ verupe. 18Tynonde mbe’uashe jyrojavare pimbatyrã opanda porããpyhevi, hãrã aroja kyrã jehuva. 19Ikoñoĩ rãngapo kyrãvã pynymbytepe, kuaaha verã mbara ãñete haikavi’ẽ Tũpa hỹnonde. 20Kova opa porãmbapeĩva veruva hai, pimbatyrã haiveama Ñandeja jykaru ryheva. 21Shara pykaruma peĩrã ĩme’ẽ ñymytynondeva karu verã, hareka ĩme’ẽ ñymbahyva hareka ĩme’ẽ yngavare kauva. 22Mba’etyrapyre pero pykaru hareka pimbyu verãpe? Marã’ĩrãra pimbijiche Tũpa hoope ñymbaty’õre? Mbaivarapo hai pee? Shymbyhoryrapo hokava? Mba’etyiti rãnga! 23Shara kova meẽshe Ñandeja, hai rãnga hokava apyrỹmboijyvehe: Ñandeja Jesús akua pyhare kyrypoti me’ẽãmahea heky pãhã, 24jy’ajetekue meẽrã, pyseã hareka hei: “Ko’ẽ, pe’u; kova hai shyrete pyndyrehe pyse’ãva; pijapo kova pymandua shyreherã”. 25Kyrãĩjy opama karu retarã heky koparã hei: “Kova kopa hai ñee me’ẽãva py’ahuva ryheva shuruvype, peumarã, pijapo pynymandua shyreherã”. 26Shara peumapẽĩ kova pãhãrã, hareka pimbyumapẽĩpy kova koparã, Ñandeja ñymano pymbeu hai oujypeve. 27Hãma ĩme’ẽ houva pãhã hareka ñymbyuva kopa Ñandeja ryheva hekopemba’ẽ vekuarã, japo mbai porãmba Ñandeja hetere hareka huvyre. 28Hãme rãnga pepenteĩpo maĩhe marãra’ẽ pyape, haivipo hou pãhã hareka tumbusururu vino kopapy’õ. 29Shara pãhã houva hareka ñymbyuva hekope kavimba ryheverã, ha’ii pevarãĩ japo kuaa kavimba’ẽvã Tũpa ña’ãpoteva hoka tyrete. 30Hokava ñimbivache rehe heta’ẽ pynymbytepe ñymbairasyva hareka pyrãtaveamava, hareka a’ãmore mano. 31Hãma ñande ñamaĩkavi ñandijeherã, Tũpa jahembatẽ ñandyrehe verã. 32Tẽvã Ñandeja ñanunuparã, hai ñanymboikavive verã hareka potãã kuareta jyrojambare jahea ñandyrehe hãndirã. 33Hãrã shyryvyre, pimbaty peu verã Ñandeja ryhevarã, piñyhãrõpo. 34Ĩme’ẽ ñymbahy’iarã, tykaru hentape, mahẽ Tũpa nupakui kyrãva ñymbatyva rehe. Yngava maĩnungare opapo ãñono kavikui aha pẽĩvaperã.