1Ti 6 | TpjSC | STEP | Opaite jokuehareare tymbyveteshu jokue’õre, mahẽ porãã ijetahahekui Tũpa hee hareka ñapyrỹmboiheva.

1 Timothy 6

1 Opaite jokuehareare tymbyveteshu jokue’õre, mahẽ porãã ijetahahekui Tũpa hee hareka ñapyrỹmboiheva. 2 Hãrã ĩme’ẽ pyrokue’õ jyrojavarã avy tijapoã jyveshu hai heiva, shara hai jyve tyvy jyrojakuepe. Japo kaviteve rãngaposhu hai heishua, shara japova hipityva hai jyrojavare hareka ñandyryvyre haihuavare. Kova hai rỹpyrỹmboihe verã hareka mbeushu reta japo verã.

Jyparekokue hareka vy’a

3 Ĩme’ẽ yngai’ova pyrỹmboi’ihea, ohombahea Ñandeja Jesucristo pyrỹmboihe vekuarã, hareka tykove mbijicheava Tũpa pevarã jahahea ñanymboihea rãĩmi, 4 hokava hai kuareta jyroja ijeheva hareka mbaimba kuaava, mimbairasyshu potaite ijetareii’ẽrã hareka ñeereire pota ijakarã; hokavaivi rãnga ou, ijakava, ñyrãrõ, hapishatamba’ia, hehei ijupeva, porãã pya mbijetahe yngare, 5 hareka ñyrãrõ opambava, katuã pya mbijeta kavi hareka kuãã mbai añeteva, haire moã tykove mbijicheava Tũpa pevarãpe heta kyrypoti mbatyrã. 6 Ãñete rãnga tykove mbijicheava Tũpa pevarã heta veru ñande maĩnunga haikaviva, tẽvã koñeĩ ĩmerea ryheve vyava pevarãĩ. 7 Shara mba’ẽã jaru ko yvy’ĩãrẽ, hãrã mba‘e’ãĩpo jarahajy. 8 Hãma ĩmejare jau verãrã hareka ñamonde verãrã, javy’aĩmapo. 9 Tẽvã pota ikokatuvare oa pyahã’ãvãpe mbai mbo’ahava rãĩmi, hãrã oa mbai potaraiviape hareka pyrỹmbaivape, kova mbai porãmba vekua, opa raha kuaretare ñymbai verã kyty hareka õñehundi verãpe. 10 Shara kyrypoti jyhaihu hai opa mbai porãmba vekua jypy, hãrã ĩme’ẽ kyrypoti potaiterã poi jyrojava, hareka heta veru ijupe jyhasa’asy hykovepe.

Jyrojakuepe ñyrãrõ kaviva ryheva

11 Tẽvã nde, Timoteo kuimbai Tũpa ryheva, syryshinde opaite kova mbaire. Tykove haikavivape iko, tykove mbijicheava Tũpa pevarã, jyrojakuepe, jyhaihupe, ñyhãrõkuaa hareka jyrojamba ijehevape. 12 Ñyrãrõ kavi rirojakuepy; ñimbi’ijahe tykove opamba verã, ha’erã rãnga Tũpa nyrẽnomba aryka’e hareka hetavare hỹnonde rỹmbeu rirojava Tũpare. 13 Ã’ẽ Tũpa opa mbai mbyhykoveva hỹnonde, hareka Jesucristo hỹnonde hekope kavi ñymbeu vekua Poncio Pilato hỹnonde, airure nde 14 rijapo verã opa mbai she hai ndeva. Iko tykove kyambape, kuaretare heshamba ndyrehe verã maĩnunga porãmba vekua, Ñandeja Jesucristo hykuaĩ oujyapeve, 15 hareka jy’ara vãhẽmarã Tũpa heshakapokui. Tũpa hai ojaimba, koñeĩ’õ ñymbaikatuva, mburuvisha vasure Juhuvishavasu hareka huvishare Ija. 16 Hã‘ẽĩ’ẽ manombava, ikova hĩmbipeape katumba mbava ñymbojahea. Mba’ety kuareta heshava, hãma hesha’ãĩteipo. Hai opa ara pevarã heko kavikue hareka ñymbaikatu. Amén. 17 Ikokatuvare ko yvy’ĩãrẽ, ereshu reta avy tiroja’ijehe maĩrã jyrojahe mbai hetareare, shara haire opa verã ryheva. Tirojavehe Tũpa hykovevare, hai heta meẽ ñande maĩnungakuere javya verã. 18 Ereshu reta tijapo haikaviva, tikokatu reta mbai haikaviva japovapy, tymeẽ hareka timbijaoveshu hapisha mbai haire ĩmerea. 19 Kyrãrãpo heta mbai ĩmere ara kutyvejya pevarã, hareka katupo hipity tykove opamba verã.

Pablo mbeushu Timoteo japo verã

20 Hãrã nde Timoteo, ñyngareko kavihe mbai hejahandeva. Avy hendu ñe’ẽkuereii haimba Tũpaivi ouva hareka mbaikuaakue añeteva rãĩmitẽ vekua, ijeta porãmbahea ñanymbo’eahevare hareka heivare ĩmereva añeteva, 21 ĩme’ẽ rojavare añeteva rãĩmiva hareka poi jyroja reta. Tũpa tymaĩkavi pyndyrehe. Amén.