1Cor 15 | TpjSC | STEP | Ã’ẽ shyryvyre, aipota apyrỹmymandu’aka Ñee kaviva ambeupe vekua, hai pymyvãhẽ vekua hareka tãntapeĩheva.

1 Corinthians 15

Cristo kuerajy manovare mbyteivi

1 Ã’ẽ shyryvyre, aipota apyrỹmymandu’aka Ñee kaviva ambeupe vekua, hai pymyvãhẽ vekua hareka tãntapeĩheva. 2 Kova Ñee kaviva rupii pehojepema, tantapẽĩhe ñee ambeupe vekuarã; kyrããrã pyrojareiimbapo. 3 Shara tynonde ãmbeupe, sheteiva me’ẽãshe vekua, hokava hai Cristo mano mbai porãmba jajapo vekua rehe, Mbyparaha vekua heiva rãĩmi, 4 hai ñotỹha hareka kuerajy mbahapy arape, Mbyparaha vekuape heiva rãĩmi. 5 Hareka ijeshakashu Pedro, haivi 12 apostol retape. 6 Haivi 500 rupi ijeshakajyshu kuareta jyrojaheare, hokava retaivi hetateri’ẽ ndei manovare, tẽvã ĩrũre opama mano. 7 Kỹỹma’ẽrã ijeshakajyshu Jacobo, haivi opaite apostol retape ijeshaka. 8 Koñemahea ijeshaka jyveshe, shy’ova sanjay jy’arapemba oava. 9 She rãnga hai apostolre mbytepe mbai’ãĩteveva, hareka ẽẽãny shymbyhea verã apostol, shara ãmoña’ai arykai Tũpa ryhevare. 10 Tẽvã, Tũpa ñymbai kavirãmeĩ ã’ẽ ikoshyhevi apostol, hareka mbai kavikue she pevarã pytareĩã; tẽvã hetaiteve ãmba’aposhi reta, ajemaĩ shembatẽvã, Tũpa rãnga pyakavirã shymbory. 11 Shara haikaviva hai, she maĩrã haire, kyrã mbe’uha, hareka hokava hai pyroja vekua. 12 Tẽvã mbe’uha Cristo mupũ’ãhajyva manovare mbyteivi, hãmera marã’ĩrã ĩme’ẽjy pynymbytepe heiva kuerajymbava manovare? 13 Shara manovare kuerajyvyãrã, akuarã Cristo kuerajyvyãmba jyve. 14 Cristo kuerajyvyãrãmeãra, ñimiñe‘ẽãreimbapo’i, hareka mba’eãpo jyve jyrojakue ĩmepyreva. 15 Kyrãrã ore yrapureiimbapo he’iha Tũpa mynguerajyva Cristo; ãñete kyrããmbapo jehu manovare kuerajyvyarã. 16 Shara manovare kuerajyvyarã, Cristo kuerajyvyamba jyve. 17 Ãñete Cristo kuera jyvyãrã, mba’eã rãngapo jyrojakue ĩmepyreva, pimeteripeĩva mbai porãmbape. 18 Kyrãrã Cristo jyrojaheva mano vekuare, jyvarehama jyvehe. 19 Ñahãrõñaĩva Cristoivi hai ko yvy‘ĩãrẽ’õ tykove pevarãĩrã, ñande haipo kuaretare mbytepe hasa’asyveva. 20 Tẽvã Cristo kuerajy! Kova rãnga ñanymboihe opaite manovare kuerajy handi verã jyve. 21 Shara ñymano icheva rãĩmi pente kuimbai rupii, kyrã pente kuimbai rupii iche jyve manova kuerajyva. 22 Adán rupii opava kuaretare mano, kyrã jyve Cristo rupii opavare kuerajypo. 23 Tẽvã pepenteĩ myhenda: Cristo tynonde’ẽ, haivi Cristo oujymarã, kuerajypo jyve hai ryhevare. 24 Haivipo ou ara japyma verãpe, Cristo opama õhũndi mburuvisha vasure, mbaikatu ĩmereare hareka pyrãtãkue, opa ñono verã Teru ipope, Tũpa ẽvãpe. 25 Shara Cristo mburuvisha vasurãñoĩpo’ẽ opa ñonopeve ipy ipe hyvaishorãreare. 26 Tyvaisho koñemahea õhũndi verã hai, ñymano. 27 Shara Tũpa opa mbaipo ñono Cristo ipy ipe. Hãrã opaiteva mburuvishare ñonohã ipope heirã, he’iseã Tũpa ñonoãjyveva Cristo ipope. Shara Tũpa hai opa mbai ñonova Cristo ipope. 28 Hãma opama Cristo ipope ñonoãrã, haivi Cristo haiva Tyray, iñiñonopo jyvekui Tũpa ipope, shara hai opa mbai ñono hai ipope. Kyrã, Tũpa ha’epaitepokui opa mbaipe. 29 Kyrãrãra, mbaiva japopo manoma vekuare ñymyngaraikava? Manovare kuerajyvyãrã, marã’ĩrãra ñymyngaraikahe reta? 30 Hãmera mbaiva rehepo opa ara õĩhã yryrykove porãmba jehushu verãpe? 31 Shara shyryvyre, opa ara ãĩ shukaha verã. Hokava ãñete, añeteva rãĩmi vy’akue areko pyndyreheva, pirojahe Jesucristo Ñandejarã. 32 Aĩrãrõ hãndi kuimbai rãĩmi Éfesope mymba ñarõ vekua rãĩmiva, mbaivara ãmbijehupy hokava? Mano vekuare kuerajyvyarã, haikavive jajapo ã’ãmore heiva rãĩmi: Jakaru hareka ñaimby’u, paremapo opa ñamano. 33 Avy piñymbytavyka: “Ñañimi’ĩrũheare heko porãmbare, opa myporãã ñandyhevi mbai haikaviva jajypykuava rãĩmi”. 34 Pymaĩ kavipẽĩ hareka avy pijapo mbai porãmbava, shara ĩme’ẽ pymbytepe Tũpa kuaamba’eiteva, kyrã hai pee kova mbai apyrỹmymarãka verã.

