2Cor 6 | TpjSC | STEP | Hãme rãnga, ore mboryhava Tũpa, jururehape pymyvãhereiimba verã mbai kavikue Tũpa mbouva.

2 Corinthians 6

1 Hãme rãnga, ore mboryhava Tũpa, jururehape pymyvãhereiimba verã mbai kavikue Tũpa mbouva. 2 Shara hai hei Mbyparahavape: Haipekavi arỹrẽndu, ara pyrỹmondoha jepevape kavi arỹmbory. Ã’ẽ rãnga hai ara pyrỹmboryhavape. Ã’ẽ rãnga hai ara pyrỹmondoha jepevape! 3 Mbavapeã ijyheshahaka porãã, moã mbava poi jyroja japohava reherã hareka potãã japohava porã ijetaherã. 4 Katynga opaite japohavape, heshahaka Tũpa jokueva orerã; heta ñyhãrõkuaape hasaha jyhasa’asyre, mbai mba’ety oreape, hareka mbai hasyvape; 5 urũnupãhãvape hareka ỹrỹmbyperesoavape, ñymomohẽ vasuvape, pohy mba’apoavape, ochehambape hareka irĩmbahyvape, 6 yryreko kyambape, arãndukuepe, ỹrãteỹmbape, hareka pya kavipe, Espiritu Santo ẽẽ yrykovepe hareka jyhaihu añetevape, 7 ñee añeteva mbe’uha iape, hareka Tũpa ñymbaikatukue ryheve. Ñyrãrõhã verã ñimbivachepe, ohoashu verã, maĩrã, ijochaha ẽvãpe. 8 Ãmope yrỹmbyveteha, hareka ãmope ajeteãshu reta, ãmope ijeta kavi yryrehe, hareka ãmope porã’ãĩte he’iajy yryrehe. Añetevate he’iava, he’iajy yryrehe mba’ety vekua mbe’uava. 9 Yrykuaahamba rãĩmi yrapoha, ajemaĩ yrykuaaha kavitẽva. Manoãserima’ia rãĩmi ikoha, haikavite ikohava; ũrũnupãhãtẽva, manohãã. 10 Vyamba rãĩmi mba’apoha, tẽvã vy’ahañoĩ; paveteva rãĩmi, tẽvã hetavape mbi’ikoa katu; mbaimba ĩmerekoava rãĩmi, tẽvã opa ĩme rekoha. 11 Shyryvyre Corintope pẽĩva, pe’aha irijuru ijetahape verã, hareka yrypya pe’ahape katumbapeve. 12 Ore mbotyhãã pyndyhevi, tẽvã pee ãñete pymboty yryhevi pyndypya. 13 Teru jurureva rãĩmi tay retape, airurepe piñomimba shyhevi verã pyndypyape ĩmepyreva, she añomimba pyheviva rãĩmi.

Ñande rãnga hai Tũpa ĩme’iva hoo

14 Avy pihia Jesús jyrojambaheare, marãrapo ñimbivacheva ñimi’ĩrũ handi hekopemba’õva?, timimbiva katuãpo iko hãndi hendyva. 15 Marãĩrapo Cristo iko kavi hãndi Ãña? Mbaivapera jyvache hãndi jyrojava hareka jyrojamba? 16 Mbaivaperapo haikavi’ẽ hãndi Tũpa hoo hareka tarã’ãngare ñemombai vasu ryheva? Ñande rãnga hai Tũpa ĩme’ia hoo, haiteiva rãnga hei:
She aikopo hãndi reta, hareka avatapo haire mbyteipi.
Hãma she haipo ñu Tũpa hareka hai retapo jyve shyrẽnta ĩrũre.
17 Pẽhẽshi haire mbyteivi, hareka pysyryshi;
avy pypokohe mbai kyavare hãrã she apyrỹmyvãhẽpokui.
18 Pee pevarã shepo haikui Teru, hãrã pee haipokui shyrayre hareka shyrajyre.
Kyrã hei Ñandeja opaite mbaikatu ĩmereva.