1Ti 5 | TpjSC | STEP | Avy ñyngãtashu kuimbai kuakuamava, nderu rãĩmipo rỹmbarakuaa, hareka kunumire ndyryvyre rãĩmiporyre;

1 Timothy 5

Marãrapo jaiko hãndi ñandapishare

1 Avy ñyngãtashu kuimbai kuakuamava, nderu rãĩmipo rỹmbarakuaa, hareka kunumire ndyryvyre rãĩmiporyre; 2 taupe kuakuavare ndesy rãĩmi japo, hareka kuñataĩre niindy rãĩmiporyre, niñerãmba ryheve. 3 Mbyveteshu taupe ĩme manoshi vekuare, ãñeteĩte mba’etyreva mboryshu verã. 4 Tẽvã taupe ĩme manoshia ĩmere memby maĩrã hỹmarĩrõ retarã, hairetapo tynonde opa ñonoshu mba’etyshuare, hareka kyrãpo mbyhekoviajyshu tuure hareka ishyre japohe vekua. Shara kova haikavi hareka mbyhory Tũpa. 5 Taupe ĩme manoshia ãñete hã’ẽĩ pytava hãrõ Tũpa, jurureshu mbory verã arape hareka pyharekue. 6 Tẽvã taupe ĩme manoshia vya verãĩ pya mbijetaherã, manoma hykove ryheve. 7 Mbeu jyveshu reta kova mbai, mahẽ ijetaha porããhe retakui. 8 Opaite mborymbava hentarã, tynondeite’ẽ hoope’õre, ñomi jyrojakue hareka heko porã’ãĩteveshi Jesús jyrojambateriheare. 9 Taupe ĩme manoshia ñonoã verã hee kuatiape, rekopo 60 ãño hareka penteva kuimbai hyrekokuepo. 10 Tijykuaashi mbaikavi japova; jaishu mbykuakua kavi membyre, myvãhẽ kavi hentape mbuhupa, maĩkavirahe Jesús ryhevare mbai mba’etyreare, hareka mboryra iko’asyvare. Kyrã opaite mbaikavi japo vekuare. 11 Tẽvã ĩme manoshiare kuñataĩteriare avytei tiñonoha kuatiape, hokava reta rãnga potama ynga rekojyrã mbijichejy Cristo. 12 Kyrãrã ha’eire iñiñono jaheahe verãpe, shara pyrõjyhe ĩñee meẽ vekua tũpaope mba’apotẽ verã. 13 Hareka oparupi jyraha reta tijuparehupi, hareka ñatẽ’ỹ, ñee ryhevajy, opa mbaipe ichereii hareka jaitambaa rãĩmi heishu reta hapisha. 14 Hãme rãnga aipota ynga rekojy taupe ĩme manoshia kuñataĩteriare, tymemby hareka tingareko kavihe hoo, mahẽ ñanymorãmba’iare ijeta porãã’ihe retakui. 15 Shara ĩmema’ẽ taupe ĩme manoshiare syry ñandyheviva, oho verã Satanás haykue. 16 Ĩme’ẽ taupe jyrojava hentape ĩmereva ĩme manoshiarã tingarekohese, avy tyhãrõ tũpao mbory verã, kyrãrapo tũpao katu mbory ĩme manoshia ãñeteĩte mba’etyreva mboryshu verãre. 17 Opaite Jesucristo jy’tupao miñaka kavi’iare, mbyveteapo hareka hekopekavipo mbyhepyashu mbai japova rehe, tynondeite’ẽ Tũpa ĩñee mbeu’iare hareka pyrỹmboi’iheare. 18 Kuatia mbyparahava rãnga hei: “Avy jokuashi buey juru, ndekope’iava jykyiteri’ẽrã”. Heiveejy: “Mba’apova rãnga, me’ãẽñoĩposhu japova hepykue”. 19 Avy rojande Jesucristo tũpaope miñaka’ia he’iaheva, mba’ety mokue maĩrã mbahapy heshavarã. 20 Hãrã mbai porãmba ĩmeĩñoĩte japo’iare heheishu hetavare hỹnonde, hãrãpo henduvare kyje jyvekui. 21 Airurende Tũpa hỹnonde, Jesucristo hỹnonde hareka Tũpa jokueva pyhỹrõvare hỹnonde, hekope kavi rijapo verã kova mbaire, mbavamba rĩmbijicheva. 22 Avy are’ãĩte ñono ĩãrẽ ndepo rỹmbyhee verã tũpaope mba’apo verã, ndypya rĩmbijeta kavimba terivape. Avy mi’ĩrũhe mbai porãmba japo’iare. Ñyngareko ndijehe ndykove kyamba verã. 23 Ndypya hasy’irã hareka nymbairasyñoĩrirã avy yyiñoĩte heu, vinopo mishiĩ reu jyve. 24 Ĩme’ẽ mbai porãmbava japo’ia, ndeiteri ma‘ẽhã’ẽhẽrãvãĩ jykuaaheva, tẽvã ĩme’ẽjy mbai porãmbava iko marãmeĩ ajera heshahava. 25 Kyraĩ jyve mbaikavi japoa vekua ijyhesha jyve, ajemaĩ ĩme’ẽ heshahamba, tẽvã mbai porãmba yngavare japova katuãpo opa ara ñomire.