1Th 2 | TpjSC | STEP | Shyryvyre, pee pikuaa kavi ohoareĩã pẽĩvaperã.

1 Thessalonians 2

Pablo japova Tesalonicape

1 Shyryvyre, pee pikuaa kavi ohoareĩã pẽĩvaperã. 2 Hãma pikuaajy tenta Filipope heta poporãã he’iha ore hareka yryrekoha’asy, tẽvã Tũpa ỹrỹmbory mbe’uhape verã Ñee kaviva, pyavasu ryheve hareka ajemaĩ heta’ẽ pya ohombaheva. 3 Shara ore mbe’uharã añetevaĩ mbe’uhape, javyhambape, haimbajy porãmbape mbai japohava, hareka mbavapembaa pota mbytavyhava. 4 Kyrãtẽverã, ijetaha kuimbai Tũpa mbyhaikaviva rãĩmi hãrã ĩrĩñono mbe’uha verã Ñee kaviva, hãma hokava hai japohava. Ha’ẽã kuaretare pota pya oho yryreherã, koñeĩpo Tũpa, opa kuaava ñandypyape’õ. 5 Pee pikuaa, penteã mbai mypoporãhãrei mbe’uha, hareka pymbytavyhãã pota kyrypoti hekyha’i pyhevirã. Tũpa rãnga opa kuaa hokava. 6 Mapeã hekaha orẽmomba’eha verã, pyndyhevi maĩrã yngava retaivi, ajemaĩ ore Cristo jokuevare õĩtẽ jururehape verã yrỹmborypi verã, tẽvã japohãã. 7 Kyrãtẽ verã, kapyry ñyngarekoha pyndyrehe, tesy membyre ñyngareko kavihea rãĩmi. 8 Pyndyraihuhaiterã, ha’eã Tũpa Ĩñee Kavi mbe’uhapeveĩpea, yryrykoveave rãnga me’ẽhã pyndyrehe, shara pyndyraihuhaite. 9 Shyryvyre, pymanduapohe marãra pohy mba’apoha hareka opa ỹrỹkangy. Mba’apoha arakuepe hareka pyharekue potãã pyndyreheĩñoĩte õĩhã kyrypoti pymeẽ ore verãrã. Jichepeĩ mbe’uhatẽpe Tũpa Ĩñee Kaviva. 10 Pee pikuaa kavi hareka Tũpa jyve, marãra pirojava mbytepe yryrykove ky’ã, hekope kavi ikoha, hareka mba’ety he’iha yryrehe verã. 11 Pikuaajy, pepenteĩ pynymykyrẽ’ỹha hareka pynymbypy’a kavijy, pente teru tayre japoheva rãĩmi, 12 hareka jururehajyvyĩpe Tũpa ryhevare ikova rãĩmi piko verã, hai vapy’õpe pynyrẽno hareka hĩmbipevape hai ẽvãpe. 13 Hãme rãnga me’ẽhãñoĩ yry’ajetekue Tũpape, shara pee pyhendu Tũpa ĩñee mbe’uhaperã, hareka pymyvãhẽ kavi ha’eã kuareta ĩñee rãĩmi, ãñete rãnga hai Tũpa ĩñee, hareka jyrojahevare my’yngaijy ikova rãĩmi. 14 Shyryvyre, tũpao Judeape’õre japovare rãĩmikatĩĩ, pijapo jyve. Hai reta rãnga õmombaimba jyve Tũpa hareka ñymypenteĩmba hãndi reta Cristo Jesús, shara henta ĩrũ retaimba mbyhasa’asy jyre. Kyrã jehu jyvepe. 15 Hokava Judio reta rãnga juka Ñandeja Jesús, hareka Tũpa ĩñee mbeu’iare arykaivare, hareka opa ỹrỹmohẽ reta. Japoã reta Tũpa potava, hareka opava kuimbaire ñymbyvaisho jyrehe, 16 hareka yryrejãã mbe’uhashu verã Ñee kaviva haimba Judiovare ohojepe verã reta jyve. Kyrã mbyhetave reta mbai porãmba japo vekuare. Tẽvã Tũpa jahemahe retarã javaitepokui.

Pablo kyrẽy oho maĩjyhe Tesalonicape’õre

17 Tẽvã pee shyryvyre, ajemaĩ kỹmii syryha pyndyhevi, mandu’aha kaviñoĩ pyndyrehe hareka ỹrỹkyreỹ ohoha pyndyreshahajy. 18 Potate ohoha vãhẽhajype, she Pablo hetama potate aha, tẽvã Satanás irijocha. 19 Shara, mbaivara katu hãrõhã’ẽ, ỹrỹmbyvyava, hareka jyrojahahe verã Ñandeja Jesús oujymarãme? Ambe’uãperã, mba’etypojy yngava. 20 Pee rãnga hai yryrykove hĩmbipekue hareka ỹrỹmbyvyava.