1Ti 4 | TpjSC | STEP | Espiritu Santo rãnga hei kavi, ara japyape vãhẽserimarã, ĩmepo’ẽ poi jyrojaheva Tũpa, tykove japuvare heiva hẽnduposhu hareka japoposhu retakui mbaiposhyre pyrỹmboiheva.

1 Timothy 4

Pyrỹmbo’eahea ãñetembaa vekua

1 Espiritu Santo rãnga hei kavi, ara japyape vãhẽserimarã, ĩmepo’ẽ poi jyrojaheva Tũpa, tykove japuvare heiva hẽnduposhu hareka japoposhu retakui mbaiposhyre pyrỹmboiheva. 2 Japoposhu kuaretare hova mokue’iare hareka japuvare heiva, katuveãma ñynotivare. 3 Haire potããpo mbava omendashi, hareka ĩmepo’ẽjy potamba ho’uashiare. Tẽvã Tũpa opaitevamba japo ho’uavare jau verã, hareka pya kavi’õ ryheverã. Opaiteva ñande jairojaheare pevarã japoha hareka jaikuaa añeteva. 4 Opa mbai Tũpa japova rãnga haikavi, hãrã mba’ety mbaiva ñamomboshi verã, ñandypya haikavi’õ ryheve jaurã. 5 Shara Tũpa ĩñee hareka ñaĩmboiva rupii opaite ho’uavare haikavi’ẽ Tũpa hỹnonde.

Jesucristo jokueva haikaviva

6 Kova rỹmboihe ñandyryvy retarã, haimapo ndekui Jesucristo jokueva haikaviva, ñee pyrãtava jyrojakuepe hareka nymbo’eahea haikaviva rehorihevape. 7 Hãrã mbijiche ndijuhuvi ñee kuareta juru porãmba ryhevare hareka ñeereiva taupe kuakuava mbeuva; kyrãtẽ verã, ñymypyrãtakatu tykove mbijicheava Tũpa pevarãpe. 8 Ãñete rãnga ndyrete ñumungueva mbaivape haikaviñoĩ, tẽvã tykove mbijicheava Tũpa pevarã opavaretape haikavi, shara ĩmere ñee me’ẽãva tykove ã’ẽ pevarã hareka tykove ou verãpe. 9 Kova rãnga hai ñee añeteva hãrã opavare katu roja. 10 Ha’erãveĩ rãnga ñamba’apo hareka ñañehãã ñandijehe he‘iha’i ñandeape, shara jairojahe Tũpa hykove’ia, hai hokava opava retape mondojepe verã, tynondeite’ẽ opaite jyrojaheare. 11 Pyrỹmboihe kova hareka opaiteva ereshu reta japo verãre. 12 Avy mbava ndyreshatãti nukunumiteterirã, tiko ndyhevi heshaha verã Jesús ryhevare mbai haikaviva japoa verã, rijeta hareka rikova rãĩmi, jyhaihukue, jyrojakue hareka ndyreko kyambavape. 13 Ahapeve, iko mbijetashu kuaretare Tũpa ĩñee, mboihe hareka mykyrẽyshu reta. 14 Ñyngarekohe mbai rikatu rijapova Tũpa meẽ nde vekua, Jesús jy’tupao miñaka’iare ipo ñono neãrẽrã vekua. Espiritu Santo kyrã heishu retarã. 15 Ndypya mbijeta katuhe kova mbai hareka kyrã japo, opavare hesha verã marãra haikavi rehori. 16 Ñyngareko ndijehe marãra riko hareka rypyrỹmboi, jytaso katu kova mbaipe.