2Cor 1 | TpjSC | STEP | She, Pablo Jesucristo jy apostol, Tũpa kyrã potarã, hareka ñandyryvy Timoteo hãndi marãnduha, tũpao ẽvã tenta Corintope hareka opaite jyrojavare ẽvã Acayape.

2 Corinthians 1

Pablo marãndu Corintope’õre

1 She, Pablo Jesucristo jy apostol, Tũpa kyrã potarã, hareka ñandyryvy Timoteo hãndi marãnduha, tũpao ẽvã tenta Corintope hareka opaite jyrojavare ẽvã Acayape. 2 Tũpa hareka Ñandeja Jesucristo, tymaĩkavi pyndyrehe hareka tymeẽpe pyavapy.

Pablo iko’asykue

3 Tomomba’ea vasu Tũpa, Ñandeja Jesucristo Tuu, meẽva jyparekokue hareka ñanymbyvyava. 4 Hai ñanymbyvyañoĩ, opaite jepy’apykuepy, ñambyvyajy verã jyve hasa‘asy’õre, vya Tũpa meẽ oreva rupii. 5 Heta jahasa’asyva rãĩmi Cristo jahaihurã, heta jyve vy’a japityva Cristo rupii. 6 Ore hasaha‘asy’ẽrã, hai pyvya verã hareka pehojepe verã; yrỹmbyvy’aharã, hai pyvya verã hareka pijepymahe, jyhasa’asy ore hasaha vekuarã. 7 Ore tãnta jyrojaha pyndyrehe, shara kuaaha marãra ĩrĩmi’ĩrũ ore hasaha’asyvape, kyrãpo ĩrĩmi’ĩrũ jyve yryvy’akuepe. 8 Shara shyryvyre, pota pikuaa jyve marãra hasaha’asy Asiape. Jyvarehaite yryreherã, hãĩmeĩ hasahashi, hareka ñymo’ãveãma õhẽhashi verã hokava tykove ryheve. 9 Ñanduha irijehe jaheama yryreherã haĩ urukaha verã, tẽvã kova yrỹmboihe potamba orei jyrojaha irijeheva, koñeĩ jyrojahahe verã Tũpa, manovare mynguerajya. 10 Ñanynohẽ, hareka ỹrynohẽjypo ñymanoivi. Jyrojahahe ỹrynohẽjyñoĩ verã, 11 pee ỹrymboryve pimboi yryrehevaperã, hareka heta’ẽ ñymboi’ẽ yryrehevarã, hetapo’ẽjy vyava Tũpa hãndi, pimboi yryreherã rehe.

Marã’ĩrãra Pablo ohoã Corintope

12 Ore rekoha mbaiva rehera jyrojahapo irijehe, ñanduha yrypyape tykove kyambava hareka pyrỹmbytavyhãã ohohava retaipi, tynondeite hai pynymbyteipi. Aporyã ãrãndu ko yvy‘ĩãrẽ’õ, Tũpa pya kavi rupii rãnga hai yrỹmbory kyrã ikoha penendie verã. 13 Ore mbyparahããpe katumba pimbijeta hareka pikuaa kavimba verã. Ãhãrõ opaĩ pikuaa verã, 14 kyrã ã’ẽ peñepyrõma pikuaa yryhevi, pee jyve pyvy’apo yryrehekui, orejyve vy’ahapo pyndyrehekui Ñandeja Jesús oujymarã.

15 Jyrojahahe kovarã, potatẽ tynonde aha pẽĩvape, mokuejy pipity verã mbai kavikue, 16 jaishu, Macedoniape ahamajyrã aipota ahasakui pẽĩvape, hãma aijymarã hykuaĩpo ahajykui pẽĩva kyty, haivi shymborypopikui aha verã Judeape. 17 Ĩmera shypya ambijeta kaviã ajapo verã kova? Maĩrã, pota ajapovara, ajapo kuaretare ikova rãĩmi, “ẽẽ” hairã, kỹỹma’ẽrã, “mba’ety” haijyvy? 18 Tũpa rãnga opa hesha mapeã ore he’iha “ẽẽ” hareka “mba’ety” pente he’iape. 19 Shara Jesucristo Tũpa Tay, hai Silvano, Timoteo hareka she, ñimiñe’ẽha pymbyteipi, ha’ẽã rãngakueipi “ẽẽ” hareka “mba’ety”, koñeĩ, Cristo rãnga hai “ẽẽ” Tũpaivi. 20 Shara opaite Tũpa ĩñee meẽva hai “ẽẽ” rupii. Hãrã ñamombaishurã ja’e “Amén” Tũpa hĩmbipekue pevarã. 21 Tũpa meẽ ore hareka meẽ jyvepe pente ñeepe jaiko verã Cristo rehe, hãme rãnga hai ñanymbyheko kavi. 22 Hai ñande sella, kuaaha verã hai ña’ãpova ñanderã; Espiritu Santo rupii. 23 Shykovere ãñono ko haiva, ãhẽno Tũpa hesha verã, hai opa kuaa shypyape’õ, potãã pohyite aijetaperã, ahããteri Corintope. 24 Ha’ẽã pota ñimbi’ijahahe pirojakuerã, potaĩ rãnga pymboryha pyvya verã; shara pirojakue rupii tãnta pitasopeĩ.