1Pe 1 | TpjSC | STEP | She Pedro, Jesucristo jy’apostol, amarãndu opaite pyhyrõãvare opa momohẽã vekuare, Ponto, Galacia, Capadocia, Asia hareka Bitiniaipi.

1 Peter 1

Kuatia tynonde Pedro mbypara vekua

1 She Pedro, Jesucristo jy’apostol, amarãndu opaite pyhyrõãvare opa momohẽã vekuare, Ponto, Galacia, Capadocia, Asia hareka Bitiniaipi. 2 Opaiteva Tũpa Teru potava rãĩmi pyhyrõãvare Tũpa ñymbaikuaakue rupii. Espiritu Santo rupii pinimbijicheha Tũpa pevarã, ñee pyhendu hareka pijyjoheka verã Jesucristo huvype. Tyvãhepe heta jyhaihukue hareka pyavapy.

Ñyharõ opamba verã

3 Japyraheshu Tũpa Ñandeja Jesucristo Tuu, ñyhãrõ mishĩmbava rupii ñanymby’oa py’ahujy pente ñyhãro opamba verãpe Jesucristo kuerajyva rupii. 4 Pipity verã maĩnunga Tũpa ĩmereva vate arapy, ñymbaimba verã, kyambava maĩrã jipimbava. 5 Pirojaherã, Tũpa ñyngareko pyndyrehe hai ñymbaikatu rupii, pynypyhỹrõ verã, hai myhẽva’õva hareka jyheshakapokui opa arape. 6 Hãme rãnga pee pynytynyhẽpo vya, katu sapy’aiteĩ heta pyhasa’asy. 7 Pirojakue rãnga ita vera ijuva rãĩmi, tatapy mbytykuihava. Jyrojakuepe hasakaviva pyarãã haikaviteveshi hai ita vera ijuva, kỹããpo iko. Kova jyhasa’asy rupii tymbyhaikaviha, tymbyveteha hareka tomomba’eha Jesucristo ijeshaka verã jy’arape. 8 Pee rãnga pyhaihu Jesucristo, pyheshambatẽvã. Hãrã pirojahe ajema ã’ẽ pyheshãã, hareka pyvy’aitetepeĩrã katuã opa pymbeu, 9 shara ĩmemapyre pirojakue pota hipityva, hokava hai ñymondojepe. 10 Tũpa ĩñee mbeu’iare heta pyrãndu hareka mbijeta reta ñymondojepeva ryheva. Hãrã hei reta, Tũpa jy’ajetekue rupii meẽpe verã. 11 Haire õñehããmba pota kuaarã, mbaiperapo hareka marãĩterapo hokava mbai. Cristo jy Espiritu kuaaka maimba arykai ñimiñee’ia retape ndei vãhẽshu retarã, marãrapo Cristo hasa’asy hareka hĩmbipekue katu vãhẽjy. 12 Tẽvã Tũpa opa mbykuaaka reta hoka maĩnunga mbeu jyrevare ha’ẽã haire pevarãñoĩteva, koñeĩ haikavipe verã. Hãrã ã’ẽ kuaaka pe ko maĩnunga ñimiñee’ipe vekua ko Ñee kavivare, Espiritu Santo mboua vekua vate araivi. Kova mbai rãnga Tũpa jokueva retatei pota hesha. 13 Hãme rãnga pyhãrõpo, pyny’ãrãndupo hareka pyharõkuaapo, mbai haikavivare Tũpa meẽpope Jesucristo ijeshakamarã.

Tũpa pota ñandyreko ky’ããshu

14 Tyrayre ñee henduvare rãĩmi, avy pikojy arykai Tũpa ndei pikuarã vekua rãĩmi. 15 Ã’ẽ pikopo heko kyambape, Tũpa rãĩmi heko kyambava pynyrẽnova. 16 Shara Mbyparahava hei: “Yngai pikoshi porãmba vekuare, yngai aikoshiva rãĩmi porãmba vekua”. 17 Pee pyhẽno “Sheru” Tũpaperã, mbivachekava pepenteĩ mbai japova rehe mbavapemba mbivavyva, pikoteri ko yvy’ĩãrẽrã pykyjeposhi Tũpa. 18 Tũpa rãnga pindijorashi pikoreii pẽĩ vekuape pynytynondevare hejape vekuape. Hãrã pee pikuaa kavi, hokava mbyhepyhava ha’ẽã mbyhepyhapya opa ñymbaivapy, ita vera ijuva maĩrã plata rãĩmiva, 19 koñeĩ Cristo huvy haikavivapy, Avisha Ray mambaimbaa, kyambava hareka kapyryva. 20 Cristo rãnga Tũpa rupii pyhỹrõha ndei yvy japoharã vekua, pyndyraihu rupii ijeshakape. 21 Cristo rupii pyroja jyve Tũpa, mynguerajy vekua manovare mbyteivi hareka õmombaishu, jyrojakue hareka ñyhãrõ kuaa tõĩ Tũpa rehe. 22 Ã’ẽ ñee añeteva pijapomarã pyndykyaveãma, Espiritu rupii pijyhaihumapo, hãrã pijyhaihu opaite pente’ovare rãĩmi. Pypya ryheve pijyhaihu. 23 Pee rãnga peajy py’ahuma hareka ã’ẽ haiveãma tuure kuaretava mano verã ryhevavi, koñeĩ manomba verãivi, mbyhykovejy Tũpa hykove’ivaivi hareka opa arape ikova. 24 Kuatia Mbyparahavape rãnga hei: Opaite kuaretare kapii rãĩmi hareka mashy’ãkue yvyra poty rãĩmi ñuuhupi’õ. Hokava ñana jipi hareka yvoty hoky opa oashi. 25 Tẽvã Ñandeja ĩñee hai opa ara pevarã, hãrã kova hai ñee py’ahu mbe’uhapeva.