1Pe 2 | TpjSC | STEP | Pyheja opaite marãrãngatuva porãmba vekuare, japukue, hova mokueva, hapishatambaa, hareka ñee porãmba vekuaivi.

1 Peter 2

Tũpa jyrojahevare

1 Pyheja opaite marãrãngatuva porãmba vekuare, japukue, hova mokueva, hapishatambaa, hareka ñee porãmba vekuaivi. 2 Pyheka kamby kyambava sanjayre hãĩrãã oava rãĩmi, kyrãpo pyheka ñee añeteĩteva Tũpaivi, kyrãrãpo pykuakua peho hareka pehojepekui. 3 Pikuaa rãnga marãra Tũpa pyakavi.

Ita hykoveva

4 Pimbojahe, Ñandeja Jesucristore, ita hykoveva kuaretare mbijiche vekua, tẽvã Tũpa pevarã hai pyhyrõãva hareka mashyãva. 5 Pee jyve, ita hykovevare rãĩmi Tũpa mupuãheva oo Espiritu ryheva hareka pee hai paire kyambaa hokava tũpaope, mymba jukahava espiritu ryheva meẽ verã Tũpa myvãhẽva Jesucristo rupii. 6 Hãme rãnga Mbyparahavape hei: “She añono pente ita Sionpe, ita tynondeva, pyhyrõã vekua hareka hepyva, jyrojaheva ha’eã ñymymarãka verã”. 7 Pee jyrojavare pevarã, hokava ita hepyva, hãrã rojambava pevarã, ita mbijicheva mupuã’iare, ou ikoshi ita jypy. 8 Harekajy: Pente ita mãrẽyva, haire vapihe verã. Hai reta rãnga vapi ñee henduãrã; ñonoha verãre pevarã. 9 Tẽvã pee hai Tũpa pyhyrõva, huvisha vasu jypai, tenta vasu kyambaa, kuareta Tũpa ña’ãpova rupii, mbeu verã Tũpa japo vekua, pynyrẽno pyntuivi pẽhẽ verã hareka piche verã sapeva haikavivape. 10 Aryka’e rãnga ha’eãmbape Tũpa henta’ĩrũ ryheva, tẽvã ã’ẽ haimape Tũpa henta’ĩrũrã; aryka’e mba’ety pyndyparekova, tẽvã ã’ẽ Tũpa pyndypareko.

Piko Tũpa pyndypory verã rãĩmi

11 Shyryvyre airure pee, kuaahambava hareka oho’iva rãĩmi, pijyjokoshi pyndyroo potava, pykove ñyrãrõ hãndiva. 12 Piko kavi jyve Tũpa rojambavare mbyteipi; hãrã ijeta porãmba’i pyndyreheva mbai porãmba pijapopiva rãĩmi, heshajy pyndyrehe mbai kavivaĩrã õmombaipo jyve reta Tũpa. 13 Ñandeja rehe opa mbaipe pijaposhu huvisha yvy‘ĩãrẽ’õre heiva, huvisha vasu maĩrã vateve’õva 14 maĩrã mburuvishare mondova nupa verã porãmba japo’iare hareka mbyhekoviajyshu verã haikaviva japo’iare. 15 Shara kova hai Tũpa potava: Mbai kavivaĩpo pijapo, kuareta mbaimba kuaava hareka mbaimba kuavare mba’etyre verã hei pyndyrehe verã. 16 Piko kuareta mbaimbaa jocha’õ rãĩmi, tẽvã hoka rehe avy pijapojy mbai porãmba. Piko Tũpa jokuereva rãĩmi. 17 Ñee pyhendu opava retape, pyhaihu pyndyryvyre Tũpa hoope’õ, pimoãshi Tũpa. Pijapo mburuvisha vasu heiva. 18 Jokuehareare, opa mbaipe pijaposhu pokue’ia heipeva; ha’eã pya kavivapeĩ hareka horyvape maĩrã poshyva. 19 Tũpa maĩkavihe reta jyrojahevare, mbaimba rehevape hasa’asy hareka jyhasa’asy hasakuava hokava haikavi Tũpa hỹnonde. 20 Hãmera, mbaivara pimbijehupopy ñyhãrõkuape pyhasa’asypi mbai porãmba pijapo vekua rehe? Tẽvã ñyhãrõkuape pyhasa’asy mbai haikaviva pijaporã, hokava haikavi Tũpa hỹnonde. 21 Shara ha’erãmba pynyrẽnoha; Cristo heta hasa’asy pyndyrehe, heshakape marãrapo pypyrõ peho jyve hakuerepy. 22 Hai japoã mbai porãmba, hareka mbavapeã mbytavy. 23 Hehe‘iha’ẽshurã hai mba’eãmba hei, jyvarehareherã mapeãmba porãã ijetashu reta, opaimba heja Tũpa ipope, hekopekavi pirĩmbivacheka’ia. 24 Haiteiva opa raha hetere mbai porãmba kurusure, ñamanoma verã mbai porãmbape hareka haikavivape jaikojy verã. Hai mbyperehavapy pykuerajy. 25 Arykai rãnga avishare kañyva rãĩmipi, tẽvã ã’ẽ peijy jykoty avisha ñyngareko’ihea hareka pyndykove ñyngareko’ihea.