1Th 4 | TpjSC | STEP | Ã’ẽ, shyryvyre jurureha hareka pymykyrẽ’ỹha Ñandeja Jesús heepe; pupuãve pekua opa ara teko haikavivape pikuava rãĩmi, pymbyvya verã Tũpa, pijapoma pẽĩva rãĩmi.

1 Thessalonians 4

Tykove Tũpa mbyhoryva

1 Ã’ẽ, shyryvyre jurureha hareka pymykyrẽ’ỹha Ñandeja Jesús heepe; pupuãve pekua opa ara teko haikavivape pikuava rãĩmi, pymbyvya verã Tũpa, pijapoma pẽĩva rãĩmi. 2 Pee rãnga pikuama pijapo verã, me’ẽãpe vekua Ñandeja Jesús ñymbaikatu rupii. 3 Shara Tũpa potava hai tykove kyambava, hareka avypo mbava javasa’i, 4 pepenteĩ tĩngarekohe hete, heko kyambape hareka mbyvetevape. 5 Avy piko pyndavasapi hareka porãmba pipota pijapo, kuareta Tũpa kuaambare rãĩmi. 6 Avy mbava kova mbai rehe tijapo mbai porãmba hareka tymbytavy hapisha, shara Ñandeja purũnũpa kova mbai rehe, pyndyrykyjehava rãĩmi. 7 Shara Tũpa ñanyrẽnoã ñandyrykove ñamyngya jai verã, ñandyreko kavi verãĩ rãnga. 8 Hãrã mbijicheva ko pyrỹmbo’eahea, mbava kuimba’epeã mbijiche, Tũpateiva rãnga, meẽpe vekua je Espiritu Santo. 9 Jyhaihu ryheva ambyparããnype kuatia, shara Tũpateiva pynymboihe marãrapo pepenteĩ pijyhaihu. 10 Kyrã rãnga pijapohe opaite pyndyryvyre ẽẽva tenta Macedoniape. Tẽvã jururehajype shyryvyre pijyhaihukue tupuãve toho opa ara. 11 Peñehãã piko kavi hareka pijapo peii pijapo verã, pymba’apova rupii, jurureapeva rãĩmi. 12 Kyrãrãpo mbai vasuva rãĩmi pindijapo haimba ñandyryhevare, hareka ĩmeñoĩpopyre maĩnunga.

Ñanderu Jesucristo ou verã jy’arape

13 Shyryvyre, potãã rãnga pypyta pikuambape mbaivara ikoshi manovare, mahẽ pyvy’ãã jyve, mbaimba hãrõ’õre rãĩmi. 14 Kyrã jarojava rãĩmi Jesús mano hareka kuerajya manovare mbyteivi, kyrãĩ jarojajy Tũpa mbyhykovejy verã Jesús hãndi; jyroja ryheve mano vekuare. 15 Hãrã he’iape, Tũpa pyrỹmboiva rãĩmi, ñande ñandyrykoveteri jaiva Ñanderu oujypeve, ñañymytynondeaposhi mano vekuare. 16 Shara hỹnatupo iñyhendu pente ñee, Tũpa jokueva ĩñee hareka ñimimby ipukue, hãrã vate araivi Tũpateivapo vejy. Hãma Cristore jyrojava mano vekuare, hai reta rãnipo kuerajy; 17 haivi, ñande ñandykoveteri jaiva, ñandyrahapo hãndi ãvãpyntupy, jajyhesha hãndi verã Ñandeja vate arapy, kyrãpo ñaĩme hãndi Ñandeja opa ara pevarã. 18 Hãrã kova ñee rupii piñymykyrẽy.