1Ti 1 | TpjSC | STEP | She Pablo, Jesucristo jy Apostol Tũpa ñonova rupii ñanymondojepeva hareka Ñandeja Jesucristo ñahãrõñaĩva pota rupii,

1 Timothy 1

Pablo mbyparashu kuatia Timoteo

1 She Pablo, Jesucristo jy Apostol Tũpa ñonova rupii ñanymondojepeva hareka Ñandeja Jesucristo ñahãrõñaĩva pota rupii, 2 ambypara ko kuatia Timoteope, ãñeteĩte shyra’yrã ‘area jyrojakuepe. Airureshu Tũpa hareka Ñandeja Jesucristo tiñono ndyrehe mbai kavikue, jyparekokue, hareka pya vapy.

Pimoãshi pyrỹmbo’eaheva porãmbava

3 Ndeiteri aha tenta Macedonia kytyrã, airure nde rypyta verã tenta Éfesope, rijocha verã opaite haipi yngaiva pyrỹmboi’iheare ỹnteñoma kyrã japo verãre, 4 avy jasakahe ñeereiiva tãkaivi nohẽãva, hareka ñee aryka’evare mbeu vekua opambava ryheva. Kova mbai rãnga opa pirĩmbyvavy ñeepe, jairoja rupii Tũpa potava jajapotẽ verã vekua. 5 She rãnga hai nde kova mbai ẽẽ verã jyhaihukue ouva pya kyambaivi, pya kavivaivi, hareka jyrojakue añetevaivi. 6 Tẽvã ĩme’ẽ pynymbytepe syryva kova mbaivi, ñee mbaimba vekuaĩ japo’i. 7 Kyrẽy ikoshi reta Moisés mbypara vekua pyrỹmboi’iheare, kuaamba ryheve heivare hareka my’ãñeteĩte haire pyrỹmboihea. 8 Jaikuaa rãnga Moisés mbypara vekua haikavirã, hekopekavi poryharã. 9 Jaikuaajy Moisés mbypara vekua japohãã heko kavivare pevarã, koñeĩ heko porãmbare, ñee hendumbare, mbaimba kuaasevare hareka mbai porãmba japo’iare, Tũpa jyrojambaheare maĩrã ohoahea mbaimbashuare, jukava tuu maĩrã ishy hareka opaite puruka’iare pevarã rãnga. 10 Omendape kyrãrãi’iare hareka kuimbai jytaupe’iare, pirĩñomi’iare, japuvare hareka ĩñee meẽrei’iare pevarã. Kyrã Moisés mbypara vekua ẽẽ opa mba’e mbai porãmba japova pevarã hareka puãheva pyrỹmbo’eahea haikaviva. 11 Pyrỹmboiva rãĩmi Ñee kavi mbaikatuva Tũpa ña’ãpova, me’ẽhããshe vekua ambeu verã.

Mbai kavikue Ñandeja meẽshuva Pablo

12 Ameẽshu shy’ajetekue Ñandeja Jesucristo shymypyrãta’iva, jyroja shyreherã hareka shiñono amba’aposhu verã. 13 Ajemaĩ aryka’e poporãã aijetahe, ãmoña’are hareka ajahe arehe jyrojaheare. Tẽvã Tũpa shyparekomba, shara airojããteri, hãrã aikuãã ajapo’aiva. 14 Tẽvã Ñandeja ñymbai kavikue tivishave ou sheãrẽ, jyrojakue hareka jyhaihukue ryheve, Cristo Jesús rupii katu ĩmẽjareva. 15 Kova ñee rãnga hai añeteva, hãrã opaiteva kuaretare katu roja: Jesucristo oumba aryka’e yvy’ĩãrẽ kuareta mbai porãmba japo’iare mondojepe verã, haire mbytepe she hai heko porãmba’eiteveva. 16 Tẽvã Tũpa shypareko, Jesucristo heshaka shyrehe verã tynonde ñyharõkuaa hareka shypory verã ma’ẽãhe verã rãĩmi opaite jyrojahe verãre pevarã, hipity verã jyve tykove opambava. 17 Hãrã ñamombaivasu hareka ñambitivishañoĩpo Mburuvisha vasu opambava, manombava, katumba heshahava, hareka Tũpa koñeĩ’õ ikova opa ara! Amén. 18 Nde Timoteo, shyray, aheja nde kova rijapo verã iko verã he’ia ndyrehe vekua rãĩmi Tũpa heepe, hekope kavi rĩrãrõhe verã, rirojakuepe hareka pya kyamba ryheve, 19 reko katu ndijehe jyrojakue hareka pya kavi. Shara ĩme’ẽ mbijiche ijuhuviva pya kyamba, hãme rãnga javy hai jyrojakuepe. 20 Kyrã jehushu Himeneo hareka Alejandro, hokavare Satanape opa ameẽ kuaa verãre marãrapo ijeta kavĩĩhe Tũpa.