1Cor 3 | TpjSC | STEP | Shyryvyre, katuãny aijetape kuaretare kurimba jyrojavare rãĩmi, koñeĩ pyrãtambateriva hareka sanjaymire rãĩmi Cristo rehe.

1 Corinthians 3

Tũpa pevarã mba’apovare

1 Shyryvyre, katuãny aijetape kuaretare kurimba jyrojavare rãĩmi, koñeĩ pyrãtambateriva hareka sanjaymire rãĩmi Cristo rehe. 2 Hãrã javai’ova apyrỹmbo’ẽãhe, javaimbaveĩ ambeupe, shara pyndy’ova sanjaymi kambyĩteri mbyho’uhakava, ha’ẽãjy ho’uava tantava. Hokape katuãteri pikuaa mbai javai’ova, kyrãteripi ã’ẽpeve, 3 shara nde’iave pynypyrãta. Ĩmeteri ã’ãmore pynymbytepe pota ha‘epaite’iarã hareka poshyvarã, pikoteri kuaretare jyrojambare ikova rãĩmi, 4 ĩme’ẽ heiva: She hai Pablo ryheva, ĩrũre hei: She hai Apolo ryheva, kyrãrã pikoteri kuaretare jyrojambare rãĩmi. 5 Hãrã, mbaivara hai Pablo? Mbaivara hai Apolo? Jesucristo jokueva retãĩ rãnga, haire pynymbory rãmeĩ rãnga, pirojahe Jesucristo. Pepenteĩ oreva japo Ñandeja hei oreva japoha verã. 6 She rãnga ãñoty, hãrã Apolo maky jyve, hãma Tũpa mupũã ñotyãva. 7 Hãme rãnga, ñoty’ia hareka maky’ia mba’ẽã hai reta, koñeĩ Tũpa hai opa japova shara mupũã ñotyãva. 8 Hãrã ma‘ẽty’ia hareka ñotyãva maky’ia, mba’ety vateve’õ, jyvacheĩ reta. Pepenteĩpo Tũpa meẽshu retakui japova hepykue. 9 Apolo hareka she, hai Tũpa japovape mboryhareva, pee hai Tũpa ikokue, oo Tũpa mupuãva. Tũpa hai Ija. 10 Tũpa pya kavirã shypyhyrõ ãñono verã oo jypyrã. Hãma ĩme’ẽ oo mupũãheva, tẽvã pepenteĩpo ñyngarekokavihe marãra mupũã, 11 shara mba’etyma oo jypy yngava ñonojy verã ẽẽma vekuaivi, hokava oo jypy hai Jesucristo, 12 hãma ĩme’ẽ oo jypyre mupũãva ita vera ijuva, ita vera tĩĩva, maĩrã ita veravapy, yvyraivi, kapi’i hareka takuarape, 13 Tẽvã japo vekuare pepenteĩpo ijykuaakui ara opamarã; shara tata ryhevepo oukui hoka ara, hãrã tatapo heshakakui mbaivapera ñamupũã oo. 14 Hãrã ĩme’ẽ oo japohava tatajepyãherã, me’ẽãposhukui japova hepykue. 15 Tẽvã japo vekua opa okerã, opareiiposhikui japotẽ vekua. Katy hai ohojepepokui. Tataivi ñyvãhẽ vekua rãĩmi. 16 Pikuãra pee haiva Tũpa jytũpao, hareka Espiritu Santo ikova pyndypyape? 17 Hãrã ĩme’ẽ Tũpa hoo opa mambaivarã, Tũpateivapo jahehekui, shara Tũpa hoo hai kyambava, hãrã pee hai hokava oo. 18 Avy mbava ijupei tiñymbytavy. Ĩme’ẽ pynymbytepe hei ijeheva heta ko yvy‘ĩãrẽ’õ kuaavarã, tiko mbaimba kuaava rãĩmi, hãmepo ãñeteĩte mbai kuaakui. 19 Shara Tũpa pevarã ko yvy‘ĩãrẽ’õ ãrãndu mba’erãveãshu hai. Kuatia mbyparahava heiva rãĩmi: Tũpa itypy ĩñarãnduvare, ha’ei ñono vekuapy. 20 Haivi heijy:
“Ñandeja opa kuaa ĩñarãnduvare pya mbijetarã, hareka mba’erããveãshu hai”.

21 Hãme rãnga avy mbava tiroja ijehe kuaretare japova rehe, shara opa mba’e hai pa’ãpova, 22 ajemaĩpo Pablo, Apolo, Pedro, maĩrã, ko yvy. Ajemaĩpo tykove, ñymano, ara ã’ẽpeva hareka ara ou verã; opaiteva rãnga hai pa’ãpovare. 23 Pee rãnga hai Cristo ña’ãpova, hareka Cristo hai Tũpa ña’ãpova.