2 Corinthians 11

Pablo hareka apostol japuvare.

1Katura pymaĩshyrehe ajema kuakuamba’ia rãĩmi aiko ka’ãĩpi! Ãñete, pymaĩpeveĩ shyrehe. 2Shykateỹ rãnga pyndyrehe, shara kova Tũpaivi ourã; she rãnga pota apyrỹmbyrekoka, pente kuñataĩ pokoambaterihea rãĩmi, pentevaĩ pemerã verã, hokava hai Jesucristo. 3Tẽvã akyje Eva ikoheva rãĩmi iko pyndyrehe verã, ãña mbytavyva rãĩmi, kyrãpo jyve pynymbytavyharã hareka syrypo pypyaivi jyhaihukue kyamba Cristo rehe piñanduva. 4Shara ĩme’ẽ yngava Jesús ijetahepearã, haimba ore mbe’uhape vekuarã, maĩrã veruva yngava espiritu, pee ĩmepyreaivi, maĩrã yngava Ñee kaviva pee pymyvãhẽma vekuaivi. Hokavare pyhendu kavishu. 5Tẽvã mbaivapeã shimishiveeshi hokava apostol haikavivevare pymbyveteshuva. 6Katu haire rãĩmiãã aikatu aijeta, tẽvã shy’ãrãndukuepe kyrãã’ẽ, kova heshahakañoĩpe opa mbaipe. 7Mbai porãmbara ajapo sheii añemomishĩĩ airã hareka Ñee kaviva Tũpa ña’ãpova ambeu jyvepe akorambape, pee vateve pẽĩ verã? Mba’ety rãnga. 8Amba’apo pyrehe verã hareka apyrỹmbory verã, yngaipi’õ jyrojava ñymbatyvare ahekyshi reta kyrypoti. 9Ãĩmẽ’ãi pynymbyteperã hareka mba’ety she maĩnungarã, airureãpe shymborypi verã, shara ñandyryvy ouvare Macedoniaivi opa ñonoshe reta mba’etyshea. Hãrã aipotãã añonope pente mbai pohyva, hareka kyrãñoĩpo ajapo. 10Hãĩ she ajavymba Cristo ryheva añeteva aikuaa hairã, kyrã aikuaa kavijy mba’ety opaite tentare Acaya tivishakuepy’õ heky shyhevi verã ko ĩme’areva airojakatu shijeheva. 11Marã’ĩrãra kyrã aijeta? Apyryhaihuarãra’e? Tũpa rãnga kuaa apyryhaihurã. 12Tẽvã ajapoteripo aha’ai ajapova, juru ambotyshi verãre, haipi heka’iare mbaivarapo hei. Heka marãrapo hei reta, haire japova jyrojahe verã. 13Haireta rãnga apostol japuvare, ñimiñee’ia japureiivare, ñymbyheereiipy reta Jesucristo apostolre. 14Hokava ha’ẽã haĩrãĩ jahesha verã. Satanás teiva rãnga ikopy hete heshaha verã pente Tũpa jokueva hĩmbipeva rãĩmi! 15Hãme rãnga ohoheare kyrãĩ mbai japo rã’ãnga ñimbivachepe. Tẽvã hokavare opapokui, japo vekua jurureva rãĩmi.

Pablo iko’asy apostolrã’irã

16Hykuaĩ haijype: Avypo mbava hei shyrehe aikuakuamba’aiva; tẽvã kyrã pypya pimbijetarã, pyma’ẽĩhe taijetape kuakuamba’ia rãĩmi, mishĩĩ airoja katu shijehe verã jyve. 17Airojaitete’ai shijeherã, ko haiva ha’ẽã Ñandeja kyrã heisherã, koñeĩ aikuamba’aiva rãĩmi ajaporã. 18Shara hetaite’ẽ japova jyrojaheare, hãmera airojããpove shijehe? 19Pee rãnga hetaite mbai pikuaarã, vy’ape pyhendushu kuakuamba’iare. 20Mba’ẽã pereshu pokuereii’iare, pimiñerã pyrojashu verã, pynymbytavy’iare, ha’ei retaĩ ñymbyvate’ia hareka pyndyrovaipi nupa’iare. 21Anotiny hai pee, ãñete ore mapeãã kyrãã haire rãĩmi oponderahãã! Tẽvã yngavare katu jyroja ijeherã, kyrãĩ jyve she, ajemaĩpo kuakuamba’ia rãĩmi aijeta. 22Hai retara hebreo? Ha’ĩ jyve she. Hairetara Israelvare? Ha’ĩ jyve she. Hairetara Abrahamvi ñymoñava? Ha’ĩ jyve she. 23Hai retara Jesucristo jokueva? Ha’itẽjy veshe. Ajemaĩ kuakuamba’ia rãĩmi aijeta. Hetaiteve amba’aposhi reta; heta shunupãhã, heta shyraha shymbyperesoha, hareka ajejetei ãmanoĩte. 24Judiore pandepo kavi 39 shunupapy reta tukumby. 25Mbahapyjyy shunupa reta yvyrape, haivi pentejyy ita pory shyrehe reta. Mbahapyjyy varko ahapya opa iche yy vasukuepy, ajejetei ahapy yy vasukue, haipe ahasa pente pyhare hareka pente kuarasy. 26Oparupi aha, heta porãã ahasa yysyryvaipi, manarõ’iare mbyteipi, ãĩmoã ryheve sherẽtarãre mbyteipi, Judiomba retaivi hareka tenta yngavaivi ouvare mbyteipi. Hareka heta ahasa porãã tentaipi, yvy ikoamba retaipi, yyvasu hupi, hareka sherẽtarã rã’angare mbyteipi, 27heta porãã ahasa amba’aporã hareka shykangyrã, ache kavimbape, ñymbahy hareka uhe, akarumbape, ro’ype hareka mba’ety ãmondevape; 28Opaite kova mbai ĩãrẽve, opa ara ahasa ajepy’apyhe jyrojava ñymbaty’õre. 29Ĩme’ẽ ñymbairasyvarã, shymbairasyĩ jyve; tẽvã ĩme’ẽ hapisha mbai porãmbape ityvarã, shymarã hareka shyposhy. 30Pota airoja shijeherã, ajapopo jyve aheshaka nũngambape. 31Tũpa Ñandeja Jesucristo Tuu, tomomba’ea vasu opa ara, hai kuaa shapuãrã. 32Tenta Damascope ãĩme’ãĩrã, huvisha vasu Aretas jokueva huvisharã’õ, ñonomba syndarore tenta hõchepe, shypysy verãre. 33Pente kanata marẽỹvape shĩ’ĩrũre shymbyvejy tenta mangorahapya petanoĩpi, kyrã ãĩvãhẽshi.