2 Corinthians 2

1Hãme rãnga hai, haikavive ahamba apyryreshajy verã, mahẽ apyrỹmbyvy’ã ãĩjykui. 2She apyrỹmbyvy’ãrã, mbavarapo shymbyvyajykui? Mba’ety, peii rãngapo shymbyvyapijy. 3Hãme rãnga ambyparape kuatia ajapova rãĩmi, aipotãã ãvãhẽ aharã shymbyvy’ããpirã, shymbyvyatẽpi verã; airoja’ãĩ pyndyrehe shyvy’akue haiva jyve pyndyvya. 4Ambyparape hokava kuatiarã, vyamba vekua hareka ajepy’apy ryheve ajapo, hareka ajaheoseve, ha’ẽã pota apyrỹmbyvy’ãrã, pyhesha verãĩ rãnga marãra apyryhaihu.

Pablo hejareiishi mbai porãmba japohe vekua

5Tẽvã ĩme’ẽ shymbyvyambarã, ha’ẽã sheĩĩ japo shyreheva (potãã ahasaiterã) katu hai, opaiteva rãnga pynymbyvy’ã. 6Hokava kuareta haikavima rãngashu, heta poshy ryheve pereshu vekua. 7Ã’ẽ katuma pyhejareiishi hareka pymborypo haikavi’ẽjy verã, mahẽ vyamba vekua porãã japohekui. 8Hãme airurepe, pyheshakajyshu marãra pyhaihushu. 9Shara ha’ẽrã ambyparape kuatia, aikuaa verã opa mbaipera ñee pyhendu. 10Pyhejareiishuvape, ahejareii jyveshi. Shara ahejareii jyve, ĩme’ẽ kyrã ahejareii verãrã, ajapo pyndyrehe Cristo hỹnonde. 11Kyrãrã Satanás ñymytynondeãpo yryrehe, jaikuaa kavi rãnga piriritysea rãĩmi.

Pablo vy’ã Tróaspe

12Ãvãhẽ aha Tróaspe ambeu verã Ñee kaviva Cristo ryhevarã, ẽẽshe amba’apohe verã Ñandeja. 13Tẽvã ajepy’apy ai aheshãã shyryvy Tito Tróasperã. Hãme rãnga aheja retarã aha Macedoniape.

14Tẽvã ãmeẽ shy’ajetekue Tũpape, hai ỹrỹmypyrãta hareka jepyhahe verã porãmba vekuare Cristo rupii, hareka ore rupii oparupi kuaaka hai ĩñee, mbai pishekatuva rãĩmi oparupi vãhẽ. 15Shara Tũpa pevarã ore hãĩ pishekatuva Cristo rãĩmi, hareka opaite ohojepevare hareka õñehũndivare mbyteipi pevarã. 16Ohojepemba verãre pevarã kova incienso pishekue hai purukava, tẽvã ohojepevare pevarã, kova pisheva hai meẽva tykove. Mbavara katu japo kova? 17Ore ikohãã okoraha’i ĩãrẽ Tũpa ĩñee, yngavare japosea rãĩmi. Kyrãtẽ verã, añetevaĩ mbe’uha Tũpa jokuereare rãĩmi, hareka Tũpa hỹnonde ijetahahe Cristo.
Copyright information for TpjSC