1Cor 4 | TpjSC | STEP | Pee rãnga koñeĩpo pere’ore Cristo mboryhareva, maĩrã ñonoha’ore pyrỹmbo’eahe verã Tũpa potava ĩmere vekua ñemiãpe’õre.

1 Corinthians 4

Apostolre japova

1 Pee rãnga koñeĩpo pere’ore Cristo mboryhareva, maĩrã ñonoha’ore pyrỹmbo’eahe verã Tũpa potava ĩmere vekua ñemiãpe’õre. 2 Hãrã ĩme’ẽ japo verã me’ẽãshuarã, tyheshaka marãra katu jyrojahahe. 3 She pevarã mba’ẽã, pere shyrehe verã maĩnunga, maĩrã ĩmerãẽã mburuvisha, katynga sheteiva ãma’ẽã shijehe. 4 Aikuããny ajapora porãmbava, hokava he’iseã mbaimba ĩme’areva. Tẽvã koñeĩ’ẽ Teja katu mãĩ shyreheva. 5 Hãrã avy pymaĩhe papisha Ñandeja ndeiteri oujyrã. Hai oujymarã haipo opa pyrỹmbykuaaka ñemiãpe’õre hareka mbaivara ñandypya ñambijeta jaihe. Hãma Tũpa meẽposhu pepenteĩ, japova hepykue. 6 Shyryvyre, haikavipe verãĩ ambeupe kova, ãñono heshaha verã Apolo hareka she jyve. Hokava hai pee pikuaa verã ore rupii, pijapomba verã hareka peremba verã kuatiape mbyparahama vekuaivi, hareka avy pimbivavy ijuhuvi miñaka’iare. 7 Mbavara niñono yngavare ĩãrẽ? Mbaivara Tũpa me’ẽãteri nde? Hai meẽ nderãra, marã’ĩrãra rirojarihe ndeii opa ripityva rãĩmi? 8 Ã’ẽ opama ĩmepyre pipotavare! Pimoara pikokatuma! Pimoara huvishare rãĩmimapi, pikotẽvemba yryreheva rãĩmi! Ãñeteĩtetena huvisharãpi, ha’ẽrã ikoha verã jyve penendie! 9 She pevarã, ore apostol Tũpa taykue’ãmo ĩrĩñono, jukaha verãĩma’õ rãĩmi, ore rãnga hai ko yvy’ĩãrẽ kuaretare jojeha verã rãĩmi hareka Tũpa jokuevare pevarã jyve. 10 Cristo heiva japohashurã rãnga kuaretare hei yryrehe mbaimba kuaahava. Tẽvã Cristo rupii hei pyndyrehe reta heta mbai pikuaava. Ore rãnga ỹrỹpyrãtãã, tẽvã pee pynypyrãtã. Pee rãnga pyndyraihuha, tẽvã ore yryreshatãã reta. 11 Ã’ẽpeve opa irĩmbahyha, uru’uhe mba’etyvãĩjy mondeha verã, ũrũnupãhã hareka yreroãseve; 12 yrỹkangy mba‘apohate’i irijuperã. Porãmba ijeta oreva, ohovasahaĩshu, yrỹmoñahate’ia, mba’ẽã he’iha. 13 Ijeta porãmba yryrehevare, pyakavi ryheve ijetahashu reta. Ã’ẽpeve ko yvy’ĩãrẽ yryrekoha yty hareka maĩnunga hemby vekua rãĩmi. 14 Ambyparaãpe kova apyrỹmymarãka verã, Apyrỹmboi verãĩ rãnga, shara shyrayre ahaihuva rãĩmi apyryraihu. 15 Ĩmeãratẽpopyre 10.000 kuaretare pynymboihe verã mbai Cristo ryheva, teru rãnga heta’ẽ mba’etyreva. She hai teru pee pevarã, shara ambeupe Ñee kaviva ryheva. 16 Hãme rãnga airurejype she aikova rãĩmi piko verã jyve. 17 Hãme rãnga amondo Timoteo, shyray ahaihuva hareka jyrojaheva Ñandeja. Haipo pynymymandu’akahekui marãra aiko Ñandeja Jesucristo airojaherã, apyrỹmboiva rãĩmi oparupi hareka Tũpare jyrojavare ñymbatyva retaipi. 18 Ĩme’ẽ pymbytepe jyrojama’ẽ ijeheva, moã’ãmo ahaveamapo apyryresharã. 19 Tẽvã Cristo heimarã areãpo aha apyryreshakui, haipepo aheshakui ko jyroja’ẽ ijehevare, añetera haire ĩmere Tũpa ñymbaikatukue. 20 Shara Tũpa ẽvãpe’õ ryheva, ha’ẽã ñee rupiñoĩteva, mbaikatukue ryheve rãnga jyve. 21 Marãra pipota aha apohype? Yvyra ryheverapo aha maĩrã jyhaihukue hareka pyakavi ryhevera?