2Cor 5 | TpjSC | STEP | Ñande jaikuaa ñandykove hãĩ, oo yvy‘ĩãrẽ’õ opa ñymbai verã, tẽvã kova oo opa ñymbairã, Tũpa myhẽvã’ẽ ñande vate arape pente oo opa ara pevarã, haimba kuaretare ipope japova.

2 Corinthians 5

1 Ñande jaikuaa ñandykove hãĩ, oo yvy‘ĩãrẽ’õ opa ñymbai verã, tẽvã kova oo opa ñymbairã, Tũpa myhẽvã’ẽ ñande vate arape pente oo opa ara pevarã, haimba kuaretare ipope japova. 2 Hãme rãnga ñanutũhẽ ñamondojai jaikoterijai ko oo ã’ẽvãperã, shara ñanykyrẽỹma jaha jaiko ñandero ara vate’õpe; 3 hãrã hai ñandasoipo mondeava rãĩmi, potãã ñanynanitei japytarã. 4 Jaikoterijai ko oo yvy‘ĩãrẽ’õperã, haiva ñandyrete, javy’ãã hareka jaiko’asy, shara potãã ñanymynaniha, koñeĩ py’ahuva pota ñamondejyrã, kyrã ñymano hekoviajypy verã tykove. 5 Tũpa rãnga ñanymyhẽva kyrãva pevarã, hareka meẽmba ñande Espiritu Santo ãñete jaroja verã pota japityva.

6 Hãme rãnga ỹrỹkyrẽyñoĩ, hareka jaikuaa ñaĩmeteriñaĩ ko ñandyreperã mbyrypoñaishi Ñandeja. 7 Shara jyrojakuepeĩ ikoha, ha’ẽã heshahava rupii. 8 Tẽvã jairojañaĩ ñandypyavasu ryheve, hãme rãnga pota mbyryñaĩshi kova ñandyrete, ñaĩ handi verã Ñandeja. 9 Hãme rãnga õñehã’ãhã japoha Ñandeja potava, ĩmehãĩteri’iape maĩrã yryrete hejahamavape. 10 Shara opaitevapo ñaĩ Cristo hỹnonde, ñanimbivache verã, pepenteĩpo me’ẽãshukui hepykue ikoteri ko heteperã japo vekua, jaishu haikaviva maĩrã porãmbava.

Ñee pyavapy ryheva

11 Kuaaha rãnga kyjehashi verã Tũpa, hãrã õñehã’ãha mbyrojahaka jyve kuaretare. Tũpa rãnga kuaa mbaivara’ore, hãrã ãhãrõ pikuaa verã jyve pypyape. 12 Ha’ẽã ijetaha kavi irijeherã, potaĩ rãnga pirojatẽ jyve yryrehe, hãme pikuaapo marãrapo pereshu opaite jyroja’i ijeheare kuaretare hỹnonde, hareka ha’ẽã ẽvã pyape kyrãvare. 13 Ĩme kuakuaahãã’irã, hokava hai Tũpa pevarã, kyrããrã hokava hai pee pevarã. 14 Cristo jyhaihukue rãnga yrỹmykyrẽy, yrypya mbijetahe kovarã; penteva manohẽ opava reherã, hãme hokava rehe opaiteva mano. 15 Cristo rãnga opava retare mano, ĩmeteri’iare ikoveãma verã hai pevarãĩ, koñeĩ ikoma verã manohe vekua hareka kuerajy vekua pevarãĩ. 16 Katynga ã’ẽ, katuveãmapo mbyvetehakui yngava retape ore kuareta heshahava rãĩmi, hareka ajema kyrãte kuaaha arykai Cristo, tẽvã kyrãveãmapo kuaaha. 17 Hãrã ĩme’ẽ Cristo ñymypente hãndivarã, haimapo pente japoha py’ahuva. Opa mbai tuja vekua opama hasa, hãrã opa mbaima py’ahujy. 18 Opaite kova mbai ou Tũpaivi, ñaniñonojy kavi hãndi opavare, hareka ñandokue opava retape ñañono kavijy hãndi verã. 19 Kova he’ise, Cristo rehe, Tũpa iñonojy kavi hãndi kuaretare, manduambaheva mbai porãmba kuaretare japo vekua; hãrã meẽ ore ñee pirĩñonojy kaviva ryheva. 20 Hãrã ore Cristo rehe yrokueha, Tũpateiva jururepe ore rupii. Hãma Cristo heepe, jururehape pẽĩjykavi hãndi verã Tũpa. 21 Cristo rãnga japoã hai mbai porãmba, tẽvã ñandyraihuiterã Tũpa rekoshu mbai porãmba japo’ia rãĩmi, hai rupii japity verã Tũpa ñimbivache.