1 Corinthians 14

Mbai kuaa haikaviva Espiritu Santo meẽva

1Piko jyhaihupe, piñyhãã hareka pipotarai pipity mbai kuaakue Espiritu Santo meẽvare, tẽvã hai ĩãrẽ piñimiñee Tũpa ñymbaikatu ryheve. 2Shara ñee yngavape ijetava, ijetããshu yngava kuaretare, koñeĩ Tũpa pevarãĩ. Shara mba’ety kuaashia, Espiritu Santo rupii ijetahe mbai ñemiãpe’õ. 3Tẽvã Tũpa ñymbaikatukue ryheve ñimiñee’ia, ijeta mupũã verã kuaretare, mykyrẽy hareka mbypya kavijy. 4Ñee kuaahambavape ijetava ijupei ñymypyrãta, tẽvã Tũpa ñymbaikatukue ryheve ñimiñeeva, mypyrãta tũpao. 5Aipotaratẽpo opaĩ pijetapy ñee kuaahambare, tẽvã aipotaveva hai piñimiñee Tũpa ñymbaikatukue ryheve; kova haikaviveshi ijetava ñee kuaahambape, ĩme’ẽ mbeu kavivarã tũpao mupuã verã. 6Hãrã shyryvyre aha peĩvãperã, aijetape ñee yngaivaperã, mbaivaperapo haikavipekui, Tũpa heshakava rupiiã aijetaperã, maĩrã ãrãndu rupii, maĩrã ñee iko verã Tũpaivi ouvare, maĩrã arakuaa rupii? 7Mbopuavare ipukue jyvavyãrã, jaishu mimby hareka arpa; marãrapo jaikuaa mbaivara mbi‘ipuha’ẽ? 8Hãma ñyrãrõpe mimby mbi’ipua kaviarã, mbavarapo õĩkavi’ẽ ñyrãrõ verã? 9Kyrãjyvepe, pijeta kaviãrã, marãrapo kuaaha pyndyhevi pereva? Yvytu pijetapẽĩshua rãĩmi rãnga. 10Heta’ẽ ñee ko yvy’ĩãrẽ, opaiteva reko mbaivara he’ise. 11Tẽvã aikuãã ñee mbaivara he’iserã, she hãĩpo tenta yngaivi ouva ijeta’ẽshea, hareka ijeta sheva hãĩpo jyve she pevarã tenta yngaivi ouva. 12Kyrã jyvepe; shara pipota pipity Espiritu Santo meẽvarã, piñyhãã katu pipity verã opaite maĩnunga mypyrãta verã tũpaope’õre. 13Hãrã ñee kuaambavape ijeta’iare, tirureshu Tũpa tikuaakashu mbaivara he’ise hai hei’õ. 14Shara she ãĩmboi ñee kuaahambaperã, she espirituĩ ñymboi’ẽ; tẽvã aikuãã mbaivara hai. 15Mbaivarapo ajapo? Ãĩmboipo she espiritupe, tẽvã aikuaapo jyve kuaahara mbaivara hai’ãi. Apyrahepo she espiritupe, tẽvã aikuaapo jyve mbaivara apyrahe’ãĩ. 16Nde espiritupeĩ Tũpa rẽmombairirã; marãĩrapo rimboivape rĩñymypente hãndi ndapisha kuãã ndyhevirãme? Katuãpo japo, shara kuãã ndyhevi rereva. 17Ajemaĩpo ndypya haikavi ryhevepe Tũpa rĩmboishu, tẽvã rymykyrẽ’yãpo nyrẽndu’õ. 18Ameẽshu ajetekue Tũpa aijetave pyndyhevi ñee kuaahambaperã; 19tẽvã tũpaope’ãĩrã, haikavivepo aipory 5 ñee kuaahavare, amboi verã jyve yngava retape, 10.000 ñee kuahambava hendakuepe. 20Shyryvyre, piko sanjay rãĩmi, tẽvã avy sanjay rãĩmi pypya pimbijeta, porãmbapepo sanjayre heko rãĩmipi, tẽvã kuareta tarõmava rãĩmimapo pypya pimbijeta. 21Ñee mbyparahava rãnga hei: “Aijetaposhu ko tenta ñee kuaahambape hareka tenta yngaivi ouvare juruipipo; kyrãtẽvã shyrẽnduãpo reta, kyrã hei Ñandeja”. 22Hãma ñee kuaahamba hai pente mbai heshaha verã Jesucristore jyrojambare pevarã, ha’ẽã jyrojavare pevarã. Tẽvã ñee kuareta Tũpa poryva rupii mbeuva hai jyrojavare pevarã, ha’ẽã jyrojambare pevarã. 23Tẽvã Tũpa hoope pimbatypeĩrã, opaiteva pijetapi ñee kuaahambaperã, iche ou haimba pyndyryhevarã maĩrã Jesús jyrojambahearã, he’ĩãrapope pikuakuaambapiva? 24Tẽvã opaiteva piñimiñee Tũpa ñymbaikatu ryheverã, haivi iche pynymbytepe pente Jesús jyrojambahearã, maĩrã kuaambarã, heshapo ijehe mbai porãmba vekua hareka haiteivapo pyrãndu ijupe, kuaa pymbeupeĩvarã, 25kyrã heshakavipo pyaperevare, hãrã ĩñesupo õmombai Tũpa hareka kuaapo ãñete Tũpa ẽvã pynymbytepe.

