1Ti 2 | TpjSC | STEP | Tynondeite, tirureha’asyhe, timbo’eahe, tirureahe opaiteva kuaretare, hareka tyme’ẽãshu vy’akue opaiteva kuaretare rehe,

1 Timothy 2

Ñymboi ryheva

1 Tynondeite, tirureha’asyhe, timbo’eahe, tirureahe opaiteva kuaretare, hareka tyme’ẽãshu vy’akue opaiteva kuaretare rehe, 2 tirurehahe opaite huvisharã’õre hareka opaite mbai miñaka’õre, jaiko verã pya vapype hareka ñyrãrõmbape, tykove mbijicheavape Tũpa pevarã hareka ñee ñahendushu Tũpa. 3 Shara kova hai haikaviva hareka mbyvyava Tũpa Ñanymondojepeva, 4 shara hai pota opaite kuaretare ohojepe, hareka kuaa kavive añeteva ryheva. 5 Tũpa rãnga penteĩ’ẽ, hãrã penteĩ’ẽjy mbi’iko kaviva kuaretare Tũpa hãndi, Jesucristo kuaretaĩva jyve. 6 Jesucristo meẽmba hykove hareka manomba opava kuaretare mbyhepyrã mondojepe verã, hãrã kova mbe’uhava jy’arape kavi ijeshaka. 7 Ha’ẽrã rãnga shiñonoha añimiñee’ai verã hareka Apostolrã, hejahashe amboi verã jyrojakue ryheva hareka mbai añeteva ryheva, opaite Judiomba retape. Añetevape hai kova, ha’ẽã shapuva. 8 Hãme rãnga aipota kuimbaire oparupi timbo’e tuhupi ipo kyambava, poshymbape maĩrã yngavare ijakamba hãndiape. 9 Kyrã jyve taupere ñimimonde kavipo, pyrỹmymarãkambape, hareka ñymymashiã jyvyĩmbape, avy tivavarehe ñakahaa maĩrã ita verapy, perla, mondeava hepyva retape. 10 Tijeva jyve mbai kavi japovapy, hãrõashiva rãĩmi kuei taupere Tũpa jokuerevare. 11 Taupe chĩrĩrĩvapeĩ tyhendu mbo’ehahea, mbaimba heivape. 12 Taupe ahejããpo pyrỹmboi, maĩrã kuimbai ĩãrẽve’i verã, jasakaĩpo’ẽ hai. 13 Shara Adán rãnimba tynonde japoha, taykueimba Eva japojy; 14 ha’ẽãmba Adán mbytavyhava, taupe rãngamba, mbytavyamarã oamba mbai porãmbape. 15 Tẽvã taupe ohojepepo membyrã, jyroja katurã, ẽẽ jyhaihukueperã hareka heko kyamba ñakapory kaviva ryheve.