1Jo 4 | TpjSC | STEP | Shyryvy ahaihuvare, avy pyroja opaite hei ijeheva Tũpa rupii ijetava, tynondepo pikuaa kavirãnishu, pyhesha verã añetera hai ĩmere Espiritu Tũpa ryheva. Shara yvy’ĩãrẽ tynyhe Tũpa ĩñee mbeu rã‘anga’iare.

1 John 4

Tũpa tayre añeteva

1 Shyryvy ahaihuvare, avy pyroja opaite hei ijeheva Tũpa rupii ijetava, tynondepo pikuaa kavirãnishu, pyhesha verã añetera hai ĩmere Espiritu Tũpa ryheva. Shara yvy’ĩãrẽ tynyhe Tũpa ĩñee mbeu rã‘anga’iare. 2 Kyrãpo pikuaakui haira Tũpa ijespiritu; opaite kuareta heiva Jesucristo ouva kuareta rãĩmi ko yvy’ĩãrẽ, hokava hai Tũpaivi ouva. 3 Opaite rojambava Jesús kuareta rãĩmi ou vekua, mba’etyre Tũpa ijespiritu; hokava hai Cristo ñymbyvaisho’ihea. Pee pikuama kova espiritu ouñoĩ verã, ã’ẽ ĩmema’ẽ ko‘yvy’ĩãrẽ. 4 Shyrayre, pee rãnga hai Tũpa ryhevare, hãrã pijepymahe Tũpa ĩñee mbeu’ia japureivare shara pỹrãtave hai ẽẽ penendievare ko yvy‘ĩãrẽ’õ retaivi. 5 Hai reta rãnga ko yvy‘ĩãrẽ’õ ryhevare, hãrã haire ijetahe ko yvy‘ĩãrẽ’õre, hareka yvy‘ĩãrẽ’õ ryhevare hendushu haire heiva. 6 Ñande rãnga hai Tũpa ryhevare, hãrã katupo jaikuaa mbavara ĩmere Espiritu añeteva hareka espiritu japuva. Tũpa ryhevare ñanyrẽndupo, tẽvã haimba Tũpa ryhevare ñanyrẽnduãã.

Tũpa jyparekokue

7 Shyryvy ahaihuvare, jaijyhaihupaveĩ rãngapo, shara jyhaihu ou Tũpaivi. Opaite pyryhaihuva rãnga hai Tũpa tay hareka Tũpa kuaashu. 8 Hãma pyryraihumbava Tũpa kuãã, shara Tũpa hai jyhaihu añeteva. 9 Tũpa rãnga heshaka ñande jyhaihu, mbou Tay pentereva ko yvype, hai rupii ĩmẽjare verã tykove opambava. 10 Jyhaihukue añeteva rãnga hai kova: Ha’ẽã ñande jahaihuva Tũpa, hai rãnga tynonde ñandyraihu hareka mbou arykai Tay yvy’ĩãrẽ jukaharã rupii hejahareii ñandyhevi verã mbai porãmba jajapo vekua. 11 Shyryvy ahaihuvare, Tũpa kyrã ñandyraihurã, jaijyhaihupaveĩpo jyve. 12 Mba’etyiteimba Tũpa heshava, tẽvã ñande jaijyhaihurã Tũpateipo iko ñandypyape, hareka hai jyhaihukue jykuaakavi ñandyrehe. 13 Jaikuaa Tũpa hãndi ñaĩva, hareka hai ẽẽ ñandypyy, shara meẽ ñande je Espiritu. 14 Hãrã oretei heshaha, hareka mbe’uha Teru mbouva Tay mondojepe verã yvy‘ĩãrẽ’iare. 15 Ĩme’ẽ heiva Jesucristo haiva Tũpa Tay, ikoma hãndi Tũpa hareka pyapere Tũpa. 16 Ñande jaikuaa hareka jaroja Tũpa ñandyraihuva, shara Tũpa hai jyhaihu añeteva, hareka Tũpa jyhaihukue pyape ĩmereva, Tũpa iko jyvepy. 17 Kyrãrãpo jyhaihu jykuaakavi ñandyrehekui, jakyjeveama verã pirĩmbivacheava jy’arape, shara Jesucristo iko vekua rãĩmi jaiko ko yvy’ĩãrẽ. 18 Jyhaihukue ẽvãpe mba’ety kyje verã, kyrãte verã jyhaihu opa kavi’õ mohẽ kyjekue. Kyje rãnga veru jepy’apy, hoka rehẽĩma kyjeteri’ia katũa pyryraihu. 19 Ñande rãnga jahaihu Tũpa, shara tynonde hai ñandyraihu. 20 Ĩme’ẽ heiva: “She ahaihu Tũpa”, tẽvã tyvy Cristo jyrojahea heshatããrã, japureii’i. Shara tyvy Cristo jyrojahea heshareva heshatããrã, marãrapo Tũpapeĩ haihujy heshamba’õ? 21 Jesucristo heja ñande ko ñeẽ japoa verã: “Tũpa haihuva, tyhaihu jyve tyvy”.