1Cor 13 | TpjSC | STEP | Ajemaĩpo opava kuaretare ĩñeepe aikatu aijeta hareka katupo Tũpa jokuevare ĩñeepe aikatu aijetajy, tẽvã ahaihuã yngava retaperã, shy’ova pente hiero mbi‘ipuha’õ, maĩrã maĩnunga parãrãreiva.

1 Corinthians 13

Jyhaihukue añeteva

1 Ajemaĩpo opava kuaretare ĩñeepe aikatu aijeta hareka katupo Tũpa jokuevare ĩñeepe aikatu aijetajy, tẽvã ahaihuã yngava retaperã, shy’ova pente hiero mbi‘ipuha’õ, maĩrã maĩnunga parãrãreiva. 2 Me’ẽã she ambeu’ai iko verãrã, hareka opa aikuaa mbai ñemiãpe’õ Tũpa ryhevarã, hareka opa mba’e aikuaarã, katu ĩme’are jyrojakue my’õmyva yvyturusure, tẽvã apyryraihuãrã, mba’eã she. 3 Opa ãmemeẽshu ĩme’area paveteva retarã, hareka ameẽ shyrete hapyha verãrã, tẽvã apyryraihuãrã, mbaivapeã haikavi she. 4 Pyryhaihuva hasa’asyñoĩ, pyakavi, mbai potaraiã, jyrojaã ijehe hareka potãã ha’epaite. 5 Poryãã ñee porãmbava hareka hekãã hai pevarãĩ, poshyreiiã hareka natuãvaĩjy hai poshykue. 6 Mbyvy’ã hekopemba’õ, koñeĩ mbyvya mbai añeteva. 7 Japyryraihu he’ise opa mbaipe jahasa’asy, jairoja, ñahãrõ, hareka opa mba’e jepyhe. 8 Ãñete jyhaihukue opããpohai, tẽvã iko verã mbe’uava opapokui, ñee kuaahambava opapokui, hareka jyve ãrãndukue. 9 Shara a’ãmoĩ jaikuaa, hareka ñimiñe’ẽha Tũpa potava rãĩmi. 10 Tẽvã vãhẽma ou ara hekope kavi’õrã, ã’ãmo hekope kavimba’õ opapokui. 11 Shyndeiteri’airã, sanjay rãĩmi aijeta, sanjay rãĩmi shypya ambijeta, sanjay rãĩmi ãmaĩ; tẽvã shupukumarã opa aheja sanjay hekokue. 12 Ã’ẽ jaheshakaviãteri, sypeva jykua kavimbapya rãĩmi jykuaakaviã; katy pente arape jaheshakavipokui. Ã’ẽ aikuakaviãteri, tẽvã pente arape aikuaa kavipokui Tũpa, hai opakavi shykuava rãĩmi. 13 Mbahapy’ẽ opamba ryheva; jyrojakue, ñahãrõva hareka jyhaihukue, tẽvã kova mbahapy’ẽvã retaivi haikaviveva hai jyhaihukue.