2Cor 10 | TpjSC | STEP | She Pablo, airure’asype, Cristo jyhaihukuepe hareka pya kavipe, ajemaĩ pere shyrehe ãĩme’ãĩ pynymbyteperã shymarãva, tẽvã mbyry ãĩmẽ’ãĩrã aponderaã.

2 Corinthians 10

Pablo ijeta ijehe

1 She Pablo, airure’asype, Cristo jyhaihukuepe hareka pya kavipe, ajemaĩ pere shyrehe ãĩme’ãĩ pynymbyteperã shymarãva, tẽvã mbyry ãĩmẽ’ãĩrã aponderaã. 2 Airure’asype, aha pẽĩvape apyryresha verãrã, avy shimiñerãpikui aponderambahe verã ijeta’i yryrehevare, haire hei japohava maĩnungare tyroo potavape, shara ãĩme’ãĩ ambyhovaishu verãre. 3 Ãñete rãnga ore ikoha jyve ko yvy’ĩãrẽ, tẽvã ñyrãrõhãã ko yvy‘ĩãrẽ’õre rãĩmi. 4 Ñyrarõhãrã poryhãã ko yvy‘ĩãrẽ’õ, Tũpa ñymbaikatukue rãnga poryha, hokava hai jepyheva opaite mbai ñymypyrãta’õ. 5 Ity yvype opaite mbai he’iavare, hareka Tũpa ãrãndure pũãvã, hareka opaite kuaretare pya mbijetava rãĩmi ñonoha Cristo ipope, ĩñee rẽndushu verã. 6 Õĩha myhenda verã opaite ñee hendumbare, pee hekope kavima ñee pyhendurã. 7 Pymaĩ kavihe maĩnunga marãra. Ĩme’ẽ hei ijeheva haiva Cristo ña’ãpova, aipota haishu ore ha’ĩ jyve. 8 Ajemaĩ ahasavee apory shymbaikatukue, ãnotiã. Ñandeja rãnga meẽshe apurũmupũã verã hareka ha’ẽã apyrỹmbai verã. 9 Aipotãã pimoã apyrỹmyngyje’aipy kuatiare ambyparava. 10 Ĩme’ẽ heiva shy kuatiape pohyite hareka mbaretepeite aijetava, tẽvã sheteiva aijetarã shypya vasuã hareka shiñee mba’erãã. 11 Tẽvã kyrã heivare kuaapo jyve, opaite mbai mbyryĩvĩ hai vekua, ajapopokui ahama peĩvaperã. 12 Katuããny ñimbivachea hãndi hareka ñymyha’angahe ijehei ijeta kavi’iare, hairetateiva ñono marãrapo iko, hãme rãnga ñyhããjyre ijupe, ha’ire ñimbivachejyrerã, katynga kua’ãĩtei japovare. 13 Tẽvã ore jyrojahããpo irijehe japy ñonoha’orea kutyve, Tũpa rãnga japy ñono ore japoha verã, hareka hai ñonojy’ore vãhẽha ohoape verã. 14 Hãme rãnga, õhẽhãã yrỹmyhendahavaivi, vãhẽambapeva rãĩmi, shara ore hai tynondeite vãhẽhapeva mbe’uape Ñee kaviva Cristo ryheva. 15 Jyrojahãã’ihe yngavare japova ore japoha vekua rãĩmi, koñeĩ hãrõhã pupũãve peho verã jyrojakuepe, kyrã piñymbyhetave verã, õhẽãmbashiape irĩñonoãvaivi, 16 haivi mbe’uhapo Ñee kaviva mymbyryve pee peĩvaivi, icheamba yngavare japo vekuape. Mbavamba hei ore verã, yngava japo vekuaĩ jyrojaha’ihea. 17 Ĩme’ẽ pota jyroja ijehevarã, Ñandeja heepe tiroja’ijehe. 18 Shara hokava kuareta ñonohava, ha’ẽãpo ha’ii ñymbyhaikavi’ia, koñeĩ Ñandeja mbyhaikavivaĩpo.