1Cor 16 | TpjSC | STEP | Ã’ẽ aipota aijetahepe kyrypoti mbatyhakava tyryvyre Cristo ryheva kyambare pevarã, pijapo jyve tũpao Galaciape’õre ajapokashua rãĩmi.

1 Corinthians 16

Kyrypoti mbatyava

1 Ã’ẽ aipota aijetahepe kyrypoti mbatyhakava tyryvyre Cristo ryheva kyambare pevarã, pijapo jyve tũpao Galaciape’õre ajapokashua rãĩmi. 2 Domingoma’ẽrã, pepenteĩ timbijiche kyrypoti, hipityva rãĩmi, mahẽ ahamarã ajera pymbatypijykui. 3 Ãvãhẽma aharã amondopokui pee pyrojakatuvare Jerusalénpe kuatia ambyparava ryheve, kyrypoti pymbaty vekua rahape verã Tũpape me’ẽãva rãĩmi. 4 Haikavipoperã ahapove hãndi retakui. 5 Ahapokui peĩvape Corintope, Macedoniaipi ahasamarã, shara haipirãnipo ahakui. 6 Katuara mbovy ara apytakui haipe, hareka katu opa ahasa penendiekui ara ro’ykue. Haivi katuma shymborypikui pota ahavape aha verã. 7 Shara potãã ahasa haipirãmeĩ apyryreshakui, aipota rãnga mbovy ara apyta penendiekui, Ñandeja kyrãma heirã. 8 Tẽvã Éfesope apytapokui Pentecostés jy’aretepeve. 9 Shara õche jypea kavi’ẽshe amba’apo verã, ajemaĩ hetatẽ’ẽ shyreshatambare. 10 Timoteo vãhẽma ohoperã piñyhãã tyvyakui pymbytepe, shara she rãĩmi hai mba’apo jyve Ñandejape. 11 Hãrã avy mbava tyheshatããtoĩkui, pyavapy ryheve pymboryshu, ou verã shyrẽndape, shara ãhãrõ’ãĩ hãndi ñandyryvyre. 12 Ñandyryvy Apolos heta airureshu oho verã pẽĩvãpe yngava ñandyryvyre hãndi, ã’ẽpeve ñateỹ oho, tẽvã ohoñoĩpokui ẽẽmashu oho verãrã.

Ñymarãndu opahea

13 Pingarekokatu, avy peche hareka piñymypyrãta jyrojakuepe. Piñimbypyavasu hareka pitasokatu. 14 Opa mbai pijapova, pijapo jyhaihukue ryheve. 15 Shyryvyre pee pikuaakavi Estéfanas henta’ĩrũre hai tynondeite jyrojava Acayape, hareka haire mboryñynoĩ opaite ñandyryvy jyrojavare. 16 Airurepe pẽĩngatuhe verã kuareta hai rãĩmivare, opaite pyrỹmbory hareka mba‘apo’iare. 17 Avy’aite ai Estéfanas ourã, Fortunato hareka Acaico, hai reta rãnga japo katumba pee pijapova, shara mbyrypẽĩ. 18 Haire shypyape haikavi japo shyrehe hareka kyrãĩ jyvepe. Pingareko kavihe reta. 19 Tũpao Asiape’õre pynymarãndu, Aquila hareka Priscila, hareka jyve opaite Jesús jyrojaheare hai hentape ñymbaty’õre pynymarãndu jyve Ñandeja heepe. 20 Opaite ñandyryvy mondokape marãndu. Piñymarãndu jypytepe, pypya porãmba pimbijetava ryheveãpo pijapo. 21 She Pablo, shepopetei ambyparape kova marãndu. 22 Ĩme’ẽ haihumbava Ñandeja Jesucristorã, toahe Ñandeja ĩñee pohyva! Ñandeja ouserima. 23 Ñandeja Jesucristo tymaĩkavi pyndyrehe. 24 She apyryhaihu Ñandeja Jesucristo jyhaihukuepe. Amén.