1Cor 2 | TpjSC | STEP | Shyryvyre, aha ambeupe Tũpa heshakavarã, aporyã ñee ãrandu ryheva, hareka potããvãĩ perejyshe heta mbai aikuaava.

1 Corinthians 2

Marãra Pablo mbeu Tũpa ĩñee

1 Shyryvyre, aha ambeupe Tũpa heshakavarã, aporyã ñee ãrandu ryheva, hareka potããvãĩ perejyshe heta mbai aikuaava. 2 Hãrã ãĩme’ãĩ pynymbyteperã, koñeĩ aijetahe Jesucristo ryheva, jaishu, manorã vekua kurusure. 3 She rãnga pynynondema’ãĩrã shypyrãtãã, akyje hareka opa aryry. 4 Opa mbai aikuaava rãĩmiiã aha pynymbytepe, aporyã ñee javai’ova, shyrojapi verã. Koñeĩ ahejashu Espiritu Santo heshaka verã ñymbaikatukue, 5 pirojakue piñonohe verã Tũpa ñymbaikatukue, ha’ẽãjy kuaretare ñymbai kuaakuere piñono verã. 6 Tẽvã ñee ãrandu ryheva aporyñoĩhe Tũpa ĩñee kuaa kavimavare, ha’ẽã kuaretare, maĩrã huvishare ñy’ãrãndu, hokava hai oparei verã. 7 Ore mbe’uha Tũpa ñymbai kuaakue ñemiãpe’õ, pente ãrãndu mbamba kuaava, Tũpa myhẽvã vekua aryka’e ndeiteri ko yvy japorã, opa ara pevarã javya verã hĩmbipekuepy. 8 Kova mbai huvishare ko yvy‘ĩãrẽ’õre mba’ety kuaava, shara kuaa retarã mbysavavambatẽ verã kurusure Ñandeja vate arare’õ hĩmbipekue ija. 9 Tẽvã heiva rãĩmi Kuatia mbyparahavape: Tũpa myhẽvãshu opaite haihuvare pevarã, maĩnunga mbavamba heshava, henduva, hareka mbavamba pya mbijetaheva. 10 Tũpa rãnga kova ñanymbykuaaka Espiritu Santo rupii, shara Espiritu Tũpa pyape’õ javai’õ retave opa kuaa. 11 Mbavarapo kuaa kuareta mbaivara pyape’ẽ? Koñeĩ espiritu kuareta pyape’õ kuaa. Kyrã jyve Tũpa pyape’õ koñeĩ Espiritu Santo kuaa. 12 Me’ẽhãã rãnga ñande espiritu ko yvy‘ĩãrẽ’ia, me’ẽã ñande Espiritu Tũpaivi ouva, jaikuaa verã mbai Tũpa ñandyparekorã meẽreii ñandeva. 13 Kova mbai jaijetahe ñee Espiritu ñanymboihea rãĩmi, ha’ẽã ñee kuaretare ñanymboihe vekua. Kyrã ñambeu kavi ñee Espiritu hai ryhevare. 14 Hãma Espiritu Tũpaivi ouva mba’etyrea, ñatẽy hendu Espiritu ryheva, hãrã hai pevarã heihe mbaimba vekua, hareka kuããvãĩjy, shara mba’etyre Espiritu Tũpaivi ouva. 15 Hãrã Espiritu Tũpaivi ouva ĩmereva opa maĩkaviherã, kuaa kavi. Tẽvã Espiritu mba’etyreva katuã maĩkavihe, hareka ẽẽãshu kuaa verã. 16 Kuatia mbyparahavape heiva rãĩmi: Mbavara kuaa Tũpa ñakapy’õva? Mbavara katu mboishu? Tẽvã ñande ĩmejare Espiritu Tũpaivi ouva, hãme rãnga Cristo rãĩmi ñandypya ñambijeta jyve.