Marãrapo kuerajykui mano vekuare

35 Ĩmeñoĩ rãngapo’ẽ pyrãnduva: Marãrapo kuerajy mano vekuare? Marãva tyreterapo ĩmere retakui? 36 Ñypyrãndu mbaimbava, nde rĩñotyva timity tynondepo mano hẽño verã. 37 Rĩñotyva ha’ẽã yvyra hẽño verã, timityĩ rãnga, jaishu trigo maĩrã yngava hãỹ. 38 Tẽvã Tũpa meẽshu hete hai potava rãĩmi. Hareka opaĩ marãrãngatuva timity hetei ĩmere. 39 Ĩme’ẽ opaĩ marãrãngatuva tyro’o; penteva hai kuaretare ho’o, yngavare hai mymbare ho’o, ĩrũre hai vyrare hareka pirare. 40 Kyrã jyve ĩme’ẽ tyrete vate arapeva hareka tyretere yvy‘ĩãrẽ’õ; tẽvã tyrete vate arape’õva mashy’ãkue penteĩ’ẽ, hareka tyrete yvy‘ĩãrẽ’õre yngaivejyshi hai reta. 41 Kuarasy hĩmbipekue rãnga jyvacheã hãndi jasy hĩmbipekue, hareka jasytata retaivi; hãrã jasytatare pepenteĩ ĩmere hendyva rãĩmi. 42 Kyrãpojy vekui mano vekuare opa kuerajyrã; ñotỹha pente tyrete opa ñymbai verãpe, tẽvã kuerajypokui tyrete manoveãma verã ryheve. 43 Tyrete ñotyhã vekua ñanateỹ ñamaĩhe, tẽvã kuerajypo hĩmbipeva ryheve. Opa’ipy ryheve ñotyhã vekua, kuerajypo mbaikatu ryheve. 44 Kuareta hete ñotyhãva rãnga hai yvy ryheva, tẽvã kuerajyvapo hai tyrete vate arapeva. Ĩme rãnga’ẽ tyrete yvy‘iarẽ’õ hareka tyrete vate arapeva. 45 Kyrã hei kuatia mbyparaha vekua: “Kuimbai tynondeva, Adán, japoha hete hykove ryheve”; hãma Adán mokueheva hai, espiritu meẽva tykove. 46 Espiritu vate arapeva rãnga ha’ẽã tynonde ouva, yvy‘ĩãrẽ’õva rãnga tynonde ou, haivi ou vate arapeva. 47 Kuimbai tynondeva rãnga hai yvy ĩãrẽ’õ, yvyivi japoa vekua; kuimbai mokueheva, haiva Ñandeja, hoka hai ara vate’õ. 48 Hãma yvy‘ĩãrẽ’iare, ova kuimbai yvyivi japoha vekua, tẽvã ara vate’õ ova jyve ara vate’õ. 49 Kyrã ñande ñandy’ova kuimbai yvyivi japoha vekua, kyrãpo ñandy’ova jyvekui hokava kuimbai vate arape’õ. 50 Aipota hai pee, shyryvyre, kova tyro’o hareka turuvy ẽẽãposhukui iche verã Tũpa ẽvãpe; shara opareiiva katuãpo jihia opamba verã. 51 Tẽvã aipota pikuaa kova Tũpa ñemiãpereva: Opaitevããpo ñamano, tẽvã opaitevapo ñandyrete ñymy yngaikui. 52 Sapy’ãĩ, ñasapỹvyĩrã hareka jasarekojyva rãĩmipo, mimby koñemahea mbi’ipuamarã. Shara mbi’ipuhapo mimby, hãrã mano vekuare opapo kuerajy, manoveãma verãre. Hareka ñande ñandyrete opapo ñymy yngaikui. 53 Shara kova ñandyrete ñymbaireiiva tekotẽvẽ ñymondepy pente tyrete ñymbaimba verã, hareka kova ñandyrete mano verã, tekotẽvẽ ñymondepy tyrete manoveãma verãpy. 54 Hãma kova ñandyrete ñymbaireiiva ñymondemapy tyrete ñymbaimbarã, hareka ko ñandyrete mano verã ñymondemapy tyrete manoveãma verãrã, haipepo ikokui kuatia mbyparahava hei vekua: “Ñymanokue, opama mambaiha”. 55 Nde ñymanokue, mapera’ẽ nupu’ũcha? Nde ñymanokue, mapera’ẽ nypyrãtãkue? 56 Ñymano pu’ũchakue rãnga hai mbai porãmba vekua, hareka mbai porãmba pyrãtakue hai, ñee mbyparahava. 57 Tẽvã ñamee ñandy’ajete Tũpape, meẽ ñande pyrãtakue jajepyhe verã ñymanokue, Ñandeja Jesucristo pyrãta rupii. 58 Hãma shyryvy ahaihuvare, piñymypyrãta katu pemyimbape, hareka pyrẽĩ pymba’aposhu Ñandeja; shara pikuaa Ñandeja pẽĩ hãndiape pijapova, ha’ẽã pijaporeiiva.