1Jo 3 | TpjSC | STEP | Pymaĩhe marãra ñandyraihuite Teru, japo ñanymbyheehapy verã Tũpa tay, añete hai ñande! Hãme rãnga ko yvy‘ĩãrẽ’õ ñandykuãã, shara kuããshu reta Tũpa.

1 John 3

Tũpa tayre hareka tajyre

1 Pymaĩhe marãra ñandyraihuite Teru, japo ñanymbyheehapy verã Tũpa tay, añete hai ñande! Hãme rãnga ko yvy‘ĩãrẽ’õ ñandykuãã, shara kuããshu reta Tũpa. 2 Ahaihuvare, Tũpa tayretama rãnga ñande, ajemaĩ ijeshakããteri marãvãrapo ñandekui, jaikuaa Jesucristo ijeshakamarã Hai rãĩmindapo ñande, shara haiteivapo jaheshakui marãvara Hai. 3 Opaite Hai hãrõ’õ reta, ñymbyheko ky’ãpo, hai heko kyamba rãĩmi. 4 Opaite mbai porãmba japo’iare, japoãã Tũpa ĩñeepe heiva, shara mbai porãmba he’ise ñee hendumbaa. 5 Pee rãnga pikuakavi Jesucristo ijeshakamba hekyshi verã kuaretare mbai porãmba vekua, Hai mba’etyre hareka japoã hai mbai porãmba. 6 Hãrã ñymypente hãndiva japoveama mbai porãmba, tẽvã mbai porãmba japo’ia kuãã hareka heshããshu. 7 Shyrayre, avy mbava pynymbytavy, opaite mbai hekope kavi japo’ia heko jyvachema, Jesucristo rãĩmi. 8 Tẽvã mbai porãmbavaĩ japo’ia Ãña ryheva hai, shara õñepyrõaivive Ãña japo mbai porãmbava. Hokava rehe rãnga ou Tũpa Tay, opa mambai verã Ãña japovare. 9 Opaite Tũpa tayre japoveama mbai porãmba, shara Tũpa heko’ẽpy, hãrã katuveãma japo mbai porãmba, shara haima Tũpa tayre. 10 Kyrã ijykuaa mbavara hai Tũpa tayre hareka Ãña tayre, shara opaite mbai haikaviva japombava hareka tyvy Cristo jyrojahea haihumbaa ha’ẽã Tũpa tay. 11 Kova ñee õñepyrõaivive pynymbo’eahe: Jajyhaihupo opaiteva. 12 Avypo jaiko Caín iko vekua rãĩmi, hai rãnga tyvy juka, shara hai Ãña tay. Hareka mbaiva rehera juka? Shara Caín porãmba japo, hareka tyvy japo mbai haikaviva. 13 Shyryvyre, avy hãĩrã pyheshava rãĩmipi kuaretare ko yvy ĩãrẽ’õre pyndyreshatããrã. 14 Ñande rãnga jaikuaa jahasama ñymanoivi tykove kyty, jaikuaa shara jahaihu ñandyryvy retarã. Tyvy haihumbava ĩmeĩteri’ẽ ñymanope. 15 Opaite tyvy mymorãmbava hai puruka’ia, pee pikuaa puruka’ia katuãpo ĩmere tykove opamba. 16 Ñande jaikuakavi Jesucristo jyhaihukue, shara hai meẽ ñandyrehe hykove. Hãme ñandyryvy retare ñameẽpo jyve ñandyrykove. 17 Ĩme’ẽ ikokatuva hesha tyvy mbai mba’etyrearã, mba’ẽã meẽshurã, marãrapo Tũpa jyhaihukue ẽẽ pyape? 18 Shyryvyre, avy ñandijurupeĩ japyryhaihu, añeteape rãngapo japyryhaihu mbai jajapova rupii. 19 Kyrãvape ñande jaikuaa añeteĩtevape ñaĩrã, hãrã kyrãrãpo ñandypyavapyñaĩ Tũpa hỹnonde. 20 Ajemapo ñandypyape’õ porãã ñaniñono, tẽvã Tũpa jyparekokue tivishaveshi ñandypyape’õ, hãrã hai opa kuaa ñandypyape. 21 Shyryvy ahaihuvare, ñandypyapy’õ ñaniñono kavi’ẽrã, jairojañaĩhe Tũpa. 22 Hãrã me’ẽãpo ñandekui opa mbai jairureshuva, shara jajaposhu hai potava hareka jajapo hỹnonde hai mbyvyava. 23 Hãrã hai potava hai kova: Jaroja verã Tay Jesucristo hee hareka jaijyhaihupo opaiteva hai jurure ñandeva rãĩmi. 24 Hãma japova hai heiva, haire ẽẽ ñynoĩhe Tũpa, hãrã haire ẽẽ jyvepy. Kyrã jaikuaa hai iko ñandypyape, Espiritu Santo hai meẽ ñande vekua rupii.