1Pe 4 | TpjSC | STEP | Cristo rãnga hasa’asy ñandyrehe hetepe, hãrã kyrãĩpo peĩ kavi jyve pyhasa’asy verã; shara hetepe hasa’asy vekua, mby’opa mbai porãmba vekuare,

1 Peter 4

Tykove Cristo iko vekua rãĩmi

1 Cristo rãnga hasa’asy ñandyrehe hetepe, hãrã kyrãĩpo peĩ kavi jyve pyhasa’asy verã; shara hetepe hasa’asy vekua, mby’opa mbai porãmba vekuare, 2 pimeĩteripirã pikombaa verã pyndyroo potavape, kuaretare potava rãĩmi, koñeĩ Tũpa potava rãĩmi. 3 Yteñoma arykai vekua rãĩmipi jyrojambare japovape, porãmba jaipykuavape, mbai potakuepe, ka’u hareka karuvasu ñymyngyapyvare, hareka javaite õmombai reta ta’angarei vekuare. 4 Ã’ẽ, pikoveãma hãndi reta heko porãmbaperã, haire porãã hesha reta, hãrã ijeta porãã pyndyrehe. 5 Tẽvã haire ñymbeupo Tũpape, ñymyhẽvã’õ mbivache verã ĩmeĩteri’iare hareka mano vekua retape. 6 Mano vekua retape rãnga mbe’uha jyve Ñee Kaviva, ajemaĩ ẽẽteshu manoñoĩ verã opaiteva kuaretare rãĩmi, ã’ẽ ikopo reta opa ara Tũpa handi jy’espiritupy. 7 Kooĩma’ẽ ara, opa mbai opa verãpe. Hãme rãnga, pyndypyareheiipo hareka pimboi katupo. 8 Opa mbai ĩãrẽ pijyhaihu, shara jyhaihukue ẽvãpe heta hejahareiishi mbai porãmba japo’iare. 9 Pymyvãhẽkavishu yngavare pynyrẽtape, avy pijeta porããhe. 10 Tũpa meẽpe espiritu ryheva mbai kuaakue pijapo verã. Pipory kavi jyvehe yngavare Tũpa pyakavikue ẽvã rãĩmi. 11 Ĩme’ẽ ñimiñee’iarã tijeta Tũpa ijeta’õva rãĩmi. Ĩme’ẽ pyrỹmboryvarã tijapo pyrãtakue Tũpa meẽshuvapy. Opa pijapova, pijapo Tũpa õñemombaishu verã Jesucristo rupii, hai ña’ãpova rãnga ñemombaivasu hareka mbaikatu opa ara pevarã. Amén.

Javy’ãĩ jahasa’asyñaĩrã

12 Shyryvyre, avy pyndysapya tata pynyhã’ãhapyva, mbai jehupeva rãĩmi pyhãrõmbavape. 13 Kyrãte verã, pyvy’ãĩ Cristo hasa’asyva rãĩmi pyhasarã, pynytynyhẽ verã jyve vya hai ijeshakama opa hĩmbipekue ryheverã. 14 Pyvy’ãĩpo hehe‘iha’ipe Cristo heeperã, shara Tũpa jy’espiritu hĩmbipe opa ara ẽẽ penendie. 15 Ĩme’ẽ hasa’asyvarã, ha’eãpo puruka’irã rehe, manarõ maĩrã porãmba japo’ia maĩrã kuaakavimbape ichepareiva. 16 Tẽvã hasa’asy Cristo jyrojaherã rehe, avypo mymarã; koñeĩ typyraheshu Tũpa kova rehe. 17 Vãhẽma ara pirĩmbivachehava iko verãpe Tũpa ryhevare mbytepe. Hareka õñepyrõ ñandyreherã hareka kyrã ñanymbyhasa’asyrã, marããtepo opakui Tũpa Ĩñee Kavi hendusemba’iare? 18 Hareka hekokaviva hasype ohojeperã, mbaivarapo ikoshi ñañarõvare hareka mbai porãmba japo’iare? 19 Kyrã opaite hasa’asyvare Tũpa potava rãĩmi, tiñymeẽ jyrojape Tũpa japo vekua ipope hareka tijapo haikaviva.