1 Corinthians 7

Arakuaa omendamavare pevarã

1Hãma ã’ẽ ambyhovaipope pymbypararã pypyrãndusheva, haikavivepo kuimbai pokoãhe tauperã. 2Tẽvã heta’ẽ kyrãrãĩ’ia retarã, haikavivepo kuimbai hyrekoĩ ĩmererã, hareka taupe ĩme hãndiipo iko. 3Kuimbai japopo, japo verã hyreko hãndi, hareka kyrãĩpo jyve taupe ĩme hãndi. 4Tyreko haiveãma hete ha’i ña’ãpova, shara hokava hai ĩme ña’ãpova, hareka teme haiveãma hete ha’i ña’ãpova, shara hokava hai hyreko ña’ãpova. 5Hãma avypo pere pijupe potamba pypoko ijeheva. Tẽvã mokue ryhevepo piñiñono pente ñeepe, pypokombajy ijehe verã, mbovy ara pimboi verã. Hãma haivi katu pikojy ijupi, mahẽ Satanás pypya hããkui pijyjokoarã hareka pindirityjykui mbai porãmbape. 6Kova arakuaa sheii ameẽpe. Ha’ẽã japoha verã, pijapoñoĩ verã. 7Ãñete aipotatẽpo opaiteva kuimbaire she rãĩmijyree, tẽvã Tũpa pepenteĩ meẽshu japo verã. Penteva yngai japo, yngava yngaivejy, kyrã oho. 8Ndei hyrekovare hareka ĩme manoshiare she pevarã haikavive pyta reta omendambape, she rãĩmi. 9Tẽvã katuã ijijokorã timeĩ tyhekajy ñi’ĩrũrã, shara haikavive ñañimi’ĩrũjy, mahẽ ñanykyrẽ’ỹkue porãã ñandapokui. 10Ñimi’ĩrũmavare ha’ekashu kova mbai, ha’ẽã she, Ñandeja rãnga: Taupe avy typoishi ĩme, 11tẽvã poishirã, avypo heka rekojy yngava, koñeĩpo heka iko kavijy hãndi verã ĩmekue; hareka kuimbai avy typoishi hyreko. 12Yngavare sheiipo haijyshu, ha’ẽã Ñandeja: Ĩme’ẽ ñandyryheva rekoreva pente taupe Jesús jyrojambahearã, hai potaite ikoĩ’i hãndirã, avy typoishi. 13Kyrãĩjy ĩme’ẽ taupe ñandyryheva rekoreva pente jyrojambaarã, tẽvã kuimbai potaite iko hãndirã, avy typoishivi. 14Shara teme Jesús jyrojambahea hyreko rupii kyaveãma, hareka tyreko Jesús jyrojambaheva teme rupii kyaveãma. Kyrããrã pindijapore kyava ryheva retambapo; tẽvã ã’ẽ kyaveãma reta. 15Tẽvã tyreko, maĩrã teme jyrojambaa pota poijyhevirã, typoi. Kyrãrã jyrojava tiindy maĩrã, tykyvy pytajy omendambava rãĩmi, shara Tũpa piniñono pyavapy ryheve piko verã. 16Shara nde taupe, marãira rikuaa, katu rỹmondojepe verã neme? Maĩrã, nde kuimbai, katura rỹmondojepe ndyreko. 17Kyrãtẽ verã pepenteĩ Ñandeja memeẽshuare rãĩmi, hareka Tũpa hẽnova rãĩmi, kyrã tijapo; kyrã japo opaite tũpao retaipi. 18Ĩmera’ẽ pire chĩchĩamashivape hẽnoãva? Kyrãĩ typyta. Ĩmera’ẽ pire chĩchĩambashia hẽnohava? Avy tichĩchika. 19Pire chĩchĩãva mba’ẽã rãnga; hareka kyrãĩjy chĩchĩãmba mba’ẽãjy, koñeĩ haikavive jajapo ñeẽ japoa verã Tũpa ña’ãpova. 20Jypy Tũpa henorã vekua, ẽvã rãĩmipo pepenteĩ pyta. 21Ndokuehareii’iapera nyrẽnoha? Avy ejepy’apy, tẽvã ẽẽ nde rẽhẽjy verãrã, avy javy hokava. 22Shara jokuehareirea hẽnohã jyroja verãrã, ã’ẽ haima pente kuimbai mbaimba jocha’õ, mba’aposhu verã Ñandeja, kyrãi jyve hẽnoãrã jokueharea, ã’ẽ haima Cristo jokuereva. 23Tũpa rãnga hepyre pyndy’ova, hãrã avypo mbava pokuereii’i. 24Hãma, shyryvyre jypyite pynyrẽnoarã pẽĩva rãĩmipo pypyta Tũpa hỹnonde.

