2Cor 13 | TpjSC | STEP | Kova mbahapyheama aha apyryresha verã. Kova mbai my’ãñetẽha verã, mokue, maĩrã mbahapy heshakaviva mbeurã haikavimapokui.

2 Corinthians 13

Marãndu opahea

1 Kova mbahapyheama aha apyryresha verã. Kova mbai my’ãñetẽha verã, mokue, maĩrã mbahapy heshakaviva mbeurã haikavimapokui. 2 Hãma arykai mbai porãmba japo’iare, hareka opaiteva, mbyry ãĩme’ãĩrã ambeujyshu reta, sheteiva ambeushuare mokueheape aha apyryresharã, hãrã ahajyrã mbaveãmapo ohojepeshikui ñunupa. 3 Shara pota pikuaa shyhevi ãñetera Cristo she rupii ijeta. Pee pevarã kangyã hai, koñeĩ heshaka jyve ñymbaikatukue pynymbytepe. 4 Ãñete rãnga hai mbysavavaha kurusure kangyva rãĩmi, tẽvã hai iko Tũpa ñymbaikatukuepy. Ore yrykangyhãĩ jyve handi, tẽvã ñymypenteãherã ĩmeãpo’i Tũpa ñymbaikatukue rupii, haikavipe verã. 5 Pymaĩ kavi pindijehe pikuaa verã pynypyrãtara pẽĩ jyrojakuepe, pypya pimbijeta. Pijykuaarã Jesucristo ẽvã pyndypyape? Ajemapo pyndypya hã’ãha! 6 Ãhãrõ pee pikuapymondove yryrehe, ore mbai pohyva hasahaĩrã. 7 Ore jururehashu Tũpa potãã pijapo maĩnunga porãmbarã, ha’ẽã pota heshaha yryrehe mbai pohyva hasaharã. Koñeĩ haikaviva pijapo verãĩ rãnga, ajemaĩ hãĩte ore hasahambava pyarãã. 8 Shara katuã mbai jajapohe añeteva, koñeĩpo añeteva ñaĩ hãndi. 9 Hãme ore vy’ahaĩ ỹrỹkangyrã, hareka pee pynypyrãtarã; hareka ñymbo’eha pyndyrehe hekope kavi piko verã. 10 Hãme rãnga, ambyparape kova ndei aha apyryresharã, potãã ahamarã apory mbaikatu Tũpa meẽshevarã pohyite aijetaperã, ha’ẽã opa apyrỹmbai verã, koñeĩ apurũmupũã verãĩ.

Ñymarãndu opahea

11 Koñymahea shyryvyre, pyvyañoĩ, pẽĩkavi, piñymykyrẽy pepenteĩ, pente pyapeĩ piko hareka pyavapype. Kyrã Tũpa jyhaihukue hareka pyavapy Ija ẽẽpo penendie. 12 Piñymarãndu pente ñyhẽtu kyambape. 13 Opaite tyryvy jyrojavare mondokape ñymarãndu. 14 Ñandeja Jesucristo tymaĩkavi pyndyrehe. Tũpa jyhaihukue hareka Espiritu Santo tiko penendie.