1Pe 3 | TpjSC | STEP | Kyrãmi jyve pee tyrekore, piñyñono pemere ipope ĩme’ẽ pente teme rojambava Tũpa ĩñee, mbaimba heivape, pee pikova rãĩmipo pymbaky jyveshu retakui.

1 Peter 3

Teme hareka tyreko japo verã

1 Kyrãmi jyve pee tyrekore, piñyñono pemere ipope ĩme’ẽ pente teme rojambava Tũpa ĩñee, mbaimba heivape, pee pikova rãĩmipo pymbaky jyveshu retakui. 2 Heshama pyndyreko kavirã hareka pymbyveteshurã. 3 Avy yngavare hesha veraĩ piñymymashyã, opaisharei ijakatuva, ita vera mashyãvapy maĩrã mondeava hehepyva. 4 Katynga pymymashyãpo pyndypya ñemiãpe’õ mbai haikaviva ñymbaimba, espiritu pyryhaihuva hareka pyavapyva ryheva, hokava rãnga haikavi Tũpa hỹnonde. 5 Kyrãmba ñymymashỹã arykai taupe heko kyambare, haire jyrojambahe Tũpa hareka opa mbaipemba japoshu imere heiva. 6 Kyrãmba Sara ñee hendushu Abraham, hãrã henorã heimbashu “sheja”. Hareka pee hai memby kuñare, kyjembape pemere japotẽ verã. 7 Pee jyve temere, piko handi arãndupe, shara pymbyvetepo jyveshu vaso tantambava rãĩmi, tẽvã hairetape Tũpa hei meẽshu verã tykove opamba. Kyrã pijaporã Tũpa hendupo pirurerã.

Cristo jyrojaheare japo verã

8 Koñemahea pikojipive pentepyape, pipareko, pijyhaihu pente’ovare rãĩmi. Pypya kavi hareka avy pijijapo. 9 Avy porãmba japo pyndyreheva, porãmbavaĩ pijapo jyvehe, ĩme’ẽ poshypearã avy ndyposhy jyveshu, kyrãte verã pehovasashu ñeekavipe, shara ha’erã ñanyrẽnoha japity verã ma’ẽãkavi ñandyrehevape, 10 shara: “Hykove pota haihuva hareka ara kavi pota heshava, avy tijeta porããhe yngava hareka avy añetembava tymbeu, 11 tyheja mbai porãmba hãrã tijapo haikaviva. Tyheka pyavapy hareka tiñyhãã tingarekohe. 12 Shara Ñandeja hesare ñono’ẽhe hekopekavi’ia hareka japysare hendu jurureshurã, tẽvã Ñandeja ñymbyvaishohe porãmba japo’iare”. 13 Hãrã, mbavarapo porãmba japo pyndyrehe, potañoĩ pijapo haikavivarã? 14 Tẽvã pyvy’apo pyhasa’asypi mbai hekope kavi’õ pijapopirã, hãma avy pykyjeshi reta hareka pynymyngyje, 15 koñeĩpo, pyndypyaivive pemombaishu Cristo Teja rãĩmi. Tantakatupẽĩ pembohovai verã pyrãnduhape pyharõpeĩva reherã. 16 Tẽvã pijapo peñemomishĩvape hareka ñee henduvape. Piko pypyavapy ryheve, hãrãpo ijeta porãmbahea pyndyreko kavi ĩmepyreva Cristo pirojaherã, ĩñe’ẽkue rehe ñymymarãka retakui. 17 Tũpa kyrã potarã, haikavive jahasa’asyhe mbaikavi jajaporã, porãmba jajapotẽ verã vekuaivi. 18 Cristo manojyve mbai porãmba jajapova rehe. Hai mbai porãmba japombatẽva, ñañarõva rehe hasa’asy, pyndyraha verã Tũpa ẽvãpe. Hai mano hetepe hareka kuerajy Espiritu rupii. 19 Espiritu rupii oho hareka ñimiñeeshu espiritu mbyperesohavare. 20 Haire ñee henduã reta aryka’e, Noé ikoteri’irã, Tũpa ñyhãrõkuaa ryhevepe hãrõtẽva, japohateri’ẽ varko vasurã. Koñeĩ 8 kuareta ohojepe yy rupii. 21 Hareka hokava yy heshaka ã’ẽ japoryva ñaĩmyngarai verã, hai rupii Tũpa ñanymondojepe. Ñymyngarai ha’ẽã mbai kya opama ñandyreteivi hekyva, he’iseĩ mbaikuaakue kyamba Tũpa hỹnonde. Jesucristo kuerajy rupii veru ñande pyrỹmondojepeva; 22 haivi hai jupi vate arape hareka ĩme’ẽ Tũpa jakata kyty. Tũpa jokuevare ĩãrẽve ẽẽ verã hareka opaite espiritu mbaikatu ĩmerevare.