2Cor 4 | TpjSC | STEP | Hãme rãnga yrỹkyrẽyñoĩ, shara Tũpa jypareko rupii meẽ ore japoha verã,

2 Corinthians 4

Jesucristo ĩñee mbeu’iare

1 Hãme rãnga yrỹkyrẽyñoĩ, shara Tũpa jypareko rupii meẽ ore japoha verã, 2 shara opa mbijicheha ñemiãpẽ’õre hareka pyrỹmymarãkava, ikohã pyrỹmbytavyhavape, hareka Tũpa ĩñee opavãã mbihi’aha. Kyrãtẽ verã añetevaĩ mbe’uha, kyrãrã kuaa mondo verãre ore haiva añeteva Tũpa hỹnonde. 3 Hãma ĩme’ẽ kuaa kavimbateriva kova Ñee kaviva mbe’uhava, hai ohojepemba verãre. 4 Haire rojãã, shara ãña ko yvy ija ñakapy mypyntushi reta, potãã mykõĩshu reta Ñee kaviva hĩmbipeva Cristo ryhevarã, shara Cristo hai Tũpa rãĩmiva. 5 Shara oreiã ñimiñẽ‘ẽha’i irijupe, koñeĩ mbe’uha Jesucristo haiva Ñandeja; ore hai jokueharea pee pevarã Jesús haihuharã. 6 Shara Tũpa teimba, hei timimbivape sape verã hendyva, hai sapeka ñandypyape, sape verã hareka kuaaha verã Tũpa hĩmbipekue, hĩmbipeva Jesucristo hovare.

Jyrojakue ryheve jaiko

7 Tẽvã rekoha kova mbai hepyva rãĩmi, pente mbai hyru tujuivi japoa vekuapy, ijyhesha verã mbaikatukue ojaimbava haiva Tũpa ña’ãpova, haimba ore yrã’ãpova. 8 Kyrã rãnga jehu, porãmba vekua yropy, tẽvã hasahaĩshi; ojepy’apyhatẽva, yrypyape haikaviĩ õĩhã. 9 Ajema pũ’ãhate yryreheva, tẽvã pytahãã orẽĩ; ỹrỹmomboatẽ yvypeva, pu’ãhajyvyĩjy. 10 Rahahañoĩ yryretere Jesús ñymanokue, kyrã Jesús hykovekue ijeshaka verã jyve yryretere. 11 Ore rãnga ĩmeãteri’irã, opa ara õĩha Jesús rehe manohã verã, kyrã ijyhesha verã jyve Jesús hykove ko yryrete mano verãre. 12 Kyrã manokue mba‘apo’ẽ yryrehe, hareka pee tykove mba‘apo’ẽ pyndyrehe. 13 Ore rekohava jyrojakue, hai Mbyparahava heiva rãĩmi: “Aroja, hãme aijeta”, ore rojahaĩ jyve hãme ijetaha, 14 kuaaha marãra Tũpa mynguerajy Ñandeja Jesús manovare mbyteivi, hareka ore yrỹmynguerapo jyve hãndi, hãrã yryrahapo penendiekui hai hỹnonde. 15 Opa kova mbai jehu ore pyndyraihuharã, hetavevape hipityrã, hetave ẽẽ verã meẽva jy ajetekue, Tũpa hĩmbipekue pevarã. 16 Hãme rãnga ñymate’ỹhããhe, ajemaĩ kova yryrete tuja oho’i, tẽvã yrykove opa ara ñymbypy’ahuve oho Jesús rupii. 17 Shara jyhasa’asyre sapy’aiteĩ hai hareka areã opa hasa. Tẽvã hai rupii, Tũpa meẽ ñande tykove hĩmbipeva opamba ryheva, hareka hetaiteveva. 18 Ore ma’ẽhãhe ijyheshavare, koñeĩ ma’ẽhã heshahambavare. Shara mbai ijyheshava opareii, tẽvã heshahambare hai ikova opa ara.