2Cor 3 | TpjSC | STEP | Kova kyrã he’iharã, pimoãra hykuaĩma pota ijetaha kavi’ẽjy irijehe? Maĩrã, pipotara pynymbyheshahaka kuatia pa’ãporã, maĩrã jururehape, a’ãmore japosea rãĩmi?

2 Corinthians 3

Ñee me’ẽãva py’ahuva

1 Kova kyrã he’iharã, pimoãra hykuaĩma pota ijetaha kavi’ẽjy irijehe? Maĩrã, pipotara pynymbyheshahaka kuatia pa’ãporã, maĩrã jururehape, a’ãmore japosea rãĩmi? 2 Pee rãnga hai yrykuatia, yrypyape mbyparahava, opaĩ heshava hareka mbijetava. 3 Ijyhesha kavi rãnga pee haiva Cristo jykuatia, ore japoha vekua, haimba tintape mbyparahava, Tũpa hykove’ia jy Espiritupy japohava rãnga, ha’ẽã itare mbyparahava, koñeĩ kuaretare pyape. 4 Kyrã Cristo rupii, jairojahe Tũpa. 5 Tẽvã ore õĩhãã oreii mbai japoha irijehe verã; Tũpa rãnga meẽ ore mbai katuha japoha verã. 6 Hai rãnga meẽ ore ko ñee me’ẽã py’ahuva ijokuehakashu verã. Ha’ẽã kuatiare mbyparahava, Espiritu ryheva rãnga; shara kuatiare mbyparahava puruka, tẽvã Espiritu ryheva, meẽ tykove. 7 Moisés mbypara vekua purukava itare japoava, hĩmbipemba hãrã Israelvare katuãmba maĩhe Moisés hovare, shara hĩmbipeite ajemaĩ opa verãteã. 8 Kyrãmba aryka’e hokava, hãmera Espiritu ryheva japoava hĩmbipeveãrapo hai? 9 Shara Moisés mbypara vekua ñandukava hĩmbipemba aryka’e, hãrã hĩmbipeitevepo hai kova, meẽ ñande ñimbivacheva ryheva. 10 Shara arykaiva mba’ẽrãveãma pyta, ñambivache hãndi kovarã, mbaivasuiteve hai. 11 Hãma mbai vasumba arykai opa verãrã, mbai vasuitevepo hai kova opa ara pevarãva. 12 Rekoha hãrõhã’õvãrã, jyrojakue ryheve kyrã ijetaha. 13 Ore japohãã Moisés japova rãĩmi, maĩnunga hova mbykasoipy, potãã Israelvare hesha ove oho’i opa verãrã. 14 Tẽvã kuããmba reta mbaivara he’ise, shara ã’ẽpeve haire mbijeta tynonde ñee me‘ẽãva’ẽpyarã, hokava jochashi reta kuaa verã, shara hokava tyrova mbykaso’iapya Cristo rupii katu hekyha. 15 Ã’ẽpeve, Moisés mbypara vekua mbijetahama’ẽrã, mbykaso’iapya jasoiterishi mbaikuaakue. 16 Tẽvã Ñandeja jykoty oujy retarã, hova mbykaso’iapya hekyhashiva rãĩmipo mbaikuaakueivi. 17 Shara Ñandeja hai Espiritu; hãma Ñandeja jy Espiritu ẽvãpe, mba’ety pyrypysy’õ. 18 Hãrã opaite ñandeva, ñandyrova jasoireva mba’etyma ñandyreheva, ñamaĩhe sypevape rãĩmi Ñandeja hĩmbipekue, Cristo ñandy’ovave oho’i, shara ĩmejare hĩmbipekue. Hokava rãnga hai Ñandeja je Espiritu japova.