1Ti 3 | TpjSC | STEP | Kova hai ñee añeteva: Ĩme’ẽ pota mbai miñaka’iarã, ãñete mbai haikaviva pota japo.

1 Timothy 3

Marãrapo jyre tũpaope miñaka’iare

1 Kova hai ñee añeteva: Ĩme’ẽ pota mbai miñaka’iarã, ãñete mbai haikaviva pota japo. 2 Hãrã tũpaope miñaka’õ ijetaha porãmba’ihe verã rãĩmiãpo iko. Penteĩpore hyreko, ka‘uãpo’i, katupo’i, iko kuaapo mbai kuaavape hareka oporõmombaipo. Pyrỹmyvãhẽ kavipo hentape hareka pyrỹmboi kavipo. 3 Ka’uãpo, hareka ñyrãrõseãpo, potããpo kyrypoti hekope kavimba’õ. Kyrãtẽ verã pya kaviñoĩpo, ñee momboãpohe hapishare, hareka avypo mbai potaite. 4 Kapyrypo miñakashu hoope’õre, hareka hekope kavipo mboi hĩjapore ñee hendu verã hareka hekope kavipo heiva japoashu. 5 Hãma hai katũã miñaka kavi hentape iko hãndiarã, marãirapo miñaka kavijy Tũpa jytũpaope? 6 Hãme rãnga ha’eãpo hãirãã jyrojava, shara katu jyrojaite ijeherã, oajy vekui Ãña oava rãĩmi. 7 Tekotẽvẽ ijetaha kavijyvehe Jesús jyrojambaterihevare mbytepe, mahẽ ijetaha porããhe hareka oakui Ãña ñonovapy.

Marãrapo iko Diaconorã

8 Kyrãĩpo jyve tũpaope pyrỹmbory’iare diácono he’iashuvare, heko kavipo, ĩñee pyrõmbahea, hareka ka’ũãpo, potããpo kyrypoti hekope kavimba’õ. 9 Natupo reta añeteva kuaahambaa jyrojakue ryheva hareka pya kyambape. 10 Hãma tekotevẽpo ma’ẽãkavirãnihe, mba’ety porãmba he’iahe verã retarãpo, katu ñonoha diaconorã. 11 Kyrãi jyve diaconorã ñonoavare hyrekore, heko kavipo jyve, hareka ijeta reĩãpohe hapisha, jyrojããpo ijehe, hareka opa mbaipepo jyrojahahe. 12 Diaconore penteĩñoĩpore hyrekore, hareka miñaka kaviposhu hĩjapore hareka hentape ẽẽ hãndiare. 13 Diaconorã’iare hekope kavi mba’apova, mandu’a kavihe, hareka mymorãhapo, rojahapo Cristo jyrojaheva.

Mbai añeteva ojaimbava

14 Ãharõ areã aha aryresha verã, tẽvã opaite ambypara nde 15 kova kuatiape, sapyareii yrẽ’ãã aharã, rikuaa verã marãrapo ryraha Tũpa jy’tupao, hokava rãnga hai Tũpa hykoveva tũpao, jytasohea hareka mbai añeteva mirãta’õ. 16 Mbe’uha kova añeteva heshahaka ñandeva ko tykove mbijicheavaivi Tũpa pevarã, hai pente mbai ojaimbava: Jesucristo ijeshaka kuareta rãĩmi. Espiritu rupii kuaahava. Tũpa jokuevare hesha hareka mbe’uha opaite tenta retaipi. Opaite yvy jerekueipi’õre roja reta hareka hupihajymba vate ara hĩmbipeape.