2Cor 7 | TpjSC | STEP | Hãme, shyryvyre ahaihuva, kova ĩmejareva hai ñee me’ẽãva. Hãme avypo ñaimyngyapy opaite katu ñanymyngyavare, katupo ñandyretepe maĩrã espiritupe, kyrãpo ñandyky’ãã shara Tũpaivi jakyje.

2 Corinthians 7

1 Hãme, shyryvyre ahaihuva, kova ĩmejareva hai ñee me’ẽãva. Hãme avypo ñaimyngyapy opaite katu ñanymyngyavare, katupo ñandyretepe maĩrã espiritupe, kyrãpo ñandyky’ãã shara Tũpaivi jakyje.

Pablo jyvy’akue

2 Piñono ore ikoa verã pyndypyape! Mbavãã porãmba japohahe, mbavapeã mymarãhãka, mba’ety mbytavyava. 3 She ha’ẽãpe kova pota aijeta’ai pyndyreherã, haimape kueve, shypyape apyryre, penteapeĩ jaiko verã hareka penteapeĩ ñamano verã. 4 Kyjembape aijeta’ãĩ penendie hareka airoja’ãĩ pyndyrehe. Opa mba’e ahasa’asy vekua mbytepe, shykyrẽ’ỹ hareka avy’a. 5 Jypy vãhẽhã ouha Macedoniaperãvãĩ putu’uhãã, oparupi hasaha jyhasa’asy, yryreshatambare oñehã’ãha hãndi, hareka kyjekue hyvaishope. 6 Tẽvã Tũpa mbypya vapyva kyrẽỹveãmavare, yrỹmbymbypya vapy Tito vãhẽ ourã. 7 Ha’ẽã vãhẽ ourãmeĩ, hai rãnga kyrẽ’ỹ jyve pyndyrehe. Hai mbeu ore marãra pee potatẽ yryreshapi jyve, marãra pyvy’ãpi hareka pejepy’apy shyrehe, opaite kova mbai shymbyvyavejy. 8 Ajema kuatia ambyparapeva pymbyvy’ãã, ambasyã ambyparareiirã. Koñeĩ ajepy’apyhe hokava kuatia ambyparape vekuamba sapy’aitemba pynymbyvy’ã. 9 Ã’ẽ avy’a, ha’ẽã apyrỹmbyvy’ãrã, shara hokava vyamba japo oujy verãre Tũpa jykoty hareka opa heja heko porãmba vekua. Hokava vyamba vekuamba hai Tũpa potava, porãmba japohamba pyndyrehevape. 10 Vyamba ryheva Tũpaivi ouva veru jaheja verã mbai porãmba vekua, jahajepe verã. Tẽvã ñymbasy ko yvy‘ĩãrẽ’õ veru ñymano. 11 Haikavi Tũpa pota rupii piñymbasypeĩrã. Pymaĩhe marãra veru mbai haikaviva! Kyrã mondo kuaa mba’eã ajaporã hareka shyrepy reta. Hãma poshy reta hareka kyje reta maĩnunga iko verãre. Pota shyresha reta hareka ajeraima japova jahehe reta. Opaite kova rehe, pyheshaka peĩã jyve kovaperã. 12 Hãma ambyparape hokava kuatiarã, shypya ambijetãhe mbai japo vekuare, maĩrã, mbai japohahe vekua. Tũpa hỹnonde kuaaha verãĩ rãnga, marãra yryyraihupi. 13 Hokava yrỹmbyvy’aite. Yrỹmbyvyaveva rãnga hai Tito heshaha vya’irã; shara pymykyrẽyjyshu. 14 Ãmarãã Tito haishu airoja pyndyreheva. Kyrãtẽ verã, opaite ore he’ihape vekua hai añeteva, hareka kyrãi jyve Tito he’iashu vekua pyndyrehe ha’ĩjy añeteva, yrỹmbyhorypi. 15 Hãrã hai pyndyraihuiteve manduahe marãra pijaposhu hai heivarã, hareka marãra vy’ape hareka kyje ryheve pymyvãhẽshu. 16 Avy’aite ai opa mba’epe katu airoja pyndyreherã.