Haikavive opa mba’e japoha hekope kavi

26Shyryvyre haiva rãĩmi ñamykoĩpĩ verã, pimbatymarã ĩmepo’ẽ pyraheva, ĩrũre katu pyrỹmboi, maĩrã ĩmepo’ẽ mbeuva mbai Tũpa heshakashuva, maĩrã ijetava ñee kuaahambape hareka ĩmepo’ẽjy mbeu kaviva mbaivara he’ise. Tẽvã opaite kova mbai tijapoha piñymypyrãta verã. 27Ĩme’ẽ ñanymbytepe ijetava ñee kuaahambaperã, tijeta mokue, hai heirã mbahapypeve katu’ẽ, tiñyhãrõ hareka pente tymbeu kavi mbaivara hei ñynoĩ reta. 28Tẽvã mba’ety ñañymbytepe pente mbeu kavi verãrã, katu jasakaĩñynoĩ reta tũpaope. Ha’i retai tijeta ijupe hareka Tũpa pevarã. 29Kyrã jyve Tũpa ĩñee mbeu’iare, tijeta mokue, maĩrã mbahapy, hãma ĩrũre tijasaka kavihe hesha verã ñee haira ãñete Tũpaivi ouva. 30Tẽvã ĩme’ẽ haipe vapy’õ vãhẽshu Tũpa ĩñeerã, tynonde ijeta’õ tichirĩrĩ, hareka tyhejashu yngava tijeta, tymbeu, mbeu verã. 31Kyrãrã opaitevapo pepenteĩ piñimiñee Tũpa ñymbaikatukue ryheve, opaiteva pikuaa verã, hareka piñymykyrẽy verã. 32Tũpa ñymbaikatukuepy ñimiñee’ia, ijijokokuapo. 33Shara Tũpa ha’ẽãhai Tũpa opa ñymomohẽvã ryheva, pyavapyva ryheva rãnga hai. Kyrã japo opaite Jesure jyrojavare ñymbatyvaipi. 34Taupere tijasaka hai tũpao retaipi; shara ẽẽãshu hai ijeta verã, Moisés mbypara vekua heiva rãĩmi haire ĩmeretarepo’ẽ. 35Ĩme’ẽ haire pota mbai kuaarã, hentape typyrãndushu ĩmere; shara porãã heshaha taupe ijeta tũpaoperã. 36Pyndyhevira õhẽ Tũpa ĩñe’ẽ, maĩrã peiira vãhẽpe aryka’e? 37Ĩme’ẽ hei ijeheva haiva Tũpa ĩñee mbeu’iarã, maĩrã heiva Espiritu ñonova ñakapy hei verã, kuaapo jyve kova ambyparapeva hai ñeẽ japoa verã Ñandeja ña’ãpova. 38Tẽvã kuaaseãrã, timeĩpo kuãã hai. 39Hãrã shyryvyre, piñyhããpo pymbeu ñee iko verã Tũpaivi ouvare, hareka ĩme’ẽ pota ijetava ñee kuaahambaperã, avy pijocha. 40Tẽvã kapyry pijapo, hareka hendapekavi.