Arakuaa omendambateriare pevarã

25Taupe omendambaterivare mba‘ety’are japoha verã Tũpa ryheva ambeushu verãre, tẽvã haiposhu reta, hareka katu piroja shyrehe, Ñandeja meẽshe shyparekorã jyrojaha shyrehe verã. 26She pevarã, haikavive pepenteĩ pyta õĩvã rãĩmi, shara ko ara jahasa jahava pohyiteve oho. 27Ĩmeryre ndyrekorã, avy poishivi; mba’etyryre ndyrekorã, avy heka ndyrekorã. 28Tẽvã omendava japoãpo mbai porãmba, pente kuiñataĩ omendarã, japo’ãĩ jyve mbai porãmba. Tẽvã omendamavare hetapo hasa porãmba vekua, hokava aipotãã pyhasa.

Cristo jyrojaheare iko verã rãĩmi

29Shyryvyre, aipota hai peeva rãnga hai kova: Mbovy araĩma hemby’ẽ ñande. Hãme rãnga omendavare tiko omendambava rãĩmi; 30hãma jaheo’õre, tiko vya’ia rãĩmi; vya’iare, tiko vyamba’ia rãĩmi; mbai ova’iare, tiko mbaimba ĩmereva rãĩmi. 31Hãma maĩnunga ko yvy‘ĩãrẽ’õva pory’iare, tiko pory kavimba rãĩmi; shara ko yvy jaheshañaĩva opaserima. 32Potaitianynga apyryresha pejepy’apymbape. Hyrekombaterivare ñyngarekohe mbai Ñandeja ña’ãpovare, hareka heka marãrapo mbyvyashu. 33Tẽvã hyrekoma’iare ojepy’apyhe mbai ko yvy‘ĩãrẽ’õ hareka marãrapo hyreko mbyvyashu. 34Kyrã mokue hendape jyvavy. Taupe ĩme’ia hareka nde’iave ĩmeva ojepy’apyhe Ñandeja ryheva, shara ky‘ã’ẽ hetepe hareka hykovepe. Tẽvã taupe omendamavare ojepy’apyhe mbai ko yvy‘ĩãrẽ’õre hareka heka marãrapo mbyvya ĩme. 35Ha’ẽã rãngape kova, potãã pijaporã, haikavipe verãĩ rãnga hareka kapyryĩ piko verã, pymba’aposhu verã Ñandeja pikoreiimbape. 36Ĩme’ẽ moã haikavishuva tajy omendarã, kyrẽyma omendarã, haikavimarã, tijapo hesha haikavishu verãrã, timi’ĩme, hokava ha’ẽã mbai porãmba. 37Tẽvã pya mbijeta kaviva, katutẽ japova hai pota japova, haikaviveposhu tajy mi’ĩmeãrã, haikavĩĩjy hokava. 38Kyrã mi’ĩmeva haikaviva japo, hareka mi’ĩmembava haikaviteveva japo jyve. 39Taupe omendava ĩme ĩmeĩteri’irã jypysyteri hãndi; tẽvã ĩme manomarã, hai ẽẽmajyshu yngava potava omendajyhe verã, hai jyve Ñandeja jyrojahearã. 40She pevarã haikavivepo ĩmeãjyrã, hareka aroja ĩme’areva jyve Espiritu Tũpa ryheva.