1Cor 6 | TpjSC | STEP | Ĩme’ẽ peeva ijavy hãndiva yngavare, marã’ĩrãra ohopo jurureshu huvisha pirĩmbivache’ia hekope kavimba’ia, ñono kavijy verã, jyrojavare ẽvãpete oho verã?

1 Corinthians 6

Ñañono kavijy porãmba’ẽvãre ñanymbytepe

1 Ĩme’ẽ peeva ijavy hãndiva yngavare, marã’ĩrãra ohopo jurureshu huvisha pirĩmbivache’ia hekope kavimba’ia, ñono kavijy verã, jyrojavare ẽvãpete oho verã? 2 Pikuããra Tũpa jyrojahevare mbivachepo’ẽ opaite kuareta ko yvy‘ĩãrẽ’õ retarãme? Hãrã ñande ñambivachepokui opaite kuaretarãra, marãrapo pimbivacheã ko ikovare mishĩĩva? 3 Pikuããra Tũpa jokueva retavepo ñande ñambivacherãme? Ñopỹĩñoara hai ko tykovepe’õ! 4 Hãrã ĩme’ẽ pynymbytepe ijavyva kova mbai yvy‘ĩãrẽ’õ ryhevarã, marãrapo piñono haimba jyrojavare, pinimbivache verã? 5 Kyrã hai pee pynymarã verã: Mba’etyra pymbytepe mbai kuaamitẽva maĩhe verã kova jehuva jyrojavare mbytepe? 6 Katura jyrojavare ñymembeu reta pente pirĩmbivache’ia jyrojambahea hỹnonde? 7 Ãñete porã’ãĩte peii piko kaviã ijupi verã. Marã’ĩrãra ryhejaĩñoã ndeteiva ryhasa’asyhe mbai pente jyrojavaivi hekopemba’õ? Haikaviveãrapokui pyma’ẽĩhe pymbytavyharãme? 8 Kyrãtẽ verã, peave pijapo hekopemba’õ hareka pypyrỹmbytavy, hokava pijapo pyndyryvy retare. 9 Pikuããra porãmba japo’iare hipityãpokui Tũpa ẽvãpe’õ ryheva? Avy peii piñymbytavy, Tũpa vapy’õpe icheãpokui kyrãrãĩma’iare, 10 manarõ’iaretambaa, kateỹvaretambaa, kau’iaretambaa, jytaupe’ia retambaa, yngava hapisha ijeta’iheare, hareka pyrỹmbytavy’ivare, kyrãvare mbaveãpo ichekui Tũpa ẽvãpe. 11 Ĩme’ẽ aryka’e pymbytepe kyrã’i vekuare; tẽvã ã’ẽ pyndykyaveãma Ñandeja Jesús heepe hekokavivamape, hareka Espiritu ñanu Tũpa ryheva rupii. 12 Opa mba’e rãnga ẽẽshe ajapo verã, tẽvã opaĩñoã haikavi she; opa mba’e katu ajapo, tẽvã ama’ẽĩãpo kova maĩnungare jepy shyrehe. 13 He’ia rãngajy: “Ho’uava reta rãnga, ñandyrye pevarã, hareka ñandyrye ho’uava pevarã”. Ãñete rãnga hokava, Tũpa opapo mbaikui mokue’õre. Tẽvã ñandyrete ha’ẽã teko kyava pevarã, Tũpa pevarã rãnga hareka Ñandeja hai ñandyrete pevarã. 14 Tũpa mynguerajya Ñandeja Jesucristo, ñande ñanymynguerajypokui hai ñymbaikatukuepy. 15 Pikuããra pyndyrete haiva Cristo hete ryheva? Ahekyraposhi Cristo hete ryheva ãñonohẽ verã taupe heko porãmba hetere? Mba’ety! 16 Pikuãra kuimbai taupe kyrãrãĩma’ia iko’i hãndiva, ikoshi reta penteĩ hetepe? Shara kuatia mbyparahava hei: “Mokue’õre ikoposhi penteva kuaretaĩ”. 17 Tẽvã Ñandeja ñymypente hãndiva, mokue’õre ikoshi reta penteĩva hykovepe. 18 Piñymymbyryshi teko kyavaivi. Opa mbai porãmba vekua kuareta japova, hetereã japo, tẽvã omendambape kyrãrãĩ’iare, hetere japo mbai porãmba vekua. 19 Pikuããra pyndyrete haiva Espiritu Santo hoo, hai ẽẽ pyndypy, Tũpa meẽpeva? Hãrã pyndyrete haiveãma pa’ãpova. 20 Shara Tũpa hepyre pyndy’ova; hãme rãnga pemombaiposhu Tũpa pyndyretepe hareka pyndyrykovepe, hokava reta hai Tũpa ryheva.